ក្នុងជំនួបពិភាក្សាការងារជាមួយប្រតិភូសមាគមដឹកជញ្ជូនអ្នកដំណើរផ្លូវគោកកម្ពុជា (CAMBA) កាលពីថ្ងៃទី១១ ខែមករា ឆ្នាំ២០២៣ លោកស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន បានមានប្រសាសន៍ថា ក្នុងរយៈពេល១០ឆ្នាំទៀតយ៉ាងយូរ ខ្សែផ្លូវជាតិ និងផ្លូវខេត្តនៅក្នុងប្រទេសកម្ពុជា នឹងត្រូវប្រែក្លាយជាប្រភេទផ្លូវបេតុងកៅស៊ូ (AC) ទាំងអស់ ហើយមានទំហំទ្រូងផ្លូវយ៉ាងតិច១២ម៉ែត្រ ឬ៤គន្លង។ លោករដ្ឋមន្រ្តីក្រសួងសាធារណការ បញ្ជាក់បន្ថែមថា បើទោះជាជួបប្រទះនឹងវិបត្តិជំងឺកូវីដ-១៩ក៏ដោយ ក៏ក្រសួងបានខិតខំប្រឹងប្រែង ក្នុងការពង្រឹង និងពង្រីកវិស័យហេដ្ឋារចនាសម្ព័ន្ធ និងដឹកជញ្ជូន។ ជាក់ស្តែង ដូចជាកន្លងទៅថ្មីៗនេះ គម្រោងសាងសង់ស្ពាន ក៏ដូចជាគម្រោងពង្រីក និងលើកកម្រិតគុណភាពផ្លូវជាច្រើនត្រូវបានប្រារព្ធពិធីប្រកាសបើកការដ្ឋានជាបន្តបន្ទាប់។ លោកក៏បានលើកឡើងពីគម្រោងផ្លូវល្បឿនលឿនភ្នំពេញ-បាវិត ដែលបានសិក្សានិងចុះកិច្ចព្រមព្រៀងក្របខ័ណ្ឌរួចរាល់ ហើយគ្រោងនឹងចុះហត្ថលេខាលើកិច្ចព្រមព្រៀងសម្បទាននៅខែក្រោយ ក្នុងពេលលោកនាយករដ្ឋមន្រ្តីហ៊ុន សែន បំពេញទស្សនកិច្ចផ្លូវរដ្ឋនៅប្រទេសចិន។លើសពីនេះទៅទៀត គម្រោងផ្លូវល្បឿនលឿនថ្មីមួយទៀតគឺ ភ្នំពេញ-សៀមរាប ក៏កំពុងតែត្រូវបានសិក្សាផងដែរ។ ភ្ជាប់ជាមួយនឹងការលើកឡើងអំពីគម្រោងផ្លូវល្បឿនលឿនទាំងនេះ លោកស៊ុន ចាន់ថុល ក៏បានសំណូមពរទៅកាន់សមាគមដឹកជញ្ជូនអ្នកដំណើរផ្លូវគោកកម្ពុជា ឱ្យជួយជំរុញការដឹកជញ្ជូនតាមផ្លូវល្បឿនលឿនភ្នំពេញ-ក្រុងព្រះសីហនុ។ ជាការឆ្លើយតប លោកបណ្ឌិត ឆឹម ចំណាន ប្រធានសមាគម បានបញ្ជាក់ពីការចូលរួមប្រើប្រាស់ផ្លូវល្បឿនលឿននាពេលកន្លងទៅ និងបានសន្យាថានឹងបន្តជំរុញការប្រើប្រាស់ឱ្យកាន់តែច្រើនជាងនេះទៅទៀត។ ក្រៅពីការជជែកពិភាក្សា លើការពង្រឹងពង្រីកវិស័យហេដ្ឋារចនាសម្ព័ន្ធ និងដឹកជញ្ជូនផ្លូវគោក លោករដ្ឋមន្រ្តីក្រសួងសាធារណការ ក៏បានលើកឡើងអំពីគម្រោងដែលក្រសួងកំពុងសិក្សា គឺការលើកកម្រិតគុណភាពផ្លូវដែក និងការដឹកជញ្ជូនតាមផ្លូវទឹក។ លោកថា ក្រសួងកំពុងសិក្សាគម្រោងដឹកជញ្ជូនតាមផ្លូវទឹក ដោយមិនចាំបាច់ឆ្លងកាត់តាមកំពង់ផែវៀតណាម ហើយប្រសិនបើគម្រោងនេះសម្រេចបាន វានឹងក្លាយជាគម្រោងប្រវត្តិសាស្រ្ត ដែលផ្លាស់ប្តូរមុខមាត់កម្ពុជាទាំងមូល នៅលើវិស័យដឹកជញ្ជូនតាមផ្លូវទឹកផងដែរ៕