ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន និងជាអនុប្រធានអចិន្ត្រៃយ៍គណៈកម្មាធិការជាតិសុវត្ថិភាពចរាចរណ៍ផ្លូវគោកបានប្តេជ្ញាថា នឹងបន្តខិតខំបន្ថែមទៀត ក្នុងការរួមចំណែកធ្វើឱ្យប្រសើរឡើងនូវសុវត្ថិភាពចរាចរណ៍នៅកម្ពុជា តាមរយៈការសាងសង់ កែលម្អ លើកកម្រិតគុណភាពសុវត្ថិភាពផ្លូវថ្នល់ បទដ្ឋានគតិយុត្ត និងការគ្រប់គ្រងការងារ និងមធ្យោបាយដឹកជញ្ជូនទាំងផ្លូវគោក ផ្លូវទឹក និងកំពង់ផែ។ ការថ្លែងប្ដេជ្ញារបស់ឯកឧត្ដមអនុប្រធានអចិន្ត្រៃយ៍គណៈកម្មាធិការជាតិសុវត្ថិភាពចរាចរណ៍ផ្លូវគោកបែបនេះ ក្នុងកិច្ចប្រជុំបូកសរុបលទ្ធផលការងារសុវត្ថិភាពចរាចរណ៍ផ្លូវគោកប្រចាំឆ្នាំ២០២៣ និងលើកទិសដៅការងារឆ្នាំ២០២៤ នាព្រឹកថ្ងៃទី០៧ ខែកុម្ភៈ ឆ្នាំ២០២៤ នៅទីស្ដីការក្រសួងសាធារណការ និងដឹកជញ្ជូន ដោយមានការអញ្ជើញចូលរួមពីឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោក(គ.ស.ច.គ.) ឯកឧត្តម លោកជំទាវ ជាអនុប្រធាន សមាជិក សមាជិកា នៃគ.ស.ច.គ. ឯកឧត្តម លោកជំទាវ ជាប្រធានអនុគណៈកម្មការសុវត្ថិភាពចរាចរណ៍ផ្លូវគោក អភិបាលរាជធានី/ខេត្ត ស្នងការ ស្នងការរង មេបញ្ជាការ បញ្ជាការរងកងរាជអាវុធហត្ថ តំណាងមន្ទីរសាធារណការ និងដឹកជញ្ជូន រាជធានី/ខេត្ត តំណាងអង្គការជាតិ/អន្តរជាតិ វិស័យឯកជន និងមន្ត្រីពាក់ព័ន្ធ។ ឯកឧត្តម ប៉េង ពោធិ៍នា មានប្រសាសន៍ថា ក្រសួងនឹងជំរុញបញ្ចប់សេចក្តីព្រាងច្បាប់ចរាចរណ៍ផ្លូវគោកថ្មី និងកៀរគរឱ្យអស់លទ្ធភាពនូវធនធានសម្រាប់អនុវត្តន៍សកម្មភាពការងារឱ្យបានជោគជ័យ ក្នុងការកាត់បន្ថយចំនួនអ្នកស្លាប់និងរបួស និងផលប៉ះពាល់ពីគ្រោះថ្នាក់ចរាចរណ៍ឱ្យនៅកម្រិតទាបបំផុត។ ឯកឧត្ដមរដ្ឋមន្រ្ដីបានគូសបញ្ជាក់ថា ទន្ទឹមនេះ ក្រសួងបាននិង បន្តជំរុញការជួសជុលថែទាំអភិវឌ្ឍន៍ផ្លូវថ្នល់ ការសាងសង់ផ្លូវល្បឿនលឿន ផ្លូវដែក និងផ្លូវ ទឹកឱ្យស្របតាមកំណើនយានជំនិះ ដើម្បីកាត់បន្ថយការកកស្ទះ និងគ្រោះថ្នាក់ចរាច។ ឯកឧត្ដមរដ្ឋមន្រ្ដីបានបន្ថែមថា