រាជធានីភ្នំពេញ៖ គណៈប្រតិភូថៃមកពីក្រុមហ៊ុនដឹកជញ្ជូនមួយបានបង្ហាញការចាប់អារម្មណ៍ខ្លាំងលើការវិនិយោគក្នុងវិស័យភស្តុភារកម្មរបស់កម្ពុជា។ ការសម្លឹងឃើញឱកាសវិនិយោគនេះ ធ្វើឡើងបន្ទាប់ពីកម្ពុជា តាមរយៈក្រសួងសាធារណការ និងដឹកជញ្ជូន បានប្រកាសពីគម្រោងហេដ្ឋារចនាសម្ព័ន្ធថ្មីៗជាបន្តបន្ទាប់ សម្រាប់បម្រើឱ្យវិស័យភស្តុភារកម្ម ដែលស្ថិតនៅក្រោមផែនការមេភស្តុភារកម្ម សម្រាប់ធ្វើការអនុវត្តក្នុងរយៈពេល១០ឆ្នាំទៅមុខ។ ក្រុមហ៊ុន Logistics Intelligence Cambodia ដែលមានថ្នាក់ដឹកនាំជាជនជាតិថៃ បានបង្ហាញឆន្ទៈខ្ពស់ក្នុងការស្វែងរកឱកាសវិនិយោគក្នុងវិស័យភស្តុភារកម្មនៅកម្ពុជា។ ការបង្ហើបឱ្យដឹងនេះធ្វើឡើងអំឡុងជំនួបរវាងថ្នាក់ដឹកនាំរបស់ក្រុមហ៊ុនដដែល ជាមួយឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន នៅថ្ងៃទី១៩ខែមេសាឆ្នាំ២០២៣។ កម្ពុជាកំពុងទាក់ទាញអ្នកវិនិយោគកាន់តែច្រើនមិនថាតែប្រទេសថៃក្បែរខាង ឬប្រទេសផ្សេងទៀតនោះទេ ឱ្យចាប់អារម្មណ៍មកវិនិយោគក្នុងវិស័យដឹកជញ្ជូន តាមរយៈយុទ្ធសាស្ត្រចម្បងរបស់រាជរដ្ឋាភិបាលកម្ពុជា ក្នុងការលើកកម្ពស់សេដ្ឋកិច្ចជាតិ។ ជាក់ស្តែង មានគម្រោងជាង៣០០ ក្នុងទំហំទឹកប្រាក់ជាង៥០ពាន់លានដុល្លារអាម៉េរិក ត្រូវបានដាក់បញ្ចូលទៅក្នុងផែនការមេភស្តុភារកម្ម សម្រាប់ធ្វើការអនុវត្តក្នុងរយៈពេល១០ឆ្នាំទៅមុខ ដើម្បីឱ្យកម្ពុជាក្លាយទៅជាមជ្ឈមណ្ឌលភស្តុភារកម្ម នៅក្នុងតំបន់។ គួរកត់សម្គាល់ថា កម្ពុជាបាននឹងកំពុងសិក្សាលើគម្រោងហេដ្ឋារចនាសម្ព័ន្ធធំៗជាច្រើន ហើយខ្លះទៀតក៏បានបញ្ចប់ការសិក្សាហើយដែរ។ ក្នុងនោះរួមមាន៖ គម្រោងផ្លូវនាវាចរណ៍ និងប្រព័ន្ធភស្តុភារកម្មទន្លេបាសាក់ ដែលទើបបញ្ចប់ការសិក្សាកាលពីពេលថ្មីៗ ការពង្រីកវិសាលភាពកំពង់ផែទឹកជ្រៅក្នុងក្រុងព្រះសីហនុ និងគម្រោងស្ថាបនាកំពង់ផែពហុបំណងខេត្តកំពតជាដើម។ បន្ថែមពីលើនេះ គម្រោងផ្លូវល្បឿនលឿនភ្នំពេញ-បាវិត គ្រោងបើកការដ្ឋាននៅពាក់កណ្តាលឆ្នាំ២០២៣ គម្រោងផ្លូវល្បឿនលឿនភ្នំពេញ-សៀមរាប កំពុងធ្វើការសិក្សា។ សូមជម្រាបថា ដើម្បីពង្រឹង និងពង្រីកកិច្ចសហប្រតិបត្តិការសេដ្ឋកិច្ចពាណិជ្ជកម្មបន្ថែមទៀតរវាងកម្ពុជា-ថៃ នៅពេលខាងមុខ ភាគីកម្ពុជាបាននឹងកំពុងពន្លឿនការសិក្សា និងស្វែងរកដៃគូវិនិយោគ ដើម្បីលើកកម្រិតផ្លូវរថភ្លើងភ្នំពេញ-ប៉ោយប៉ែត ឱ្យទៅជាផ្លូវរថភ្លើងល្បឿនលឿន ក្រោមការកិច្ចសហការរវាងក្រសួងសាធារណការ និងក្រសួងសេដ្ឋកិច្ច៕