សិក្ខាសាលាផ្សព្វផ្សាយសៀវភៅគម្រោងកម្មវិធីវិនិយោគសាធារណ: (ក.វ.ស) ៣ឆ្នាំរំកិល ឆ្នាំ២០២៣-២០២៥ និងការរៀបចំគម្រោងបណ្តុះបណ្តាលសម្រាប់រៀបចំកម្មវិធីវិនិយោគសាធារណៈ(ក.វ.ស) ៣ឆ្នាំរំកិល ២០២៤-២០២៦ ទីស្តីការក្រសួង៖ ថ្ងៃអង្គារ ៦កើត ខែពិសាខ ឆ្នាំថោះ បញ្ចស័ក ព.ស ២៥៦៦ ត្រូវនឹងថ្ងៃទី២៥ ខែមេសា ឆ្នាំ២០២៣ លោកជំទាវ ម៉ម រមនា រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញជា អធិបតីក្នុងពិធីបើកសិក្ខាសាលាផ្សព្វផ្សាយសៀវភៅគម្រោងកម្មវិធីវិនិយោគសាធារណ: (ក.វ.ស) ៣ឆ្នាំ រំកិល ឆ្នាំ២០២៣-២០២៥ និងការរៀបចំគម្រោងបណ្តុះបណ្តាលសម្រាប់ការរៀបចំកម្មវិធីវិនិយោគ សាធារណៈ(ក.វ.ស) ៣ឆ្នាំរំកិល ២០២៤-២០២៦ ដោយមានការអញ្ជើញចូលរួមពីមន្ត្រីមកពីអង្គភាព ក្រោមឱវាទក្រសួង ថ្នាក់ជាតិ ថ្នាក់ក្រោមជាតិ និងវាគ្មិនធ្វើបទបង្ហាញ ពីតំណាងនាយកដ្ឋានផែនការ វិនិយោគសាធារណៈរបស់ក្រសួងផែនការផងដែរ។ កម្មវិធីនេះត្រូវបានរៀបចំឡើងក្នុងគោលបំណងផ្សព្វផ្សាយសៀវភៅគម្រោងកម្មវិធីវិនិយោគសាធារណ: (ក.វ.ស) ៣ឆ្នាំរំកិល ឆ្នាំ២០២៣-២០២៥ និងការរៀបចំគម្រោងបណ្តុះបណ្តាលដល់មន្ត្រីជនបង្គោល លើការរៀបចំធាតុចូល និងធ្វើបច្ចុប្បន្នភាពសម្រាប់ការងារកម្មវិធីវិនិយោគសាធារណៈ(ក.វ.ស) ៣ឆ្នាំរំកិល ២០២៤-២០២៦។ ថ្លែងទៅកាន់អង្គពិធីនាឱកាសនោះ លោកជំទាវរដ្ឋលេខាធិការ បានជំរុញលើកទឹកចិត្តឱ្យបណ្តាអង្គភាព ក្រោមឱវាទក្រសួង និងអង្គភាពអនុវត្តគម្រោងហិរញ្ញប្បទានបរទេសទាំងអស់ពិនិត្យដាក់បញ្ចូលគម្រោង កំពុងដំណើរការ គម្រោងមានកិច្ចសន្យា និងគម្រោងអាទិភាពនានាដើម្បីរកប្រភពថវិកា ពិសេសប្រភពពី ដៃគូអភិវឌ្ឍនានា។ គួរកត់សម្គាល់ថា៖ កម្មវិធីវិនិយោគសាធារណៈ(ក.វ.ស) បីឆ្នាំរំកិល ២០២៤-២០២៦ គឺជាបណ្តាគម្រោង និងសកម្មភាពអាទិភាពខ្ពស់របស់រាជរដ្ឋាភិបាលកម្ពុជា ដោយមានកំណត់តម្លៃ ពេលវេលា និងប្រភព ថវិកាច្បាស់លាស់សម្រាប់អនុវត្តផែនការយុទ្ធសាស្រ្តអភិវឌ្ឍន៍ជាតិ (ផ.យ.អ.ជ.) និងត្រូវប្រើប្រាស់ជាធាតុ ចូលក្នុងការរៀបចំថវិកាជាតិប្រចាំឆ្នាំ ជាពិសេសការអនុវត្តថវិកាកម្មវិធី ដើម្បីធានាបាននូវសុខដុមនីយកម្ម ការងារផែនការចំណាយវិនិយោគរបស់រដ្ឋ និងហិរញ្ញប្បទានសហប្រតិបត្តិការពីបណ្តាដៃគូរអន្តរជាតិ៕