កិច្ចប្រជុំបេសកកម្មវាយតម្លៃបឋម(Pre-Appraisal) នៃគម្រោងកែលម្អការគ្រប់គ្រងសំណល់រឹង និង ផ្លាស្ទិកនៅកម្ពុជា ក្រោមហិរញ្ញប្បទានឥណទានរបស់ធនាគារពិភពលោក ភ្នំពេញ៖ ថ្ងៃសុក្រ ៤រោច ខែមាឃ ឆ្នាំខាល ចត្វាស័ក ព.ស ២៥៦៦ ត្រូវនឹងថ្ងៃទី១០ ខែកុម្ភៈ ឆ្នាំ២០២៣ ឯកឧត្តម កឹម បូរី អនុរដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញដឹកនាំក្រុមការងារ គម្រោងចូលរួមកិច្ចប្រជុំបេសកកម្មវាយតម្លៃបឋម(Pre-Appraisal) នៃគម្រោងកែលម្អការគ្រប់គ្រង សំណល់រឹង និងផ្លាស្ទិកនៅកម្ពុជា ក្រោមហិរញ្ញប្បទានឥណទានរបស់ធនាគារពិភពលោក ដោយមានការចូលរួមពីលោកស្រីKatelijn van den Berg ប្រធានក្រុមការងារធនាគារពិភពលោកប្រចាំកម្ពុជា លោកស្រី Yewande Awe និងលោក Klaus Sattler សហប្រធានក្រុមការងារធនាគារពិភពលោក និងសហការី។ អង្គប្រជុំបានពិភាក្សាយ៉ាងផុលផុសលើរបៀបវារៈសំខាន់ៗមួយចំនួនរួមមាន៖ ១) ការបញ្ចប់លទ្ធផល សូចនាករ និងការរៀបចំធាតុផ្សំសំខាន់ៗនៃសមាសភាគគម្រោងទាំងបី ២) ការបញ្ចប់សកម្មភាពការងារ ការចំណាយផ្សេងៗសម្រាប់សមាសភាគគម្រោងទាំងបីដែលក្នុងនោះមានសមាសភាគនៃគម្រោងការគ្រប់ គ្រងហិរញ្ញវត្ថុ(FM) និងការរៀបចំកញ្ចប់លទ្ធកម្មរួមទាំងផែនការដកសាច់ប្រាក់ និងផែនការលទ្ធកម្ម ៣) ការបញ្ចប់ការរៀបចំការងារអនុវត្តសម្រាប់ភ្នាក់ងារអនុវត្ត (Implementation Agencies) និងភ្នាក់ងារប្រតិបត្តិ ៤) ការបញ្ចប់ឯកសារក្របខ័ណ្ឌបរិស្ថាន និងសង្គម ៥) ការរៀបចំសម្រាប់ការចចារហិរញ្ញប្បទាន និងការកំណត់ពេលវេលាសម្រាប់ការបញ្ចប់ជំហាននៃការរៀបចំគម្រោង ដើម្បីបំពេញលក្ខខណ្ឌវាយតម្លៃ រួមទាំងការបញ្ចប់នៃសៀវភៅណែនាំប្រតិបត្តិការគម្រោង និង ៦)ការពិនិត្យកិច្ចព្រមព្រៀងលើកាលបរិច្ឆេទបណ្តោះអាសន្នសម្រាប់ការចចារគម្រោងផងដែរ។ ថ្លែងទៅកាន់អង្គប្រជុំនាឱកាសនោះ ឯកឧត្តមអនុរដ្ឋលេខធិការ បានថ្លែងអំណរគុណយ៉ាងជ្រាលជ្រៅដល់ក្រុមការងារគម្រោងដែលបានសហការសម្របសម្រួលជាមួយធនាគារពិភពលោក និងភាគីពាក់ព័ន្ធ ក្នុងការជំរុញការរៀបចំគម្រោងនាពេលកន្លងមក ជាពិសេស សហសេវិកធនាគារពិភពលោក ដែលតែងតែ ជួយជ្រោមជ្រែងក្រសួងសាធារណការ និងដឹកជញ្ជូន លើវិស័យគ្រប់គ្រងប្រព័ន្ធចម្រោះទឹកកខ្វក់ និងការគ្រប់គ្រងសំណល់រឹង និងបានថ្លែងអំណរគុណចំពោះក្រុមការងារគ្រប់ផ្នែកពាក់ព័ន្ធទាំងអស់ ដែលបានខិតខំប្រឹងប្រែងប្រកបដោយការប្តេជ្ញាចិត្តខ្លាំងក្លាក្នុងការអនុវត្តកិច្ចការងាររបស់ខ្លួនដោយការទទួលខុសត្រូវខ្ពស់ ធ្វើឱ្យលេចចេញនូវសមិទ្ធផលជាផ្លែផ្កាល្អប្រសើរលើគម្រោងមួយនេះ។ ជាទីបញ្ចប់ ឯកឧត្តមអនុរដ្ឋលេខធិការ បានជំរុញលើកទឹកចិត្តឱ្យក្រុមការងារ និងភាគីពាក់ព័ន្ធបន្តអនុវត្តសកម្មភាពការងារឱ្យមានភាពកាន់តែល្អប្រសើរ និងបន្តរួបរួមគ្នាបំពេញកាតព្វកិច្ចការងារប្រកបដោយការទទួលខុសត្រូវច្បាស់លាស់ និងធ្វើយ៉ាងណាឱ្យលេចចេញនូវផ្លែផ្កាតាមផែនការដែលបានគ្រោងទុក និងធានាបាននូវប្រសិទ្ធភាពប្រកបដោយចីរភាព៕