កិច្ចប្រជុំពិនិត្យវឌ្ឍនភាពនៃការត្រៀមរៀបចំសន្និបាតបូកសរុបលទ្ធផលការងារប្រចាំឆ្នាំ២០២២ និងលើកទិសដៅសកម្មភាពការងារឆ្នាំ២០២៣ របស់ក្រសួងសាធារណការ និងដឹកជញ្ជូន ទីស្ដីការក្រសួង៖ ថ្ងៃសុក្រ ១៤រោច ខែបុស្ស ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី២០ ខែមករា ឆ្នាំ២០២៣ លោកជំទាវ កុយ សុដានី រដ្ឋលេខាធិការក្រសួងសាធារណការ និងដឹកជញ្ជូន និងជាប្រធាន អនុគណៈកម្មការសម្របសម្រួលបទអន្តរាគមន៍ បានអញ្ជើញដឹកនាំកិច្ចប្រជុំពិនិត្យវឌ្ឍនភាពនៃការត្រៀម រៀបចំសន្និបាតបូកសរុបលទ្ធផលការងារប្រចាំឆ្នាំ២០២២ និងលើកទិសដៅសកម្មភាពការងារឆ្នាំ២០២៣ របស់ក្រសួងសាធារណការ និងដឹកជញ្ជូន ដោយមានការចូលរួមពីថ្នាក់ដឹកនាំក្រសួង ឯកឧត្ដម អគ្គនាយក-អគ្គនាយករង និងមន្ត្រីជំនាញពាក់ព័ន្ធ។ ថ្លែងក្នុងកិច្ចប្រជុំនាឱកាសនោះ លោកជំទាវរដ្ឋលេខាធិការប្រធានអង្គប្រជុំ បានគូសបញ្ជាក់ថា៖ សន្និបាត នេះគឺជាវេទិកាប្រចាំឆ្នាំធំបំផុតរបស់ក្រសួងសាធារណការ និងដឹកជញ្ជូន រៀបចំឡើងដើម្បីពិនិត្យ និងវាយ តម្លៃសមិទ្ធផលនានាសម្រេចបាននាពេលកន្លងមក និងចូលរួមពិភាក្សាផ្លាស់ប្តូរយោបល់លើទស្សនទាន មេរៀនបទពិសោធន៍ និងគំនិតផ្តួចផ្តើមថ្មីៗសម្រាប់ជាធាតុចូលក្នុងការរិះរកដំណោះស្រាយចំពោះបញ្ហា ប្រឈមនានាលើវិស័យសាធារណការ និងដឹកជញ្ជូន និងលទ្ធផលសំខាន់ៗសម្រេចបានក្នុងវិស័យ សាធារណការ និងដឹកជញ្ជូនក្នុងឆ្នាំ២០២២ និងទិសដៅអនុវត្តបន្តសម្រាប់ឆ្នាំ២០២៣ ក្រោមប្រធានបទ៖ "បន្តលើកកម្ពស់គុណភាព នៃការកសាងហេដ្ឋារចនាសម្ព័ន្ធ និងប្រព័ន្ធដឹកជញ្ជូនប្រកបដោយប្រសិទ្ធភាព ចីរភាព បរិយាប័ន្ន និងការអភិវឌ្ឍធនធានមនុស្ស"។ សូមជម្រាបជូនថា៖ សន្និបាតបូកសរុបលទ្ធផលការងារឆ្នាំ២០២២ និងលើកទិសដៅការងារឆ្នាំ២០២៣ របស់ក្រសួងសាធារណការ និងដឹកជញ្ជូន នឹងប្រព្រឹត្តទៅរយៈពេល២ថ្ងៃ ចាប់ពីថ្ងៃទី០១ ដល់ ថ្ងៃទី០២ ខែកុម្ភៈ ឆ្នាំ២០២៣ ដោយមានការធ្វើបទបង្ហាញ កិច្ចពិភាក្សាផ្លាស់ប្តូរយោបល់លម្អិតអំពីបញ្ហាប្រឈម មេរៀន បទពិសោធន៍ សំណូមពរ ដំណោះស្រាយ និងអនុសាសន៍ណែនាំផ្សេងៗពីសំណាក់ អគ្គនាយកដ្ឋាន និងអង្គភាពក្រោមឱវាទក្រសួងផងដែរ៕