កិច្ចប្រជុំផ្សព្វផ្សាយផែនការចុះធ្វើអធិការកិច្ចរវាងថ្នាក់ដឹកនាំអគ្គាធិការដ្ឋាន និងបណ្ដាអង្គភាពក្រោមឱវាទក្រសួង ទីស្ដីការក្រសួង៖ ថ្ងៃសុក្រ ៥រោច ខែមាឃ ឆ្នាំខាល ចត្វាស័ក ព.ស ២៥៦៦ ត្រូវនឹងថ្ងៃទី១០ ខែកុម្ភៈ ឆ្នាំ២០២៣ ឯកឧត្តម ប៉េង ពោធិ៍នា រដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំផ្សព្វផ្សាយផែនការការងារចុះធ្វើអធិការកិច្ចរវាងថ្នាក់ដឹកនាំអគ្គាធិការដ្ឋាន និងបណ្ដាអង្គភាពក្រោមឱវាទក្រសួង ដោយមានការចូលរួមពីសំណាក់ថ្នាក់ដឹកនាំក្រសួង ថ្នាក់ដឹកនាំអគ្គាធិការដ្ឋាន សមាជិក សមាជិកា និងបណ្ដាអង្គភាពក្រោមឱវាទក្រសួងប្រមាណជាង ១២០ រូប។ ការផ្សព្វផ្សាយផែនការការងារចុះធ្វើអធិការកិច្ចនេះធ្វើឡើងក្នុងគោលបំណងដើម្បីពិនិត្យនូវបណ្តាវិធានការផ្សេងៗទាក់ទងនឹងការគ្រប់គ្រង ការអនុវត្តតួនាទីភារកិច្ច ការផ្តល់សេវាសាធារណៈ និងការងារសាងសង់ ជួសជុល ថែទាំជាប្រចាំ និងបន្ទាន់របស់ក្រសួងសាធារណការ និងដឹកជញ្ជូន មន្ទីរសាធារណការ និងដឹកជញ្ជូនរាជធានី-ខេត្ត កងវិស្វកម្ម និងអង្គភាពពាក់ព័ន្ធក្នុងកាលបរិច្ឆេទ២០២២ និងបណ្ដាឆ្នាំពាក់ព័ន្ធផងដែរ។ លើកឡើងនាឱកាសនោះ ឯកឧត្ដមរដ្ឋលេខាធិការប្រធានអង្គប្រជុំ បានមានប្រសាសន៍ថា កម្មវិធីប្រតិបត្តិការចុះធ្វើអធិការកិច្ចហិរញ្ញវត្ថុ និងការកសាងផែនការសកម្មភាព គឺផ្អែកទៅលើអនុលោមភាព និងសមិទ្ធកម្មនៃការគ្រប់គ្រងហិរញ្ញវត្ថុសាធារណៈ និងការគ្រប់គ្រងទ្រព្យសម្បត្តិរដ្ឋ នៅគ្រប់អាជ្ញាធរសាធារណៈ។ ឯកឧត្ដមរដ្ឋលេខាធិការ បានសំណូមពរ ព្រមទាំងជំរុញឱ្យថ្នាក់ដឹកនាំគ្រប់អង្គភាពក្រោមឱវាទក្រសួងទាំងអស់សហការគ្នាឱ្យបានជិតស្និទ្ធជាមួយអគ្គាធិការដ្ឋាន ដើម្បីឱ្យការចុះធ្វើអធិការកិច្ច មានលក្ខណៈងាយស្រួលទទួលបានភាពជោគជ័យ និងទទួលបានលទ្ធផលផ្លែផ្កាតាមការគ្រោងទុក៕