ភ្នំពេញ ៖ ចំណតផែកុងតឺន័រថ្មី ប្រវែង២៥៣ម៉ែត្រ ស្ថិតនៅក្នុងកំពង់ផែស្វយ័តក្រុងព្រះសីហនុ នឹងបើកសម្ពោធដាក់ឱ្យប្រើប្រាស់ជាផ្លូវការនៅថ្ងៃទី១២ ខែកញ្ញា ឆ្នាំ ២០២៤ ក្រោមអធិបតីភាពសម្ដេចមហាបវរធិបតីហ៊ុន ម៉ាណែត នាយករដ្ឋមន្ត្រីនៃព្រះរាណាចក្រកម្ពុជា ។បើតាមគម្រោងនៃការអភិវឌ្ឍកំពង់ផែនេះ ត្រូវបានបែកចែកជា ចំណត់ផែច្រាំងទំនិញទូទៅ ដោយចំណាយថវិកាប្រមាណ៣២លានដុល្លារអាមេរិក ចំណតផែកុងតឺន័រទឹកជ្រៅថ្មីជំហានទី១ ចំណាយថវិកាប្រមាណ២៤៣លានដុល្លារ និងចំណតផែកុងតឺន័រទឹកជ្រៅថ្មីជំហានទី២និងជំហានទី៣ ចំណាយថវិកាប្រមាណ៦៩៨លានដុល្លារអាមេរិក ។ គម្រោងទាំងអស់នេះ គម្រោងទាំងនេះ ប្រើប្រាស់ថវិកាសរុបប្រមាណ៩៧៣លានដុល្លារអាម៉េរិកក្នុងនោះ ឥណទានសម្បទានពីរដ្ឋាភិបាលជប៉ុនចំនួនប្រមាណ ៧៦០លានដុល្លារអាមេរិក ថវិកាបដិភាគរបស់រាជរដ្ឋាភិបាលកម្ពុជា សម្រាប់ពន្ធអាករផ្សេងៗចំនួនប្រមាណ ១៩២លានដុល្លារអាមេរិក និងថវិកាផ្ទាល់របស់កំពង់ផែស្វយ័តក្រុងព្រះសីហនុចំនួនប្រមាណ២១លានដុល្លារអាមេរិក ។ ការបើកសម្ពោធដាក់ឱ្យប្រើប្រាស់នូវចំណតកុងតឺន័រក្នុងកំពង់ផែស្វយ័តក្រុងព្រះសីហនុនេះ ស្របពេលដែលរដ្ឋាភិបាលក៏កំពុងជីកព្រែកហ្វូណនតេជោ ដោយរំពឹងថានឹងបញ្ចប់នៅឆ្នាំ ២០២៨ ដែលព្រែកជីកនេះនឹងតភ្ជាប់ពីកំពង់ផែទឹកសាប ទៅកាន់កំពង់ផែទឹកជ្រៅកម្ពុជា ក្នុងខេត្តកែប ខេត្តកំពត និងខេត្តព្រះសីហនុ ហើយបន្តទៅកាន់កំពង់ផែនានាក្នុងតំបន់ផងដែរ ។ ការបើកសម្ពោធចំណតផែកុងតឺន័រនេះដែរ ក៏នឹងអនុញ្ញាតឱ្យនាវាដឹកទំនិញចូលចតក្នុងកំពង់ផែក្រុងព្រះសីហនុបានបន្ថែមទៀត ជាមួយនឹងសមត្ថភាពផ្ទុកកុងតឺន័រក្នុងកំពង់ផែបានកាន់តែច្រើន ៕