កិច្ចប្រជុំពិភាក្សាពីគម្រោងអភិវឌ្ឍន៍ប្រព័ន្ធចម្រោះទឹកកខ្វក់នៅក្នុងក្រុងតាខ្មៅ សម្រាប់ជំហានទី២ ទីស្ដីការក្រសួង៖ កាលពីព្រឹកថ្ងៃចន្ទ ៥កើត ខែពិសាខ ឆ្នាំថោះ បញ្ចស័ក ព.ស.២៥៦៦ ត្រូវនឹងថ្ងៃទី២៤ ខែមេសា ឆ្នាំ២០២៣ ឯកឧត្តម រស់ វណ្ណា បានដឹកនាំកិច្ចប្រជុំជាមួយតំណាងធនាគារនីហរ័ណ-អាហរ័ណកូរ៉េ (Export-Import Bank of Korea) ដើម្បីពិភាក្សាពីគម្រោងអភិវឌ្ឍន៍ប្រព័ន្ធចម្រោះទឹកកខ្វក់នៅក្នុងក្រុងតាខ្មៅសម្រាប់ជំហានទី២ ដោយក្នុងនោះក៏មានការចូលរួមពីថ្នាក់ដឹកនាំទទួលបន្ទុក និងមន្ត្រីបច្ចេកទេសជំនាញជាច្រើនរូប។ កិច្ចប្រជុំនេះត្រូវបានរៀបចំឡើងក្នុងគោលបំណងដើម្បីពិភាក្សាអំពីតម្រូវការជាធាតុចូលសម្រាប់ការត្រៀម និងរៀបចំឯកសារក្នុងការលើកគម្រោងអភិវឌ្ឍន៍ប្រព័ន្ធចម្រោះទឹកកខ្វក់នៅក្នុងក្រុងតាខ្មៅ (ជំហានទី២) ក្នុងនោះបានពិភាក្សាពីស្ថានភាព និងវឌ្ឍនភាពរបស់គម្រោងផ្សេងៗ ដែលស្ថិតក្រោមឥណទានសម្បទានរបស់ដៃគូអភិវឌ្ឍន៍នានា ព្រមទាំងពិនិត្យលើស្ថានភាពប្រព័ន្ធបង្ហូរទឹកភ្លៀង (លូ ប្រឡាយ ទ្វារទឹក ស្ថានីយបូម) និងផែនការពាក់ព័ន្ធនឹងការអភិវឌ្ឍផងដែរ។ ក្នុងកិច្ចប្រជុំនេះក៏បានពិភាក្សាអំពីវឌ្ឍនភាពនៃគម្រោងអភិវឌ្ឍន៍ប្រព័ន្ធចម្រោះទឹកកខ្វក់នៅក្នុងក្រុងតាខ្មៅ (ជំហានទី១) ដោយក្រុមការងារបានសម្រេចកំណត់លើពេលវេលា និងតម្រូវការឯកសារចាំបាច់ មុនពេលតំណាងធនាគារចុះបេសកកម្មវាយតម្លៃលើសំណើសុំឥណទានបន្ថែម (Supplementary Loan Financing) វឌ្ឍនភាពការងារដោះស្រាយផលប៉ះពាល់ និងវឌ្ឍនភាពលើការផ្ទៀងផ្ទាត់របាយការណ៍ Full ESIA ដោយក្រសួងបរិស្ថាន៕