ក្រសួងសារធារណការ និងដឹកជញ្ជូន ត្រៀមរៀបចំពិធីអបអរសាទរ ទិវាអន្តរជាតិនារី ៨មីនា ខួបលើកទី១១៣ ឆ្នាំ២០២៤ ទីស្ដីការក្រសួង៖ នារសៀលថ្ងៃចន្ទ ទី៤ ខែមីនា ឆ្នាំ ២០២៤ លោកជំទាវ មឹន មាណវី រដ្ឋលេខាធិការ និងជាប្រធានប្រតិបត្តិសមាគមនារីសាខាក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំគណៈកម្មការ-អនុគណៈកម្មការត្រៀមរៀបចំពិធីអបអរសាទរ ខួបលើកទី១១៣ នៃទិវាអន្តរជាតិនារី ៨មីនា ឆ្នាំ២០២៤ ដោយមានការអញ្ជើញចូលរួមពីថ្នាក់ដឹកនាំ លោកស្រី ជាអគ្គនាយករង ប្រធាន-អនុប្រធាននាយកដ្ឋាន និងមន្ត្រីតំណាងស្ត្រីមកពីកំពង់ផែស្វយ័តភ្នំពេញ កំពង់ផែស្វយ័តក្រុងព្រះសីហនុ រួមទាំងអង្គភាពក្រោមឱវាទក្រសួងប្រមាណ ២០រូប។ កិច្ចប្រជុំបានពិភាក្សាលើការកំណត់កាលបរិច្ឆេទ សម្រាប់រៀបចំប្រារព្វពិធីអបអរសាទរខួបលើកទី១១៣ នៃទិវាអន្តរជាតិនារី ៨មីនា ឆ្នាំ២០២៤ របស់ក្រសួងសាធារណការ និងដឹកជញ្ជូន ដោយក្នុងនោះ លោកជំទាវរដ្ឋលេខាធិការ បានណែនាំឱ្យសមាជិក សមាជិកានៃគណៈកម្មការ និងអនុគណៈកម្មាការទាំងអស់ សហការគ្នាឱ្យបានជិតស្និទ្ធជាមួយភាគីពាក់ព័ន្ធ ផ្តល់ព័ត៌មានទៅវិញទៅមកឱ្យបានគ្រប់ជ្រុងជ្រោយ ជាពិសេស ត្រូវអនុវត្តតាមតួនាទី និងភារកិច្ចដែលថ្នាក់ដឹកនាំបានប្រគល់ជូន សំដៅធានាឱ្យការរៀបចំពិធី អាចប្រព្រឹត្តទៅបានដោយរលូន ទៅតាមផែនការដែលបានគ្រោងទុក។ ទន្ទឹមនេះ លោកជំទាវរដ្ឋលេខាធិការ បានថ្លែងអំណរគុណ និងកោតសរសើរដល់ក្រុមការងារសមាគមនារីក្រសួង ដែលបានខិតខំប្រឹងប្រែងបំពេញការងារប្រកបដោយឆន្ទៈ ក្នុងការអនុវត្តផែនការសកម្មភាពការងារកន្លងមក និងបានណែនាំឱ្យតំណាងជាស្ត្រីគ្រប់អគ្គនាយកដ្ឋាន នាយកដ្ឋាន និងអង្គភាពក្រោមឱវាទក្រសួង រៀបចំបូកសរុបរបាយការណ៍លទ្ធផលការងារឱ្យបានរួចរាល់ ដើម្បីត្រៀមបង្ហាញក្នុងឱកាសនៃការប្រារព្ធពិធីអបអរសាទរខួបលើកទី១១៣ នៃទិវាអន្តរជាតិនារី នេះដែរ។ អង្គប្រជុំបានឯកភាពលើការចាក់បញ្ចាំងវីដេអូខ្លីស្ដីពី លទ្ធផលការងាររបស់មន្ត្រីជានារី ព្រមទាំងមានការផ្ដល់នូវវត្ថុអនុស្សាវរីយ៍ ជូនដល់លោកជំទាវជាថ្នាក់ដឹកនាំ លោកស្រី អ្នកនាងកញ្ញា មន្ត្រីរាជការជាស្រ្តី នៅថ្ងៃពិធី ដែលនឹងប្រារព្ធឡើងនៅថ្ងៃព្រហស្បតិ៍ ទី៧ ខែមីនា ឆ្នាំ២០២៤ ក្នុងទីស្តីការក្រសួង ក្រោមអធិបតីភាពដ៏ខ្ពង់ខ្ពស់ សម្ដេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ និងជាប្រធានសមាគមនារីកម្ពុជាដើម្បីសន្តិភាព និងអភិវឌ្ឍន៍៕