កិច្ចប្រជុំពិភាក្សាលើលទ្ធផលការសិក្សាសមិទ្ឋិលទ្ធភាពដំបូងនៃគម្រោងការអភិវឌ្ឍទីក្រុងកាបូនទាប-ការលើកកម្ពស់ការទទួលបានសេវាប្រកបដោយចីរភាពនៅក្នុងក្រុង ខេត្តបាត់ដំបង៖ ថ្ងៃសុក្រ ១រោច ខែស្រាពណ៍ ឆ្នាំថោះ បញ្ចស័ក ព.ស ២៥៦៧ ត្រូវនឹងថ្ងៃទី១ ខែកញ្ញា ឆ្នាំ២០២៣ លោកអគ្គនាយករង ចៅ សុភ:ភិបាល តំណាងឯកឧត្តម សួន ភារិទ្ធ អគ្គនាយក នៃអគ្គនាយកដ្ឋានប្រព័ន្ធចម្រោះទឹកកខ្វក់ ក្រសួងសាធារណការ និងដឹកជញ្ជូន និងលោក នូ ចំរើន អភិបាលរងក្រុងបាត់ដំបង បានអញ្ជើញជាសហប្រធានដឹកនាំកិច្ចប្រជុំពិភាក្សាលើលទ្ធផលការសិក្សាសមិទ្ឋិលទ្ធភាពដំបូងនៃគម្រោងការអភិវឌ្ឍទីក្រុងកាបូនទាប-ការលើកកម្ពស់ ការទទួលបានសេវាប្រកបដោយចីរភាពនៅក្នុងក្រុងបាត់ដំបង ដោយមានចូលរួមពីតំណាងអគ្គនាយកដ្ឋានប្រព័ន្ធចម្រោះទឹកកខ្វក់ រដ្ឋបាលក្រុងបាត់ដំបង មន្ទីរសាធារណការ និងដឹកជញ្ជូនខេត្តបាត់ដំបង ទីប្រឹក្សាគម្រោងវិទ្យាស្ថានអភិវឌ្ឈន៍បៃតងសកល (GGGI) និងមន្រ្តីជំនាញពាក់ព័ន្ធផងដែរ។ គម្រោងនេះរៀបចំឡើងក្នុងគោលបំណង ១) ណែនាំគោលគំនិតសេដ្ឋកិច្ចចក្រា (Circular Economy) លើការគ្រប់គ្រងប្រព័ន្ធសំណល់រឹងក្នុងក្រុង ២) កំណត់គម្លាតក្នុងការអនុវត្តការគ្រប់គ្រងទឹកកខ្វក់ និងប្រព័ន្ធសំណល់រឹង ៣) អភិវឌ្ឍគម្រោងឆ្លើយតបនឹងតម្រូវជាក់ស្តែងថ្នាក់ក្រុង ស្រុក និង ៤) ពិភាក្សាជាមួយភាគីពាក់ព័ន្ឋទាំងវិស័យសាធារណ: និងឯកជន ប្រតិបត្តិករ។ ជាលទ្ធផល អង្គប្រជុំបានគាំទ្រលើលទ្ធផលនៃការសិក្សាបឋម និងបានស្នើឱ្យបន្តជំហានសិក្សាបន្តបន្ទាប់លម្អិតមុនស្នើសុំយោបល់ថ្នាក់ដឹកនាំស្ថាប័ន សំដៅឈានដល់ការអនុវត្តគម្រោងឆ្នាំ២០២៥ និងស្នើឱ្យទីប្រឹក្សា GGGI សិក្សាបន្ថែមបង្កើតយន្តការ និង/ឬ នីតិវិធីលើការធ្វើប្រតិបត្តិការ និងថែទាំសម្រាប់គម្រោងឱ្យមានប្រសិទ្ធភាព ប្រសិទ្ធផល និងចីរភាព។ សូមជម្រាបជូនថា៖ ក្រសួងសាធារណការ និងដឹកជញ្ជូន បានសហការជាមួយវិទ្យាស្ថានអភិវឌ្ឈន៍បៃតងសកល (GGGI) ចុះសិក្សាពីលទ្ធភាពក្នុងការអភិវឌ្ឍវិស័យគ្រប់គ្រងទឹកកខ្វក់ និងប្រព័ន្ធសំណល់រឹង ដោយបានកំណត់ក្រុងបាត់ដំបង និងទីប្រជុំស្រុកមោងឫស្សី ជាក្រុង និងស្រុកគោលដៅ សម្រាប់ការសិក្សាប្រមូលធាតុចូលក្រោមជំនួយឥតសំណងរបស់សាធារណរដ្ឋកូរ៉េ៕