ថ្ងៃព្រហស្បតិ៍ ៤រោច ខែស្រាពណ៍ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី៣០ ខែសីហា ឆ្នាំ២០១៨ ឯកឧត្តម ជួប សុភក្តិ អនុរដ្ឋលេខាធិការ បានអញ្ជើញជាអធិបតីក្នុង ពិធីបើកសិក្ខាសាលាផ្សព្វផ្សាយស្តីពី គោលនយោបាយចំណូលរយៈពេលមធ្យម និង យុទ្ធសាស្ត្រកៀរគរ ចំណូល២០១៩-២០២៣ ដែលបានប្រព្រឹត្តទៅនៅខេត្តសៀមរាប ដោយមានការចូលរួមពីមន្ត្រីអង្គភាព ក្រោមឱវាទក្រសួងប្រមាណ៥០នាក់។ សិក្ខាសាលានេះ ត្រូវបានរៀបចំឡើងក្នុងគោលបំណងបង្កើនការយល់ដឹង ការគាំទ្រ និងការចូលរួម ក្នុងការអនុវត្តផែនការយុទ្ធសាស្ត្រប្រមូលចំណូល និងផ្តល់ព័ត៌មានបច្ចេកទេសសមស្របនិងចាំបាច់ សម្រាប់ការត្រៀមលក្ខណៈក្នុងការអនុវត្តកំណែទម្រង់ការគ្រប់គ្រងហិរញ្ញវត្ថុសាធារណៈ។ សិក្ខាសាលានេះផ្តោតសំខាន់ទៅលើបញ្ហាប្រឈមក្នុងការអនុវត្តយុទ្ធសាស្ត្រកៀរគរចំណូលរយៈពេល មធ្យម ឆ្នាំ២០១៤-២០១៨ កិច្ចពិភាក្សាទៅលើយុទ្ធសាស្ត្រសម្រាប់ដោះស្រាយបញ្ហាប្រឈម និងទិសដៅ ការងារបន្តសម្រាប់ការអនុវត្តផែនការយុទ្ធសាស្ត្រកៀរគរចំណូលឆ្នាំ២០១៩-២០២៣នាពេលខាងមុខ។ ថ្លែងក្នុងសន្ទរកថាបើក ឯកឧត្តមអនុរដ្ឋលេខាធិការបានគូសបញ្ជាក់អំពីសារសំខាន់នៃការអនុវត្តផែនការ យុទ្ធសាស្ត្រប្រមូលចំណូលថវិកាជូនជាតិ និងសមិទ្ធផលសម្រេចបានលើសពីការរំពឹងទុកក្នុងការប្រមូល ចំណូលរបស់ក្រសួងក្នុងរយៈពេលមធ្យម ឆ្នាំ២០១៤-២០១៨ ដែលឆ្លុះបញ្ចាំងពីកិច្ចខិតខំប្រឹងប្រែងរបស់ មន្ត្រីផ្តល់សេវារបស់ក្រសួង។ ជាទីបញ្ចប់ ឯកឧត្តមអនុរដ្ឋលេខាធិការ បានថ្លែងអំណរគុណនិងកោតសរសើរ ក៏ដូចជាលើកទឹកចិត្ត ដល់មន្ត្រីផ្តល់សេវាសាធារណៈទាំងអស់របស់ក្រសួងឲ្យបន្តខិតខំប្រឹងប្រែងក្នុងការអនុវត្តផែនការប្រមូលចំណូល ស្របតាមគោលនយោបាយរបស់ជាតិបន្ថែមទៀត។