កិច្ចប្រជុំស្តីពីការបង្កើតគណៈកម្មការអន្តរក្រសួងដើម្បីជំរុញដំណើរការអនុវត្តគម្រោងអភិវឌ្ឍន៍មជ្ឈមណ្ឌលភស្តុភារកម្មក្រុងព្រះសីហនុ ទីស្តីការគណៈរដ្ឋមន្រ្តី៖ ថ្ងៃទី១៩ ខែមេសា ឆ្នាំ២០២៤ ឯកឧត្តម ហេង ណន រដ្ឋលេខាធិការ ក្រសួងសាធារណការ និងដឹកជញ្ជូន បានដឹកនាំគណៈប្រតិភូក្រសួង អមដំណើរដោយ លោកជំទាវ ហួត លីដា អនុរដ្ឋលេខាធិការ ឯកឧត្តម ឈៀង ពេជ្រ អគ្គនាយកនៃអគ្គនាយកដ្ឋានភស្តុភារកម្ម និងមន្រ្តីជំនាញពាក់ព័ន្ធ ចូលរួមកិច្ចប្រជុំជាមួយក្រុមប្រឹក្សាអ្នកច្បាប់នៃទីស្តីការគណៈរដ្ឋមន្រ្តី ក្រោមអធិបតីភាព ឯកឧត្តម ស៊ឹម ប៉ុណ្ណាឫទ្ធិ អនុប្រធានក្រុមប្រឹក្សាអ្នកច្បាប់ នៃទីស្តីការគណៈរដ្ឋមន្រ្តី ដើម្បីពិនិត្យ និងពិភាក្សាលើសេចក្តីព្រាងសេចក្តីសម្រេចស្តីពីការបង្កើតគណៈកម្មការអន្តរក្រសួងដើម្បីជំរុញដំណើរការអនុវត្តគម្រោងអភិវឌ្ឍន៍មជ្ឈមណ្ឌលភស្តុភារកម្មក្រុងព្រះសីហនុ។ អង្គប្រជុំនេះត្រូវបានរៀបចំឡើងដើម្បី ពិនិត្យពិភាក្សាយ៉ាងល្អិតល្អន់លើសេចក្តីព្រាងសេចក្តីសម្រេចដែលបានព្រាងឡើងដោយ អគ្គនាយកដ្ឋានភស្តុភារកម្ម ក្រសួងសាធារណការ និងដឹកជញ្ជូន មុននឹងដាក់ជូនរាជរដ្ឋាភិបាលកម្ពុជាសម្រេច។ ការរៀបចំសេចក្តីសម្រេចស្តីពីការបង្កើតគណៈកម្មការអន្តរក្រសួងខាងលើនេះ មានគោលបំណងជំរុញដំណើរការអនុវត្តគម្រោងអភិវឌ្ឍន៍មជ្ឈមណ្ឌលភស្តុភារកម្មក្រុងព្រះសីហនុ ឱ្យលេចចេញជារូបរាងហេដ្ឋារចនាសម្ព័ន្ធភស្តុភារកម្មកាន់តែឆាប់រហ័សនៅតំបន់ឆ្នេរសមុទ្រនៃប្រទេសកម្ពុជា សំដៅទាក់ទាញការវិនិយោគផ្នែកឡូជីស្ទីកទាំងក្នុង និងក្រៅប្រទេស ព្រមទាំងបង្កើនភាពប្រកួតប្រជែងវិស័យឡូជីស្ទីកនៅក្នុងតំបន់ និងសកលលោក និងជួយជំរុញកំណើនសេដ្ឋកិច្ចជាតិផងដែរ។ បន្ទាប់ពីបានពិនិត្យខ្លឹមសារ និងបកស្រាយបញ្ជាក់បន្ថែមយ៉ាងល្អិតល្អន់ នៃសេចក្តីព្រាង និងបានទទួលយកការស្នើកែសម្រួលពីក្រុមប្រឹក្សាអ្នកច្បាប់នៃទីស្តីការគណៈរដ្ឋមន្រ្តី អង្គប្រជុំបានបូកសរុប និងឯកភាពលើសេចក្តីព្រាងសេចក្តីសម្រេចនេះ ដោយគ្រោងដាក់ជូនរាជរដ្ឋាភិបាលកម្ពុជាពិនិត្យ និងអនុម័តមុនខែឧសភា ឆ្នាំ២០២៤។ ឯកឧត្តម រដ្ឋលេខាធិការ បានសម្តែងការអរគុណដល់ ឯកឧត្តមប្រធានអង្គប្រជុំ តំណាងក្រុមប្រឹក្សាអ្នកច្បាប់ និងក្រុមការងារនៃក្រុមប្រឹក្សាអ្នកច្បាប់នៃទីស្តីការគណៈរដ្ឋមន្រ្តី ដែលបានពិនិត្យខ្លឹមសារយ៉ាងយកចិត្តទុកដាក់ និងផ្តល់នូវអនុសាសន៍កែសម្រួលដើម្បីឱ្យសេចក្តីព្រាងសេចក្តីសម្រេចខាងលើមានសង្គតិភាព និងខ្លឹមសារគ្រប់ជ្រុងជ្រោយស្របតាមទម្រង់នៃលិខិតូបកឲរណ៍របស់រាជរដ្ឋាភិបាលកម្ពុជា។ ជាចុងបញ្ចប់នៃកិច្ចប្រជុំ ឯកឧត្តមប្រធានអង្គប្រជុំ តំណាងក្រុមប្រឹក្សាអ្នកច្បាប់នៃទីស្តីការគណៈរដ្ឋមន្រ្តី ក៏បានថ្លែងអំណរគុណដល់គណៈប្រតិភូរបស់ក្រសួងសាធារណការ និងដឹកជញ្ជូន ដែលបានចំណាយពេលវេលាដ៏មមាញឹកជួបប្រជុំដើម្បីពិនិត្យ និងពិភាក្សាយ៉ាងផុលផុសលើសេចក្តីព្រាងសេចក្ដីសម្រេចនេះ រហូតដល់ទទួលបានលទ្ធផលជាទីគាប់ចិត្ត និងក្នុងបរិយាកាសដ៏រីករាយ៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube