កណ្តាល៖ ទេសរដ្ឋមន្រ្តី រដ្ឋមន្ដ្រីក្រសួងសាធារណការ និងដឹកជញ្ជូន លោក ស៊ុន ចាន់ថុល បានលើកឡើងថា ផ្លូវល្បឿនលឿនភ្នំពេញ-ក្រុងបាវិតនេះ រំពឹងថានឹងចូលរួមជួយសម្រាលបន្ទុកចរាចរណ៍ លើផ្លូវជាតិលេខ១ ដែលកំពុងមានកំណើនចរាចរណ៍ដ៏មមាញឹក និងមានហានិភ័យខ្ពស់ នៃគ្រោះថ្នាក់ចរាចរណ៍។ លោក ស៊ុនចាន់ថុល ថ្លែងដូចនេះក្នុងពិធីប្រកាសបើកការដ្ឋានជាផ្លូវការ គម្រោងសាងសង់ផ្លូវល្បឿនលឿន តភ្ជាប់ពីរាជធានីភ្នំពេញ នៅព្រឹកថ្ងៃទី៧ ខែមិថុនា ឆ្នាំ២០២៣។ លោកបានឱ្យដឹងថា ផ្លូវល្បឿនលឿននេះនឹងជួយកាត់បន្ថយពេលវេលាធ្វើដំណើរ មកត្រឹមប្រមាណ ១ម៉ោងកន្លះ ដែលកន្លងមកត្រូវប្រើប្រាស់ពេលវេលាប្រមាណ ៤ម៉ោង សម្រាប់រថយន្តទេសចរណ៍ និងប្រមាណ ៥-៦ម៉ោងសម្រាប់រថយន្តកុងតឺន័រ។ លោកក៏បានបន្ថែមឱ្យដឹងទៀតថា ផ្លូវល្បឿនលឿននេះ នឹងជួយជំរុញឱ្យមានកំណើនវិនិយោគ ពាណិជ្ជកម្ម និងទេសចរណ៍នៅរាជធានីភ្នំពេញ ក្រុងថ្មីអរិយក្សត្រ នៃខេត្តកណ្តាល ខេត្តព្រៃវែង ខេត្តស្វាយរៀង និងក្រុងបាវិត ជាពិសេសសកម្មភាពពាណិជ្ជកម្ម ទេសចរណ៍ និងការដឹកជញ្ជូន ឆ្លងកាត់ព្រំដែនទ្វេភាគី រវាងប្រទេសកម្ពុជា-វៀតណាម ក្នុងក្របខណ្ឌអាស៊ាន និងមហាអនុតំបន់មេគង្គជាដើម។ គម្រោងសាងសង់ផ្លូវល្បឿនលឿនភ្នំពេញ-ក្រុងបាវិត គ្រោងចំណាយថវិកាវិនិយោគសរុបប្រមាណ ១,៣៥ពាន់លានដុល្លារអាមេរិក មានប្រវែងសរុប ១៣៥,១០គីឡូម៉ែត្រ មានចំណុចចាប់ផ្តើមពីឃុំថ្មគរ ស្រុកល្វាឯម ខេត្តកណ្តាល ទៅដល់សង្កាត់ច្រកម្ទេស ក្រុងបាវិត ខេត្តស្វាយរៀង។ ដោយឡែក ស្ពានឆ្លងកាត់ទន្លេមេគង្គ គ្រោងចំណាយថវិកាសរុបប្រមាណ ២៣២,៥៨លានដុល្លារអាមេរិក ដែលជាថវិកាវិនិយោគរបស់រាជរដ្ឋាភិបាល។ គម្រោងទាំងមូលនេះនឹងត្រូវអនុវត្តដោយក្រុមហ៊ុនសាជីវកម្មស្ពាន និងថ្នល់ចិន (CRBC) គ្រោងប្រើប្រាស់រយៈពេលសាងសង់ចំនួន ៤៨ខែ ដែលរំពឹងថានឹងបញ្ចប់នៅក្នុងអំឡុងឆ្នាំ២០២៧។ ក្រសួងសាធារណការ និងដឹកជញ្ជូន បញ្ចាក់ថា កម្ពុជាបោះជំហានទី២ ក្នុងវិស័យផ្លូវល្បឿនលឿន ដោយផ្សារភ្ជាប់នឹងផ្លូវក្រវ៉ាត់ក្រុងទី៣ ជាមួយទុនវិនិយោគសរុបជាង ១,៥៨ពាន់លានដុល្លារ រំពឹងថានឹងលើកកម្ពស់ភាពប្រទាក់ក្រឡាក្នុងផ្ទៃប្រទេស ជំរុញការតភ្ជាប់ក្នុងក្របខណ្ឌអាស៊ាន និងមហាអនុតំបន់មេគង្គ៕