កិច្ចប្រជុំអនុគណៈកម្មការបច្ចេកទេស នៃគណៈកម្មការចំពោះកិច្ចសិក្សា និងផ្ទៀងផ្ទាត់គម្រោងស្ដារឡើងវិញ កំណាត់ផ្លូវជាតិលេខ៣ (ត្រពាំងរពៅ-វាលរេញ) ប្រវែង ២០,៦២គីឡូម៉ែត្រ (គ.ម១៨១+១០០ ដល់ គ.ម២០១+៧២០) ទីស្ដីការក្រសួង៖ នាថ្ងៃចន្ទ ទី០៦ ខែឧសភា ឆ្នាំ២០២៤ ឯកឧត្តម នូ វឌ្ឍនៈ អនុរដ្ឋលេខាធិការ និងជាប្រធានអនុគណៈកម្មការបច្ចេកទេស នៃគណៈកម្មការចំពោះកិច្ចសិក្សា និងផ្ទៀងផ្ទាត់គម្រោងស្ដារឡើងវិញ កំណាត់ផ្លូវជាតិលេខ៣ (ត្រពាំងរពៅ-វាលរេញ) ប្រវែង ២០,៦២គីឡូម៉ែត្រ (គ.ម១៨១+១០០ ដល់ គ.ម២០១+៧២០) បានអញ្ជើញដឹកនាំកិច្ចប្រជុំក្រុមការងារ នៃអនុគណៈកម្មការបច្ចេកទេស ដោយមានការចូលរួមពីវិស្វករជំនាញ មកពីអង្គភាពថ្នាក់កណ្ដាលរបស់ក្រសួងសាធារណការ និងដឹកជញ្ជូន និងមន្ទីរសាធារណការ និងដឹកជញ្ជូន ខេត្តព្រះសីហនុ និងខេត្តកំពត ព្រមទាំងមន្ត្រីបច្ចេកទេសពាក់ព័ន្ធជាច្រើនរូប។ កិច្ចប្រជុំនេះ ត្រូវបានរៀបចំឡើង ផ្ដោតសំខាន់លើការសិក្សាលម្អិត និងរកវិធីសាស្ត្រសាងសង់ ដែលសមស្រប ក្នុងការស្ដារឡើងវិញ កំណាត់ផ្លូវជាតិលេខ៣ (ត្រពាំងរពៅ-វាលរេញ) ប្រវែង ២០,៦២គីឡូម៉ែត្រ (គ.ម១៨១+១០០ ដល់ គ.ម២០១+៧២០) ដោយចំណាយថវិកាតិច និងមានប្រសិទ្ធភាពខ្ពស់។ ឆ្លៀតក្នុងឱកាសនេះដែរ ឯកឧត្តមអនុរដ្ឋលេខាធិការ បានណែនាំដល់ក្រុមការងារបច្ចេកទេសទាំងអស់ ត្រូវរៀបចំផែនការសកម្មភាព និងលទ្ធផលការងារសិក្សាលម្អិតគម្រោងស្ដីពីលក្ខណៈបច្ចេកទេសនៃកម្រាលផ្លូវបច្ចុប្បន្ន ឱ្យបានរួចរាល់ក្នុងរយៈពេល ០៦ខែ ដើម្បីលើកជាជម្រើសនូវវិធីសាស្ត្រឌីហ្សាញកម្រាលផ្លូវថ្មីជូន ឯកឧត្តមរដ្ឋមន្ត្រី និងស្ថាប័នពាក់ព័ន្ធក្នុងការពិនិត្យសម្រេច។ សូមជម្រាបជូនថា៖ បច្ចុប្បន្ន កំណាត់ផ្លូវជាតិលេខ៣ (ត្រពាំងរពៅ-វាលរេញ) ត្រូវបានមន្ទីរសាធារណការ និងដឹកជញ្ជូន ខេត្តព្រះសីហនុ កំពុងបន្តអនុវត្តការងារថែទាំជាប្រចាំ ដើម្បីជួយសម្រួលចរាចរណ៍ និងការធ្វើដំណើររបស់បងប្អូនប្រជាពលរដ្ឋ មុននឹងឈានទៅដល់ការអនុវត្តការងារសាងសង់ជាក់ស្តែង ឱ្យស្របទៅតាមបទដ្ឋានបច្ចេកទេសខ្ពស់នាពេលខាងមុខ៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube