ភ្នំពេញ ៖ អ្នកនាំចូលរថយន្តអគ្គិសនីមកចែកចាយនៅក្នុងប្រទេសកម្ពុជា បានមើលឃើញថាទីផ្សាររថយន្តអគ្គិសនីនៅក្នុងប្រទេសកម្ពុជានាពេលនេះ គឺមិនខុសពីទីផ្សាររថយន្តអគ្គិសនីនៅប្រទេសចិន កាលពី២០ឆ្នាំមុននេះទេ ដូច្នេះទីផ្សារថយន្តអគ្គិសនីនៅកម្ពុជានឹងមានកំណើននិងមានអ្នកប្រើប្រាស់ច្រើន ។លោកតុង ហ៊ោយគួយ អគ្គនាយកក្រុមហ៊ុន SDB ដែលជាក្រុមហ៊ុននាំចូលរថយន្តអគ្គិសនីម៉ាក AITO ពីប្រទេសចិនមកចែកចាយនៅក្នុងប្រទេសកម្ពុជាបានមានប្រសាសន៍ថា យោងតាមបទពិសោធន៍នៃការអភិវឌ្ឍន៍ជាងមួយទសវត្សរ៍កន្លងមកនេះ យើងអាចមើលឃើញថា ទីផ្សាររថយន្តអគ្គិសនីប្រទេសកម្ពុជា គឺដូចជាទីផ្សាររថយន្តអគ្គិសនីរបស់ប្រទេសចិនកាលពីជាង១០ឆ្នាំ គឺមានអត្រានៃការប្រើប្រាស់រថយន្តអគ្គិសនីយ៉ាងខ្លាំងនិងមានអត្រាកំណើនយ៉ាងឆាប់រហ័ស។ លោកបន្តថា រាជរដ្ឋាភិបាល បានដាក់ចេញគោលនយោបាយគាំទ្រជាបន្តបន្ទាប់នូវការប្រើប្រាស់រថយន្តអគ្គិសនី ដែលធ្វើឱ្យពួកយើងជាអ្នកនាំចូលនិងចែកចាយរថយន្តអគ្គិសនីមានទំនុកលើទីផ្សារនេះកាន់តែខ្លាំង សម្រាប់ការអភិវឌ្ឍន៍រថយន្តអគ្គិសនីនៅក្នុងប្រទេសកម្ពុជា ។ ចំណែកអ្នករថយន្តអគ្គិសនី ម៉ាក Bestune ពីប្រទេសចិនដូចគ្នាក៏មានសុទិដ្ឋិនិយមខ្ពស់ ចំពោះទីផ្សាររថយន្តអគ្គិសនីនៅក្នុងប្រទេសកម្ពុជានាពេលអនាគតឆាប់ៗនេះ ប៉ុន្តែ អ្វីដែលធ្វើឱ្យពលរដ្ឋនៅមានការរារែកចំពោះការទិញរថយន្តអគ្គិសនីប្រើប្រាស់នោះគឺស្ថានីយសាកថាមពលរថយន្តអគ្គិសនីក្នុងប្រទេសនៅមានចំនួនតិចតួចនៅឡើយ ។ អ្នកនាំចូលរថយន្តអគ្គិសនី ជាច្រើនមកកាន់ទីផ្សារប្រទេសកម្ពុជា បានស្នើសុំឱ្យរដ្ឋាភិបាលដំឡើងស្ថានីយ៍សាកថាមពលឱ្យបានច្រើនកន្លែង និងតាមដងផ្លូវជាតិសំខាន់ៗនៅតាមបណ្ដាខេត្តនានាទូទាំងប្រទេស ដើម្បីសម្រួលដល់អ្នកប្រើប្រាស់កាន់តែងាយស្រួលក្នុងការរកកន្លែងសាកថាមពលនៅពេលរថយន្តត្រូវការបញ្ចូលថាមពល ។នៅក្នុងពិធីសម្ពោធនាំចូលរថយន្តអគ្គិសនីម៉ាក AION V កាលពីថ្ងៃទី១៨ មករា ២០២៥ លោកជំទាវចម និម្មល រដ្ឋមន្ត្រីក្រសួងពាណិជ្ជកម្ម បានកត់សម្គាល់អំពីសន្ទុះកើនឡើងនៃការប្រើប្រាស់ និងការអភិវឌ្ឍវិស័យយានយន្តអគ្គិសនីទាំងក្នុងតំបន់និងសកលលោក ដែលវិស័យនេះ បានផ្តល់នូវអត្ថប្រយោជន៍ជាច្រើន តាមរយៈការបង្កើតការងារសម្រាប់ពលរដ្ឋ និងផ្តល់តម្លៃបន្ថែមក្នុងសេដ្ឋកិច្ច, ការការពារបរិស្ថាន និងសុខភាពប្រជាជនតាមរយៈការកាត់បន្ថយការបញ្ចេញឧស្ម័នពុលជំនួសឱ្យការប្រើប្រាស់យានយន្តប្រើប្រាស់ប្រេងឥន្ធនៈ, និងការចូលរួមធានាសន្តិសុខថាមពលតាមរយៈការកាត់បន្ថយការពឹងផ្អែកលើការនាំចូលប្រេងឥន្ទនៈពីបរទេស ព្រមទាំងភាពងាយរងគ្រោះបណ្ដាលមកពីការប្រែប្រួលនៃថ្លៃប្រេងឥន្ទនៈសកល ៕