ពិភាក្សាស្តីពីគម្រោងអភិវឌ្ឍន៍ហេដ្ឋារចនាសម្ព័ន្ធទីក្រុង (Urban Infrastructure Development Project) នៅព្រះរាជាណាចក្រកម្ពុជា ក្រោមក្របខ័ណ្ឌហិរញ្ញប្បទានពីធនាគារវិនិយោគហេដ្ឋារចនាសម្ព័ន្ធអាស៊ី(AIIB) ទីស្ដីការក្រសួង៖ ថ្ងៃសុក្រ ទី១៥ ខែមីនា ឆ្នាំ២០២៤ ឯកឧត្តម ហេង ណន បានអញ្ជើញដឹកនាំដំបូងលើគម្រោងអភិវឌ្ឍន៍ហេដ្ឋារចនាសម្ព័ន្ធទីក្រុង នៅព្រះរាជាណាចក្រកម្ពុជា ក្រោមក្របខ័ណ្ឌហិរញ្ញប្បទានពីធនាគារវិនិយោគហេដ្ឋារចនាសម្ព័ន្ធអាស៊ី (AIIB) ដោយមានការចូលរួមពីឯកឧត្តម លោកជំទាវ លោក លោកស្រីជាសមាជិកសមាជិកាអង្គភាពគ្រប់គ្រងគម្រោង ក្នុងគោលបំណងដើម្បីប្រកាសសុពលភាពសមាសភាពអង្គភាពគ្រប់គ្រងគម្រោងនេះ។ ថ្លែងទៅកាន់អង្គប្រជុំនាឱកាសនោះ ឯកឧត្តម បានគូសបញ្ជាក់ពីសារសំខាន់នៃគម្រោងអភិវឌ្ឍន៍ហេដ្ឋារចនាសម្ព័ន្ធទីក្រុង ដែលផ្តោតជាសំខាន់លើការធ្វើឱ្យប្រសើរឡើងហេដ្ឋារចនាសម្ព័ន្ធក្រុង នៅព្រះរាជាណាចក្រកម្ពុជា ក្នុងនោះរួមមានការសាងសង់ប្រព័ន្ធការពារ បណ្តាញលូ និងអាងចម្រោះទឹកកខ្វក់ ដោយនឹងត្រូវអនុវត្តក្នុងខេត្តចំនួនបួន រួមមាន៖ កំពង់ឆ្នាំង កំពង់ចាម តាកែវ និងព្រៃវែង។ បន្ថែមពីលើនេះ ឯកឧត្តម បានស្នើឱ្យប្រធានគ្រប់គ្រងគម្រោងរួសរាន់រៀបចំសេចក្តីព្រាងផែនការសកម្មភាពស្របទៅតាមការណែនាំនៃលិខិតបទដ្ឋានគតិយុត្តជាធរមាន និងស្នើឱ្យសមាជិក សមាជិកា នៃអង្គភាពគ្រប់គ្រងគម្រោងទាំងអស់ ត្រូវខិតខំអនុវត្តគម្រោងនេះឱ្យមានប្រសិទ្ធភាព និងប្រកបដោយគុណភាព ស្របតាមសេចក្តីទុកចិត្ត និងគោលបំណងរបស់ថ្នាក់ដឹកនាំ៕ :: ភ្ជាប់ទំនាក់ទំនងជាមួយ (MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube