កិច្ចប្រជុំជាមួយក្រុមការងារក្រសួងដែនដី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍នៃប្រទេសជប៉ុន អំពីការតាមដាន និងធ្វើបច្ចុប្បន្នភាពការសិក្សាបុរេសមទ្ធិលទ្ធភាពសម្រាប់ការសាងសង់ប្រព័ន្ធទឹកកខ្វក់នៅក្នុងខេត្តសៀមរាប និងខេត្តស្វាយរៀង នៅទីស្ដីការក្រសួង៖ ថ្ងៃពុធ ៤កើត ខែមាឃ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី២៥ ខែមករា ឆ្នា២០២៣ ឯកឧត្តម រស់ វណ្ណា រដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំជាមួយក្រុមការងារក្រសួងដែនដី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍​ នៃប្រទេសជប៉ុន ដើម្បីពិនិត្យ និងពិភាក្សាចំពោះការសិក្សាបុរេសមិទ្ធិលទ្ធភាពសម្រាប់ការសាងសង់ប្រព័ន្ធចម្រោះទឹកកខ្វក់នៅក្នុងខេត្តសៀមរាប និងខេត្តស្វាយរៀង ដោយមានការចូលរួមពីថ្នាក់ដឹកនាំក្រសួងទទួលបន្ទុក និងមន្ត្រីជំនាញបច្ចេកទេស នៃអគ្គនាយកដ្ឋានប្រព័ន្ធចម្រោះទឹកកខ្វក់ ជាច្រើនរូបផងដែរ។ ជាកិច្ចចាប់ផ្ដើម ឯកឧត្តមរដ្ឋលេខាធិការ បានថ្លែងអំណរគុណយ៉ាងជ្រាលជ្រៅដល់រដ្ឋាភិបាល និងប្រជាជនរបស់ប្រទេសជប៉ុនទាំងអស់ ដែលតែងតែយកចិត្តទុកដាក់ជួយកម្ពុជាលើគ្រប់វិស័យ ជាពិសេសការកសាងធនធានមនុស្ស តាមរយៈផ្ដល់ការបណ្ដុះបណ្ដាលទាំងនៅកម្ពុជា និងនៅប្រទេសជប៉ុនផ្ទាល់ផងដែរ ហើយចំពោះវិស័យទឹកកខ្វក់នេះ ក្រុមការងារទាំងពីរបានចុះអនុស្សរណៈនៃការយោគយល់ (MOU) តាំងពីឆ្នាំ២០១៧ ដើម្បីសហការរួមគ្នាលើវិស័យទឹកកខ្វក់នេះផងដែរ។ កិច្ចប្រជុំនេះរៀបចំឡើងដើម្បីពិនិត្យមើលលទ្ធផលនៃការសិក្សាបុរេសមិទ្ធិលទ្ធភាព រួមទាំងការពិនិត្យ និងប្រៀបធៀបចំពោះបច្ចេកទេសប្រព្រឹត្តកម្មច្រោះសម្អាតទឹកកខ្វក់មួយចំនួន សមត្ថភាពចម្រោះសម្អាតទឹកកខ្វក់ និង ការចំណាយចំពោះការសាងសង់ហេដ្ឋារចនាសម្ព័ន្ធ ការធ្វើប្រតិបត្តិការ និងថែទាំប្រព័ន្ធចំពោះបច្ចេកទេសនីមួយៗ ដើម្បីសិក្សាស្វែងរកឱ្យឃើញនូវគុណប្រយោជន៍វិជ្ជមានបច្ចេកទេស ហើយសមស្របទៅតាមស្ថានភាពសេដ្ឋកិច្ចជាតិផងដែរ មុននឹងសម្រេចជ្រើសរើសបច្ចេកទេសណាមួយក្នុងការអភិវឌ្ឍប្រព័ន្ធប្រព្រឹត្តកម្មទឹកកខ្វក់ក្នុងខេត្តសៀមរាប និងខេត្តស្វាយរៀង នេះផងដែរ។ ជាមួយគ្នានោះផងដែរ ក្រុមការងារក្រសួងដែនដី ហេដ្ឋារចនាសម្ព័ន្ធដឹកជញ្ជូន និងទេសចរណ៍ នៃប្រទេសជប៉ុន ក៏បានជម្រាបជូនដំណឹងស្ដីពីការរៀបចំសិក្ខាសាលាអំពីកម្មវិធី WOW TO JAPAN ដែលគ្រោងនឹងរៀបចំឡើងក្នុងខែកុម្ភ:ខាងមុខនេះ ដើម្បីផ្សព្វផ្យាយអំពីការសាងសង់សាងល្បងនូវអាងប្រព្រឹត្តកម្មសហគមន៍ខ្នាតតូចមួយនៅឃុំបាទី ខេត្តតាកែវ ដោយប្រើបច្ចេកវិទ្យា POD និង ដើម្បីបញ្ជ្រាបចំណេះដឹងលើបច្ចេកទេសចម្រោះទឹកកខ្វក់សហគមន៍ខ្នាតតូចបែបនេះ ក៏ដូចជាដើម្បីពិនិត្យលើលក្ខណៈពិសេស ការប្រើប្រាស់ គុណសម្បត្តិ និងប្រសិទ្ធភាពនៃការចម្រោះទឹកកខ្វក់នៃបច្ចេកទេស POD នេះដែលអាចជាលទ្ធភាពសម្រាប់ការអនុវត្តច្រោះសម្អាតទឹកកខ្វក់ក្នុងសហគមន៍តូចៗ ក្នុងប្រទេសកម្ពុជាផងដែរ៕