ពិធីចុះអនុស្សារណៈនៃការយោគយល់ (MoU) លើគម្រោងការងារផ្គត់ផ្គង់សម្ភារ និងបរិក្ខាវេជ្ជសាស្រ្ត សម្រាប់បំពាក់ក្នុងមន្ទីរពេទ្យតេជោសែនកោះធំ ដែលគ្រោងនឹងបើកសម្ពោធជាផ្លូវការនាដើមខែសីហាខាងមុខ ទីស្តីការក្រសួង៖ នារសៀលថ្ងៃអង្គារ ១២រោច ខែពិសាខ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី១៦ ខែឧសភា ឆ្នាំ២០២៣ ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន រួមជាមួយតំណាងសប្បុរសជនបរទេស បានអញ្ជើញចុះហត្ថលេខាលើអនុស្សារណៈនៃការយោគយល់ (MoU) នៃគម្រោងការងារផ្គត់ផ្គង់សម្ភារ និងបរិក្ខារវេជ្ជសាស្រ្ត គ្រោងសម្រាប់បំពាក់ក្នុងមន្ទីរពេទ្យតេជោសែនកោះធំ ដោយមានការចូលរួមពី ឯកឧត្តមសាស្រ្តាចារ្យវេជ្ជបណ្ឌិត អគ្គនាយកមន្ទីរពេទ្យកាល់ម៉ែត ថ្នាក់ដឹកនាំក្រសួង តំណាងសប្បុរសជន និងមន្ត្រីពាក់ព័ន្ធ។ បន្ទាប់ពីចុះហត្ថលេខាលើអនុស្សារណៈនៃការយោគយល់រួចរាល់ អ្នកតំណាងសប្បុរសជន បានធ្វើបទបង្ហាញជូនអង្គពិធី ឱ្យបានជ្រាបពីបច្ចុប្បន្នភាពនៃ មន្ទីរពេទ្យតេជោសែនកោះធំ ដែលបានសាងសង់រួចរាល់ នៅរង់ចាំតែការបំពាក់សម្ភារ និងបរិក្ខារវេជ្ជសាស្រ្តផ្នែកខាងក្នុង ហើយរំពឹងថានឹងអាចរៀបចំប្រារព្ធពិធីសម្ពោធដាក់ឱ្យប្រើប្រាស់ជាផ្លូវការ នៅដើមខែសីហា ឆ្នាំ២០២៣ ខាងមុខនេះ។ លើសពីការបំពាក់សម្ភារ និងបរិក្ខារវេជ្ជសាស្រ្តសំបូរបែបគ្រប់គ្រាន់ ស្របទៅតាមស្តង់ដារថ្នាក់ជាតិ មន្ទីរពេទ្យតេជោសែនកោះធំ នឹងក្លាយជាមន្ទីរពេទ្យទំនើបមួយក្នុងតំបន់ ជាមួយនឹងការបំពាក់ប្រព័ន្ធបច្ចេកវិទ្យាទំនើប Hospital Information System (HIS) សម្រាប់គ្រប់គ្រងសម្ភារ បរិក្ខារ ឱសថ និងទិន្នន័យព័ត៌មានរបស់អ្នកជំងឺ ដែលត្រូវបានសិក្សា និងអភិវឌ្ឍដោយ អគ្គនាយកដ្ឋានបច្ចេកវិទ្យា និងទំនាក់ទំនងសាធារណៈ នៃក្រសួងសាធារណការ និងដឹកជញ្ជូនផងដែរ៕