សិក្ខាសាលាផ្សព្វផ្សាយ និងវគ្គបណ្ដុះបណ្ដាលស្ដីពីការដឹកជញ្ជូនទំនិញគ្រោះថ្នាក់ ទីស្ដីការក្រសួង៖ ថ្ងៃចន្ទ ៨ រោច ខែមាឃ ឆ្នាំខាល ចត្វាស័ក ព.ស ២៥៦៦ ត្រូវនឹងថ្ងៃទី១៣ ខែកុម្ភៈ ឆ្នាំ២០២៣ ឯកឧត្តម វ៉ាស៊ឹម សូរិយា អនុរដ្ឋលេខាធិការក្រសួងសាធារណការ និងដឹកជញ្ជូន បាន អញ្ជើញជាអធិបតីក្នុងកម្មវិធីបើកសិក្ខាសាលាផ្សព្វផ្សាយ និងវគ្គបណ្ដុះបណ្ដាលស្ដីពីការដឹកជញ្ជូនទំនិញគ្រោះថ្នាក់ ដោយមានការអញ្ជើញចូលរួមពីលោក KOBAYASHI  Kenichi ប្រធានទីប្រឹក្សានៃទីភ្នាក់ងារ សហប្រតិបត្តិការអន្តរជាតិជប៉ុន(JICA) ឯកឧត្តម ឈួន វ៉ន់ អគ្គនាយក នៃអគ្គនាយកដ្ឋានដឹកជញ្ជូនផ្លូវគោក តំណាងក្រុមហ៊ុនសមាគមដឹកជញ្ជូន និងអង្គភាពពាក់ព័ន្ធប្រមាណជាង៤០រូប។ សិក្ខាសាលា និងវគ្គបណ្ដុះបណ្ដាលនេះធ្វើឡើងក្នុងគោលបំណងផ្សព្វផ្សាយទស្សនទានទូទៅទាក់ទងនឹងបញ្ញត្តិនានារបស់ប្រទេសសមាជិកអាស៊ានពាក់ព័ន្ធនឹងការដឹកជញ្ជូនទំនិញគ្រោះថ្នាក់តាមផ្លូវថ្នល់ និងដើម្បីបញ្ជ្រាបការយល់ដឹងពីការគ្រប់គ្រងការដឹកជញ្ជូនទំនិញគ្រោះថ្នាក់ ក៏ដូចជាពង្រឹងសមត្ថភាព ដល់មន្ត្រីជំនាញ ក្រុមហ៊ុនសមាគមដឹកជញ្ជូន សំដៅលើកកម្ពស់ការយល់ដឹងអំពីការដឹកជញ្ជូនទំនិញគ្រោះថ្នាក់ឱ្យកាន់តែទូលំទូលាយ។ ថ្លែងក្នុងកម្មវិធីបើកនាឱកាសនោះ ឯកឧត្តមអនុរដ្ឋលេខាធិការ បានលើកឡើងថា៖ ក្រសួងសាធារណការ និងដឹកជញ្ជូន បានកំពុងរៀបចំសេចក្តីព្រាងគោលនយោបាយជាតិស្តីពីការអភិវឌ្ឍវិស័យដឹកជញ្ជូនផ្លូវគោក ផ្លូវទឹក និងផ្លូវដែកកម្ពុជា ប្រកាសស្តីពីការដឹកជញ្ជូនទំនិញគ្រោះថ្នាក់ និងឯកសារគតិយុត្តផ្សេងៗទៀត ដើម្បីគ្រប់គ្រងការដឹកជញ្ជូនទំនិញ និងទំនិញគ្រោះថ្នាក់ឱ្យមានប្រសិទ្ធភាព។ ឯកឧត្តមអនុរដ្ឋលេខាធិការ បានបន្ថែមថា៖ ក្រសួងកំពុងស្វែករកជំនួយថវិកា និងបច្ចេកទេសពីដៃគូអភិវឌ្ឍន៍ និងវិស័យឯកជនដើម្បីជំរុញការងារគ្រប់គ្រងទំនិញគ្រោះថ្នាក់នេះឱ្យកាន់តែមានប្រសិទ្ធភាព និងអនុលោមភាពជាអន្តរជាតិ។ ជាក់ស្តែងនៅថ្ងៃនេះក្រសួងបានរួមសហការជាមួយទីភ្នាក់ងារJICA រៀបចំ សិក្ខាសាលា និងវគ្គបណ្តុះបណ្តាលនេះឡើងក្នុងគោលបំណងដើម្បីផ្សព្វផ្សាយ និងពង្រឹងសមត្ថភាពធនធានមនុស្សលើការដឹកជញ្ជូនទំនិញគ្រោះថ្នាក់។ ឯកឧត្តមអនុរដ្ឋលេខាធិការ បានសម្តែងក្តីសង្ឃឹមយ៉ាងមុតមាំថា៖ សិក្ខាសាលា និងវគ្គបណ្តុះបណ្តាលនេះ នឹងជួយជំរុញឱ្យយើងទាំងអស់គ្នាយកចិត្តទុកដាក់ និងលើកកម្ពស់ការយល់ដឹងអំពីការដឹកជញ្ជូនទំនិញគ្រោះថ្នាក់ឱ្យកាន់តែទូលំទូលាយ ព្រោះការដឹកជញ្ជូនទំនិញគ្រោះថ្នាក់ជាផ្នែកមួយមិនអាចខ្វះបាន ក្នុងវិស័យដឹកជញ្ជូនផ្លូវគោកនៅកម្ពុជា ក៏ដូចជាវិស័យសេដ្ឋកិច្ចទាំងមូលផងដែរ។ ជាទីបញ្ចប់ ឯកឧត្តមអនុរដ្ឋលេខាធិការ បានថ្លែងអំណរគុណយ៉ាងជ្រាលជ្រៅដល់ទីភ្នាក់ងារសហប្រតិបត្តិការអន្តរជាតិJICA ដែលបានគាំទ្រការលើកកម្ពស់ការយល់ដឹងអំពីការដឹកជញ្ជូនទំនិញគ្រោះថ្នាក់ តាមរយៈការរៀបចំសិក្ខាសាលានេះឡើង និងបានសំណូមពរឱ្យគ្រប់ស្ថាប័នពាក់ព័ន្ធទាំងអស់ សហការគ្នាឱ្យកាន់តែខ្លាំងថែមទៀត​ ដើម្បីសម្រេចឱ្យបានការងារដ៏មានសារៈសំខាន់មួយនេះ៕