ចូលរួមបរិច្ចាគថវិកាក្នុងយុទ្ធនាការ “១ម៉ឺនរៀល ១ម៉ឺននាក់” ដើម្បីមន្ទីរពេទ្យគន្ធបុប្ផា ក្នុងបេសកកម្មជួយសង្គ្រោះកុមារកម្ពុជា យុទ្ធនាការ “១ម៉ឺនរៀល ១ម៉ឺននាក់” ឆ្នាំ២០២៤ សម្រាប់កុមារកម្ពុជា ត្រូវបានរៀបចំឡើងរយៈពេល ១ខែពេញ ដោយគិតចាប់ពីថ្ងៃទី១ ដល់ថ្ងៃទី៣០ ខែមិថុនា ឆ្នាំ២០២៤ ក្នុងគោលបំណងចូលរួមអបអរសាទរទិវាកុមារអន្តជាតិ ១មិថុនា និងបំផុសស្មារតី “ខ្មែរជួយខ្មែរ” តាមរយៈការអំពាវនាវឱ្យមានការចូលរួមបរិច្ចាគជូនមូលនិធិគន្ធបុប្ផាកម្ពុជា ទោះតិចក្តី ច្រើនក្តី ពីសំណាក់សប្បុរសជននានាទាំងក្នុង និងក្រៅប្រទេសដើម្បីរួមគ្នាផ្តល់ក្តីស្រឡាញ់ដល់ កុមារនៅកម្ពុជា ជាពិសេសក្នុងឱកាសនៃទិវាកុមារអន្តរជាតិ ១មិថុនា។ ក្នុងន័យនេះ ក្រសួងសាធារណការ និងដឹកជញ្ជូន សូមអំពាវនាវ ឯកឧត្តម-លោកជំទាវ ជាថ្នាក់ដឹកនាំ លោក-លោកស្រី ជាមន្ត្រីរាជការក្រោមឪវាទក្រសួងទាំងអស់ មេត្តាចូលរួមបរិច្ចាគថវិកាផ្ទាល់ខ្លួន ក្នុងយុទ្ធនាការ “១ម៉ឺនរៀល ១ម៉ឺននាក់”ដើម្បីដើម្បីធានានិរន្តរភាព និងដំណើរការរបស់មន្ទីរពេទ្យគន្ធបុប្ផា ក្នុងបេសកកម្មជួយសង្គ្រោះកុមារកម្ពុជា។ ឯកឧត្តម លោកជំទាវ លោក លោកស្រី ដែលមានគោលបំណងចង់ចូលរួមក្នុងយុទ្ធនាការខាងលើ សូមធ្វើការបរិច្ចាគថវិកាតាមរយៈ QR Code ដូចមានគោរពជូនភ្ជាប់។