(ភ្នំពេញ)៖​ លោកទេសរដ្ឋមន្ត្រី​ ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន នាព្រឹកថ្ងៃទី០៥​ ខែឧសភា​ ឆ្នាំ២០២៣នេះ​ បានអនុញ្ញាតិឱ្យគណៈប្រតិភូ វិទ្យាស្ថានកំណើនបៃតងសកល(GGGI) ដឹកនាំដោយលោកបណ្ឌិត Frank Rijsberman អគ្គនាយក ចូលជួបសម្តែងការគួរសម និងពិភាក្សាការងារ​ ដោយមានការចូលរួមផងដែរពីលោក​ លោកស្រីជាថ្នាក់ដឹកនាំ និងមន្ត្រីពាក់ព័ន្ធជាច្រេីនរូបទៀត។ ជំនួបពិភាក្សានេះបានផ្តោតលើ កិច្ចសហប្រតិបត្តិការការងារកន្លងមករវាងក្រសួងសាធារណការ និងដឹកជញ្ជូន ជាមួយនិងវិទ្យាស្ថានកំណើនបៃតងសកល និងទិសដៅអនុវត្តបន្ត។ ថ្លែងនៅក្នុងជំនួបពិភាក្សាការងារនាឱកាសនេះ លោកបណ្ឌិត Frank Rijsberman បានគោរពថ្លែងអំណរគុណ លោកទេសរដ្ឋមន្ត្រី ដែលបានផ្តល់ទីតាំងនៅក្នុងក្រសួង ដើម្បីឱ្យវិទ្យាស្ថានអាចរៀបចំជាការិយាល័យ សម្រាប់បំពេញការងារទាក់ទងនឹងការសម្របសម្រួលគម្រោងនានា។ បន្ថែមពីលើនេះលោកបណ្ឌិត បានឱ្យដឹងពីគម្រោង ដែលវិទ្យាស្ថានកំពុងអនុវត្ត និងគម្រោងដែលគ្រោងនឹងអនុវត្ត នៅក្នុងប្រទេសកម្ពុជា ជាពិសេសគឺគម្រោងសិក្សាទាក់ទងនឹង ការដឹកជញ្ជូនបៃតង ការគ្រប់គ្រងកាកសំណល់ និងការលើកកម្ពស់សុខភាពអនាម័យក្នុងការស់នៅ​ និងបានអះអាងថាវិ​ទ្យាស្ថានកំណើនបៃតងសកល (Global Green Growth Institute - GGGI) នៅតែបន្តការគាំទ្ររាជរដ្ឋាភិបាល ក្នុងចលនាឆ្ពោះទៅរកកំណើនសេដ្ឋកិច្ចដែលគិតគូរដល់បរិស្ថាន ប្រកបដោយបរិយាបន្ន និងនិរន្តរភាពចំពោះគម្រោងទាក់ទងនឹងការដឹកជញ្ជូនបៃតង ដែលជួយកាត់បន្ថយការបំភាយឧស្ម័ន​ GGGI ទើបបានបញ្ចប់ការសិក្សាសមិទ្ធិលទ្ធភាពបឋម (Pre-feasibility Study) សេវាដឹកជញ្ជូនសាធារណៈ ដោយប្រើប្រាស់រថយន្តក្រុងអគ្គិសនី(E-Bus) ហើយលទ្ធផលនៃការសិក្សាបានបង្ហាញថា គម្រោងនេះគឺអាចប្រព្រឹត្តទៅបាន ដោយមិនមានបញ្ហាចោទឡើយ។ លោកបានបន្ថែមថា​ ចំពោះយុទ្ធសាស្ត្រជាតិស្តីពីការគ្រប់គ្រង និងប្រតិបត្តិការសេវាដឹកជញ្ជូនសាធារណៈ ដោយប្រើប្រាស់រថយន្តក្រុងអគ្គិសនី(E Bus) នៅក្នុងក្រុងសៀមរាប គឺកំពុងត្រូវបានសិក្សាបន្ថែមផងដែរ ហើយករណីសិក្សានេះ នឹងត្រូវយកទៅធ្វើគម្រូ សម្រាប់ក្រុងផ្សេងៗទៀត ប្រសិនបើការសិក្សាសម្រេចបានលទ្ធផលជោគជ័យតាមការគ្រោងទុក។ ដោយឡែក ការគ្រប់គ្រងកាកសំណល់ និងការលើកកម្ពស់សុខភាពអនាម័យក្នុងការស់នៅ GGGI នឹងនាំយកបច្ចេកវិទ្យាទំនើបក្នុងការប្រមូល និងគ្រប់គ្រងកាកសំណល់ ដែលមានសមត្ថភាពអាចអនុវត្តបានពី ១០០០ ទៅ ១០ ០០០ ខ្នងផ្ទះក្នុងមួយថ្ងៃផងដែរ។ ថ្លែងនាឱកាសនោះដែរលោកទេសរដ្ឋមន្ត្រី ស៊ុន​ ចាន់ថុល​ក៏បានថ្លែងនូវអំណរគុណ និងសម្តែងនូវបីតិសោមនស្សចំពោះវិទ្យាស្ថាន GGGI ដែលបានចូលរួមជាមួយរាជរដ្ឋាភិបាល ក្នុងការអនុវត្តការសិក្សាស្រាវជ្រាវលើទិដ្ឋភាពផ្សេងៗនៃទ្រឹស្តីកំណើនបៃតង ដើម្បីលើកកម្ពស់កំណើនសេដ្ឋកិច្ចជាតិ ក្នុងលក្ខខណ្ឌគិតគូរពីបរិស្ថាន ដែលប្រកបដោយចីរភាព។ លោកទេសរដ្ឋមន្ត្រី ក៏បានសម្តែងនូវសុទិដ្ឋនិយម និងឆន្ទៈក្នុងការគាំទ្រ លើរាល់សកម្មភាពដែលវិទ្យាស្ថានកំពុង ក៏ដូចជាគ្រោងនឹងអនុវត្តនាពេលអនាគត នៅក្នុងប្រទេសកម្ពុជាផងដែរ៕