គណៈប្រតិភូកម្ពុជាអញ្ជើញចូលរួមកិច្ចប្រជុំឧត្តមមន្រ្តីដឹកជញ្ជូនអាស៊ាន លើកទី៥៨ និងជំនួបជាមួយដៃគូសន្ទនានានា នៅទីក្រុងគូឡាឡាំពួ ប្រទេសម៉ាឡេស៊ី ម៉ាឡេស៊ី៖ ថ្ងៃទី១៨ ខែវិច្ឆិកា ឆ្នាំ២០២៤ ឯកឧត្តម ឈៀង ពេជ្រ អគ្គនាយកនៃអគ្គនាយកដ្ឋានភស្តុភារកម្ម និងជាប្រធានឧត្តមមន្រ្តីដឹកជញ្ជូនកម្ពុជា បានអញ្ជើញដឹកនាំគណៈប្រតិភូ នៃព្រះរាជាណាចក្រកម្ពុជា ចូលរួមកិច្ចប្រជុំឧត្តមមន្រ្តីដឹកជញ្ជូនអាស៊ាន លើកទី៥៨ តបតាមការអញ្ជើញរបស់ក្រសួងដឹកជញ្ជូន នៃប្រទេសម៉ាឡេស៊ី ដែលជាប្រធានប្តូរវេនសម្រាប់ឆ្នាំ២០២៤ និងជំនួបជាមួយដៃគូសន្ទនានានា នៅទីក្រុងគូឡាឡាំពួ ប្រទេសម៉ាឡេស៊ី។ កិច្ចប្រជុំឧត្តមមន្រ្តីដឹកជញ្ជូនអាស៊ានលើកទី៥៨ ត្រូវបានរៀបចំឡើងក្នុងគោលបំណងសំខាន់ៗរួមមាន៖ ១.)ពិនិត្យ លើសេចក្តីសម្រេចនានា ដែលថ្នាក់ដឹកនាំ និងក្រសួងស្ថាប័នពាក់ព័ន្ធបានដាក់ចេញដើម្បីអនុវត្តក្នុងរយៈពេលមួយឆ្នាំចុងក្រោយនេះ ២.) ពិនិត្យលើការសិក្សា និងការវាយតម្លៃផែនការយុទ្ធសាស្រ្តដឹកជញ្ជូនគូឡាឡាំពួ ២០១៦-២០២៥ ៣.) ពិនិត្យ ពិភាក្សាលើផែនការដឹកជញ្ជូនថ្មី សម្រាប់ដប់ឆ្នាំទៅមុខ ២០២៦-២០៣០ ដែលថ្នាក់ដឹកនាំបានកំណត់ឱ្យឈ្មោះថា “ផែនការអន្តរវិស័យដឹកជញ្ជូនអាស៊ាន ២០២៦-២០៣០” ៤.) ពិនិត្យផែនការការងារសម្រាប់ឆ្នាំ២០២៤-២០២៥ ៥.) ពិនិត្យ ផ្តល់អនុសាសន៍ និងអនុម័តលើរបាយការណ៍ និងផែនការថ្មីៗរបស់ក្រុមការងារបច្ចេកទេសទាំងបួន គឺក្រុមការងារដឹកជញ្ជូនផ្លូវអាកាស ក្រុមការងារដឹកជញ្ជូនផ្លូវគោក ក្រុមការងារដឹកជញ្ជូនតាមផ្លូវសមុទ្រ និងក្រុមការងារសម្របសម្រួលការងារដឹកជញ្ជូន ៦.) ពិនិត្យវឌ្ឍនភាព និងកំណត់ការងារបន្តជាមួយដៃគូសន្ទនា មានជាអាទិ៍ជាមួយប្រទេសចិន ជប៉ុន សាធារណរដ្ឋកូរ៉េ និងសហគមន៍អឺរ៉ុប ៧.) ពិភាក្សាដើម្បីត្រៀមរៀបចំកិច្ចប្រជុំរដ្ឋមន្រ្តីដឹកជញ្ជូនអាស៊ានលើកទី៣០ និងកិច្ចប្រជុំរវាងរដ្ឋមន្រ្តីដឹកជញ្ជូនអាស៊ានជាមួយដៃគូរពាក់ព័ន្ធ នាថ្ងៃទី២១ និង ថ្ងៃទី២២ ខែវិច្ឆិកា ឆ្នាំ២០២៤ ខាងមុខ ៨.)កិច្ចពិភាក្សាលើការងារដែលនៅសេសសល់ ពិសេសការផ្តល់សច្ចាប័នលើកិច្ចព្រមព្រៀងនិងពិធីសារនានា ដែលបានអនុម័ត និងចុះហត្ថលេខាកន្លងមក។ គួរបញ្ជាក់ថា ក្នុងកិច្ចប្រជុំនេះ ឧត្តមមន្រ្តីដឹកជញ្ជូននៃប្រទេសទីម័រខាងកើត ក៏ត្រូវបានអញ្ជើញចូលរួម និងថ្លែងសុន្ទរកថាក្នុងនាមជាសមាជិកអង្កេតការណ៍ផងដែរ៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube