មកទល់ពេលនេះកម្ពុជា និងវៀតណាម នៅមិនទាន់បានឯកភាពគ្នាលើការតភ្ជាប់ផ្លូវល្បឿនលឿនភ្នំពេញ-បាវិត និងហូជីមិញ-ម៉ុកបៃ នៅឡើយទេ ខណៈគម្រោងផ្លូវល្បឿនលឿនប្រវែង១៣៥គីឡូម៉ែត្រ ដែលជាផ្លូវល្បឿនលឿនទី២របស់កម្ពុជា មួយនេះ បានបើកការដ្ឋានសាងសង់អស់រយៈពេលជាង១ឆ្នាំមកហើយ។ បើតាមការគូសបញ្ជាក់របស់មន្រ្តីជាន់ខ្ពស់ក្រសួងសាធារណការ និងដឹកជញ្ជូន បច្ចុប្បន្នកម្ពុជា នៅរង់ចាំភាគីវៀតណាម ដើម្បីរៀបចំក្រុមការងារចូលរួមប្រជុំដោះស្រាយបញ្ហានេះ។ឯកឧត្តម ផន រឹម អ្នកនាំពាក្យក្រសួងសាធារណការ និងដឹកជញ្ជូន បានប្រាប់ខេមបូណូមីសថា មកទល់ពេលនេះ ការសាងសង់ផ្លូវល្បឿនលឿនភ្នំពេញ-បាវិត កំពុងស្ថិតក្នុងដំណើរការដោះស្រាយផលប៉ះពាល់ជូនប្រជាពលរដ្ឋ ពោលគឺពុំទាន់ទទួលបានវឌ្ឍនភាពលើការសាងសង់គួរឱ្យកត់សម្គាល់នៅឡើយទេ។ ជាមួយគ្នានេះ គម្រោងតភ្ជាប់ផ្លូវល្បឿនលឿនកម្ពុជា ជាមួយវៀតណាមត្រង់ចំណុចបង្គោលគីឡូម៉ែត្រ១៦៤បាវិត - ហូជីមិញ ម៉ុកបៃ ក៏នៅមិនទាន់ឯកភាពគ្នានោះដែរ។ បើតាមការអះអាងរបស់មន្ត្រីជាន់ខ្ពស់រូបនេះ បច្ចុប្បន្នភាគីកម្ពុជាកំពុងរង់ចាំភាគីវៀតណាម រៀបចំក្រុមការងារចូលរួមប្រជុំដោះស្រាយ ដើម្បីពន្លឿនលើកិច្ចការនេះ។ គួរបញ្ជាក់ថា គម្រោងសាងសង់ផ្លូវល្បឿនលឿនភ្នំពេញ-បាវិត ប្រវែង១៣៥គីឡូម៉ែត្រ ដែលជាផ្លូវល្បឿនលឿនទី២របស់កម្ពុជា បានបើកការដ្ឋានសាងសង់នៅថ្ងៃទី៧ ខែមិថុនា ឆ្នាំ២០២៣ ក្រោមវត្តមានរបស់សម្តេចតេជោ ហ៊ុន សែន អតីតនាយករដ្ឋមន្ត្រីនៃកម្ពុជា និងបច្ចុប្បន្នជាប្រធានព្រឹទ្ធសភា។ ផ្លូវដែលមានតម្លៃវិនិយោគជាង១ពាន់៣រយលានដុល្លាមួយនេះ សាងសង់ឡើងក្រោមទម្រង់វិនិយោគ សាងសង់-ប្រតិបត្តិការ-ផ្ទេរ (BOT) ដែលមានរយៈពេលប្រតិបត្តិការចំនួន៥០ឆ្នាំ ក្នុងនោះ២០ភាគរយ ជាទុនវិនិយោគរបស់ក្រុមហ៊ុនសាជីវកម្មស្ពាន និងថ្នល់ចិន និង៨០ភាគរយជាប្រាក់កម្ចីរបស់ក្រុមហ៊ុន។ ដោយឡែកស្ពានឆ្លងកាត់ទន្លេមេគង្គ ដែលគ្រោងចំណាយថវិកាជាង២៣២លានដុល្លារ ជាបន្ទុករបស់រាជរដ្ឋាភិបាលកម្ពុជា។ តាមគម្រោង ផ្លូវល្បឿនលឿនភ្នំពេញ-បាវិត នេះ នឹងសាងសង់រួចរាល់នៅចុងឆ្នាំ២០២៦ ឬនៅដើមឆ្នាំ២០២៧៕