ជាមួយនឹងការខិតខំនេះ ក្រសួងក៏នឹងបន្តសហការជាមួយ ក្រសួងមហាផ្ទៃ ក្នុងការអភិវឌ្ឍការងារពាក់ព័ន្ធតាមប្រព័ន្ធបច្ចេកវិទ្យាទំនើប ក្នុងនោះមាន កម្មវិធីដកពិន្ទុបណ្ណបើកបរឱ្យកាន់តែមានប្រសិទ្ធភាព និងតម្លាភាព។ សូមជម្រាបជូនថា តាមរបៀបវារៈដែលបានគ្រោងទុក នៅក្នុងកិច្ចប្រជុំបូកសរុបលទ្ធផលការងារសុវត្ថិភាពចរាចរណ៍ផ្លូវគោកប្រចាំឆ្នាំ២០២៣ និងលើកទិសដៅការងារឆ្នាំ២០២៤ រួមមាន៖ ១- របាយការណ៍សង្ខេបបូកសរុបលទ្ធផលការងារឆ្នាំ២០២៣ និងលើកទិសដៅការងារបន្តឆ្នាំ២០២៤ ដោយ លោកជំទាវ មឹន មាណវី រដ្ឋលេខាធិការក្រសួងសាធារណការ និងដឹកជញ្ចូន និងជាអគ្គលេខាធិការ នៃអគ្គលេខាធិការដ្ឋានគ.ស.ច.គ។ ២- ប្រកាសជាផ្លូវការសេចក្តីសម្រេចស្តីពីការតែងតាំងសមាសភាព អនុគណៈកម្មការទី១ ទី២ និង អគ្គលេខាធិការដ្ឋាន នៃគ.ស.ច.គ. ដោយ ឯកឧត្តម នាយឧត្តមសេនីយ៍ ហ៊ឹម យ៉ាន រដ្ឋលេខាធិការក្រសួងមហាផ្ទៃ និងជាអគ្គលេខាធិការរង នៃអគ្គលេខាធិការដ្ឋានគ.ស.ច.គ។ ៣- ចំណាប់អារម្មណ៍របស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ និងជាប្រធានអនុគណៈកម្មការទី២ លើលទ្ធផលនៃការរឹតបន្តឹង ការអនុវត្តច្បាប់ស្តីពីចរាចរណ៍ផ្លូវគោក ឆ្នាំ២០២៣។ ៤- បទអន្តរាគមន៍ស្តីពី បញ្ហាប្រឈម ដំណោះស្រាយ និងសំណូមពរ ក្នុងការទប់ស្កាត់ កាត់បន្ថយគ្រោះថ្នាក់ចរាចរណ៍ពិសេសពេលយប់ ដោយឯកឧត្តមអភិបាលរង នៃគណៈអភិបាលរាជធានីភ្នំពេញ។ ៥- ចំណាប់អារម្មណ៍របស់ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន និងជាអនុប្រធានអចិន្ត្រៃយ៍ គ.ស.ច.គ. លើលទ្ធផលការងារសុវត្ថិភាពចរាចរណ៍ផ្លូវគោកឆ្នាំ២០២៣ និងការលើកទិសដៅការងារឆ្នាំ២០២៤។ ៦- ការដាក់ចេញនូវអនុសាសន៍ណែនាំរបស់ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានគ.ស.ច.គ។ ៧- ពិធីចែកប្រគល់បណ្ណសរសើរ លិខិតសរសើរ ដល់ក្រសួង ស្ថាប័ន អង្គភាព ដៃគូអភិវឌ្ឍន៍ និងវិស័យឯកជន ដែលមានស្នាដៃល្អក្នុងការចូលរួមរក្សាសុវត្ថិភាពចរាចរណ៍ផ្លូវគោក ប្រចាំឆ្នាំ២០២៣៕