កិច្ចប្រជុំប្រចាំខែមីនា របស់ក្រុមអចិន្ត្រៃយ៍ ក្រុមការងារយុវជនគណបក្សប្រជាជនកម្ពុជា ក្រសួងសាធារណការ និងដឹកជញ្ជូន ដើម្បីតាមដានវឌ្ឍនភាពការងារ និងលើកទិសដៅបន្ត រាជធានីភ្នំពេញ៖ នារសៀលថ្ងៃសុក្រ ទី២២ ខែមីនា ឆ្នាំ២០២៤ លោកជំទាវ កុយ សុដានី សមាជិកាយុវជនគណបក្សប្រជាជនកម្ពុជាថ្នាក់កណ្ដាល និងជាប្រធានក្រុមការងារយុវជនគណបក្សក្រសួង បានអញ្ជើញដឹកនាំកិច្ចប្រជុំជីវភាពប្រចាំខែមីនា របស់ក្រុមការងារយុវជនគណបក្សក្រសួង ដោយមានការចូលរួមពី ឯកឧត្តម លោកជំទាវ លោក លោកស្រី ជាអនុប្រធាន សមាជិក សមាជិកាក្រុមអចិន្ត្រៃយ៍។ កិច្ចប្រជុំនេះផ្ដោតសំខាន់ទៅលើការពិនិត្យបច្ចុប្បន្នភាព សមាសភាពក្រុមការងារយុវជនគណបក្សប្រជាជនកម្ពុជាក្រសួងសាធារណការ និងដឹកជញ្ជូន និងពិនិត្យពិភាក្សាលើទិសដៅការងារបន្ត ដែលត្រូវអនុវត្តសម្រាប់ក្រុមការងារយុវជនគណបក្សក្រសួង។ បន្ទាប់ពីមានការរាយការណ៍ឌ្ឍនភាពការងារ លោកជំទាវប្រធានក្រុមការងារយុវជនគណបក្សក្រសួង បានស្នើឱ្យសមាជិកក្រុមអចិន្ត្រៃយ៍ធ្វើការពិនិត្យ និងអនុម័តលើសំណើកែសម្រួលបន្ថែមសមាសភាពយុវជនគណបក្សក្រសួង ដែលមានលក្ខណសម្បត្តិគ្រប់គ្រាន់។ លោកជំទាវប្រធានក្រុមការងារ ក៏បានជំរុញដល់សមាជិក សមាជិកាទាំងអស់ ត្រូវមានស្មារតីសាមគ្គីភាពខ្ពស់ ក្នុងការអនុវត្តផែនការសកម្មភាពដែលបានដាក់ចេញ និងត្រូវយកចិត្តទុកដាក់ចំពោះសុខទុក្ខរបស់យុវជននៅក្រោមឱវាទ នៃគណៈកម្មាធិការគណបក្សមូលដ្ឋាននីមួយៗ បន្ថែមទៀត។ ជាចុងបញ្ចប់ លោកជំទាវ បានណែនាំឱ្យក្រុមបាល់ទាត់យុវជនគណបក្សក្រសួងសាធារណការ និងដឹកជញ្ជូន ធ្វើការត្រៀមលក្ខណៈដើម្បីចូលរួមប្រកួតជាមួយក្រុមបាល់ទាត់យុវជនគណបក្សនៃក្រសួងស្ថាប័ន ផ្សេងៗទៀត សំដៅលើកកម្ពស់យុវជនក្នុងការលេងកីឡាដើម្បីសុខភាព និងរឹតបន្តឹងចំណងមិត្តភាពរវាងយុវជន និងយុវជន ក្នុងជួរគណបក្សឱ្យបានកាន់តែប្រសេីរមួយកម្រិតថែមទៀត៕