លោក ស៊ុន ចាន់ថុល ឧបនាយករដ្ឋមន្រ្តី និងជាអនុប្រធានទី១ ក្រុមប្រឹក្សាអភិវឌ្ឍន៍កម្ពុជាបានស្នើឲ្យក្រសួងសាធារណការ និងដឹកជញ្ជូនដែលមាន លោក ប៉េង ពោធិ៍នា ជារដ្ឋមន្រ្តី ខិតខំពន្លឿននីតិវិធីក្នុងការអនុវត្តគម្រោងអភិវឌ្ឍហេដ្ឋារចនាសម្ព័ន្ធផ្លូវ-ស្ពានសំខាន់ៗចំនួន ១២ គម្រោង ដែលជាឥណទានសម្បទាននិងហិរញ្ញប្បទានឥតសំណងពីបណ្តាប្រទេសជាមិត្ត និងដៃគូអភិវឌ្ឍ។ថ្លែងនៅក្នុងពិធីបិទសន្និបាតបូកសរុបលទ្ធផលការងារ របស់ក្រសួងសាធារណការនិងដឹកជញ្ជូនកាលពីពេលថ្មីៗនេះ លោក ស៊ុន ចាន់ថុល បានលើកពីគម្រោងហេដ្ឋារចនាសម្ព័ន្ធផ្លូវ-ស្ពាន សំខាន់ៗទាំង ១២ ដែលជាគម្រោងយុទ្ធសាស្រ្តក្នុងការជំរុញនីតិវិធី ធ្វើយ៉ាងណាអាចឈានទៅចុះកិច្ចព្រមព្រៀងបើកការដ្ឋានសាងសង់នាពេលខាងមុខក្នុងនោះរួមមាន៖-ផ្លូវជាតិលេខ ៥០ សេ និងស្ពានឆ្លងកាត់ទន្លេសាបពីខេត្តកំពង់ឆ្នាំងទៅខេត្តកំពង់ធំ -កំណាត់ផ្លូវជាតិលេខ៣ (ត្រពាំងរពៅ-វាលរេញ) -ផ្លូវជាតិលេខ៥៧ (បាត់ដំបង-អូរព្រះ) -កំណាត់ផ្លូវជាតិលេខ៦ (ត្រពាំងធំ-ស្លក្រាម) -ផ្លូវជាតិលេខ៦៧ (សៀមរាប-អន្លង់វែង-ជាំ/សាដាំ) -ផ្លូវជាតិលេខ៦៨ (ក្រឡាញ់-អូរស្មាច់) -កំណាត់ផ្លូវជាតិលេខ៧ (រមាត-ត្រពាំងគៀល) (រង់ចាំជំនួយឥតសំណង) -ផ្លូវជាតិលេខ៧០បេ (ទន្លេបិទ-ស្រីសន្ធរ-ព្រែកតាមាក់-ក្រុងអរិយក្សត្រ-ល្វាឯម- ពាមរក៍) -ផ្លូវជាតិលេខ៨ (ព្រែកតាមាក់-ក្រែក) -ផ្លូវជាតិតភ្ជាប់ពីខេត្តបាត់ដំបងទៅខេត្តសៀមរាប និងស្ពានមិត្តភាពកម្ពុជា-កូរ៉េ -ជំរុញកិច្ចសហការរវាងក្រុមការងារបច្ចេកទេសនៃក្រសួងសាធារណការ និង ដឹកជញ្ជូន និងក្រុមហ៊ុនវិនិយោគ រួមទាំងភាគីពាក់ព័ន្ធលើការសិក្សាលម្អិតដើម្បីឈានទៅការអនុវត្តគម្រោងផ្លូវល្បឿនលឿនភ្នំពេញ-សៀមរាប-ក្រុង ប៉ោយប៉ែត ក្រោមក្របខ័ណ្ឌភាពជាដៃគូរវាងរដ្ឋ និងឯកជន -ជម្រុញពិនិត្យ និងកំណត់អាទិភាពឡើងវិញទៅតាមផែនការសកម្មភាព របស់ផ្លូវក្រវ៉ាត់ក្រុងទី៣ ប៉ែកខាងកើត (ដែលស្ថិតក្នុងគម្រោងអភិវឌ្ឍន៍ ផែនការ ៥ឆ្នាំរំកិល ២០២៤-២០២៨)ក្នុងចំណោមគម្រោងសំខាន់ៗ ដែលលោក ស៊ុន ចាន់ថុល ស្នើឲ្យខិតខំពន្លឿននីតិវិធីទាំង ១២ គម្រោង លោក ស៊ុន ចាន់ថុល បានលើកយកគម្រោងអាទិភាពទី១ ដែលលោកផ្តល់អនុសាសន៍ដល់ក្រសួងសាធារណការនិងដឹកជញ្ជូនខិតខំសម្រេចឲ្យបាននៅក្នុងឆ្នាំ២០២៤ គឺគម្រោងសាងសង់ផ្លូវជាតិ ៥០C ដែលប្រើប្រាស់ថវិកាពីរដ្ឋាភិបាលចិន មានប្រវែងប្រមាណ ៥៨ គីឡូម៉ែត្រ ក្នុងនោះមានស្ពានប្រវែង ៣៣០០ម៉ែត្រ ដែលតភ្ជាប់ពីខេត្តកំពង់ឆ្នាំងទៅខេត្តកំពង់ធំ ដោយត្រូវចរចាតម្លៃជាមួយមិត្តចិនដើម្បីអាចឈានទៅបើកការដ្ឋានសាងសង់ឲ្យបានឆាប់បំផុត៕