ក្រសួងសាធារណការ និងដឹកជញ្ជូន រៀបចំវគ្គបណ្តុះបណ្តាល ស្តីពី “ការប្រើប្រាស់ប្រព័ន្ធ SARMIS Ver.2 Online និងផ្សព្វផ្សាយលិខិតបទដ្ឋានគតិយុត្តពាក់ព័ន្ធនឹងការរៀបចំ និងការគ្រប់គ្រងបញ្ជីសារពើភណ្ឌទ្រព្យសម្បត្តិរដ្ឋ ភ្នំពេញ៖ នៅថ្ងៃពុធ ទី៤ ខែធ្នូ ឆ្នាំ២០២៤ លោកជំទាវ កុយ សុដានី រដ្ឋលេខាធិការប្រចាំការ ក្រសួងសាធារណការ និងដឹកជញ្ជូន បានអញ្ជើញជាអធិបតីបើកវគ្គបណ្តុះបណ្តាល ស្តីពី “ការប្រើប្រាស់ប្រព័ន្ធ SARMIS Ver.2 Online និងផ្សព្វផ្សាយលិខិតបទដ្ឋានគតិយុត្តពាក់ព័ន្ធនឹងការរៀបចំ និងការគ្រប់គ្រងបញ្ជីសារពើភណ្ឌទ្រព្យសម្បត្តិរដ្ឋ ដល់អង្គភាពក្រោមឱវាទរបស់ក្រសួងសាធារណការ និងដឹកជញ្ជូន ដោយមានការអញ្ជើញចូលរួមពី ឯកឧត្តម លោកជំទាវជាថ្នាក់ដឹកនាំក្រសួង តំណាងក្រសួងសេដ្ឋកិច្ច និងហិរញ្ញវត្ថុ លោក លោកស្រីជាសិក្ខាកាម មកពីគ្រប់អង្គភាពប្រើប្រាស់ទ្រព្យសម្បត្តិរដ្ឋនៅថ្នាក់ជាតិ សហការគ្រាសទាំង ៣ និងមន្ទីរសាធារណការ និងដឹកជញ្ជូនទាំង២៥ រាជធានី-ខេត្ត សរុបប្រមាណ ១៥០នាក់ ។ វគ្គបណ្តុះបណ្តាលនេះ រៀបចំឡើងក្នុងគោលបំណង ដើម្បីផ្តល់នូវចំណេះដឹងបន្ថែមពាក់ព័ន្ធនឹងគន្លឹះថ្មីៗនៃការប្រើប្រាស់ប្រព័ន្ធបច្ចេកវិទ្យាព័ត៌មានគ្រប់គ្រងបញ្ជីសារពើភណ្ឌទ្រព្យសម្បត្តិរដ្ឋ ជំនាន់ទី២ (SARMIS Ver.2 Online ) ជូនដល់មន្រ្តីជំនាញនៃគ្រប់អង្គភាពស្ថិតក្រោមឱវាទរបស់ក្រសួងសាធារណការ និងដឹកជញ្ជូន ដែលជាអាជ្ញាធរកាន់កាប់ទ្រព្យសម្បត្តិរដ្ឋ ដើម្បីធានាឱ្យបាននូវប្រសិទ្ធភាព ស័ក្តិសិទ្ធិភាព តម្លាភាព និងការអនុវត្តឱ្យស្របតាមនីតិវិធីជាធរមានរបស់ក្រសួងសេដ្ឋកិច្ច និងហិរញ្ញវត្ថុ។ ថ្លែងក្នុងពិធីបើកសិក្ខាសាលា លោកជំទាវរដ្ឋលេខាធិកាប្រចាំការ បានផ្ដាំផ្ញើដល់ថ្នាក់ដឹកនាំទួលបន្ទុក ក្រុមការងារនៃនាយកដ្ឋានហិរញ្ញវត្ថុ មន្រ្តីបង្គោលនៅតាមបណ្តាអង្គភាពប្រើប្រាស់ទ្រព្យសម្បតិ្តរដ្ឋរបស់ក្រសួង ត្រូវបន្ដកិច្ចខិតខំប្រឹងប្រែងឱ្យកាន់តែសកម្មបន្ថែមទៀត ដើម្បីធានា និងជំរុញការគ្រប់គ្រង និងប្រើប្រាស់ទ្រព្យសម្បត្តិរដ្ឋឱ្យមានប្រសិទ្ធភាព ស្របតាមចក្ខុវិស័យ យុទ្ធសាស្ត្រ និងផែនការសកម្មភាពរួមនៃកម្មវិធីកំណែទម្រង់ការគ្រប់គ្រងហិរញ្ញវត្ថុសាធារណៈ ដំណាក់កាលទី៤ របស់រដ្ឋាភិបាលកម្ពុជា៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube