ឯកឧត្តម សេង ឈួន រដ្ឋលេខាធិការក្រសួងសាធារណការ និងដឹកជញ្ជូនដឹកនាំប្រតិភូក្រសួង ទស្សនកិច្ចសិក្សាបច្ចេកទេសគ្រប់គ្រងការដឹកជញ្ជូនលើសទម្ងន់កម្រិតកំណត់នៅប្រទេសថៃ ប្រទេសថៃ៖ នាថ្ងៃទី៦ ខែវិច្ឆិកា ឆ្នាំ២០២៤ ឯកឧត្តម សេង ឈួន រដ្ឋលេខាធិការក្រសួងសាធារណការ និងដឹកជញ្ជូន និងជាប្រធានគណៈកម្មាធិការសម្របសម្រួលអចិន្ត្រៃយ៍ នៃគណៈកម្មាធិការដឹកនាំការត្រួត ពិនិត្យយានយន្តដឹកជញ្ជូនលើសទម្ងន់កម្រិតកំណត់ អមដោយ ឯកឧត្តម គឹម សាន់ អនុរដ្ឋលេខាធិការ និង ឯកឧត្តម ម៉ី ម៉ារ៉ាឌី អនុរដ្ឋលេខាធិការ និងលោក តាំង ពៅ ប្រធានលេខាធិការដ្ឋាន បានដឹកនាំប្រតិភូក្រសួងធ្វើទស្សនកិច្ចសិក្សាសិក្សាបច្ចេកទេសគ្រប់គ្រងការដឹកជញ្ជូនលើសទម្ងន់កម្រិតកំណត់នៅប្រទេសថៃ និងចុះទស្សនកិច្ចសិក្សាផ្ទាល់អំពីការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ នៅស្ថានីយជញ្ជីង Wattana Nakhon និងស្ថានីយជញ្ជីង Sa Kaeo នៃខេត្តស្រះកែវ ប្រទេសថៃ។ ការចុះសិក្សាបច្ចេកទេសនេះ មានការសម្របសម្រួលពី អគ្គនាយកដ្ឋានផ្លូវជាតិ នៃក្រសួងសាធារណការ ប្រទេសថៃ ដែលតំណាងដោយ ឯកឧត្តម Tanin Rirattanapong អគ្គនាយក និងមន្រ្តីក្រោមឱវាទ។ ការសិក្សាបច្ចេកទេសគ្រប់គ្រងការដឹកជញ្ជូនលើសទម្ងន់កម្រិតកំណត់នេះ ធ្វើឡើងក្នុងគោលបំណងចែករំលែក និងផ្លាស់ប្តូរបទពិសោធន៍រវាងគ្នាទៅវិញទៅមក ក្នុងការគ្រប់គ្រងយន្តការត្រួតពិនិត្យយានយន្តដឹកជញ្ជូនលើសទម្ងន់ ឱ្យទទួលបានលទ្ធផល និងប្រសិទ្ធភាព និងឱ្យក្លាយជាមូលដ្ឋានសម្រាប់សិក្សាលើផ្នែកច្បាប់ និងបច្ចេកទេសឱ្យបានគ្រប់ជ្រុងជ្រោយ សម្រាប់បំពេញបន្ថែមលើការអនុវត្តការងារកន្លងមក និងទិសដៅនៃការរៀបចំយន្តការគ្រប់គ្រងការដឹកលើសទម្ងន់កម្រិតកំណត់នៅថ្ងៃមុខ។ ថ្លែងក្នុងកិច្ចប្រជុំ ឯកឧត្តមប្រធាន បានអំណរគុណដល់ភាគីប្រទេសថៃ ដែលបានស្វាគមន៍យ៉ាងកក់ក្តៅ ចំណាយពេលវេលារៀបចំកម្មវិធី និងសូមឱ្យភាគីទាំងពីរ បន្តកិច្ចសហប្រតិបត្តិការគ្នាបានល្អទាំងបច្ចុប្បន្ន និងទៅថ្ងៃខាងមុខ៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube