ភ្នំពេញៈ លោក តូច ចាន់កុសល រដ្ឋលេខាធិការប្រចាំការ ក្រសួងសាធារណការ និងដឹកជញ្ជូន និងជាប្រធានក្រុមការងារសិក្សា ​និងវិសោធនកម្ម​ច្បាប់ ស្តីពីចរាចរណ៍ផ្លូវគោក នាព្រឹកទី៥ ខែមករា ឆ្នាំ២០២៣ បានអញ្ជើញ​ដឹកនាំកិច្ចប្រជុំ ពិនិត្យលើសេចក្តីព្រាង​ច្បាប់ ស្តីពីចរាចរណ៍ផ្លូវគោកថ្មី ដោយមានការចូលរួមពីលោក លោកស្រី និងមន្ត្រីជាន់ខ្ពស់ ដែលជាសមាជិក សមាជិកា នៃក្រុមការងារសិក្សា និងវិសោធនកម្មច្បាប់ ស្តីពីចរាចរណ៍ផ្លូវគោក។ យោងតាមក្រសួងសាធារណការ អង្គប្រជុំបានពិភាក្សា ផ្លាស់ប្តូរយោបល់ លើការកែ សម្រួលពាក្យពេចន៍ ឃ្លាឃ្លោង ក្នុងមាត្រាមួយចំនួន និងការកំណត់និយមន័យ នៃវាក្យស័ព្ទ ដែលប្រើប្រាស់ក្នុងច្បាប់ ស្តីពីចរាចរណ៍ផ្លូវគោកថ្មីនេះ សំដៅរៀបចំឱ្យបានរួចរាល់ សព្វគ្រប់ និងមាន​អត្ថន័យគ្រប់ជ្រុងជ្រោយ យោងតាមស្មារតីអង្គប្រជុំ និងអនុសាសន៍ ណែនាំដ៏ខ្ពង់ខ្ពស់របស់ សម្តេចក្រឡាហោម ស ខេង ឧបនាយក​រដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការសុវត្ថិភាពចរាចរណ៍ផ្លូវគោក (គ.ស.ច.គ.) ដែលបានលើកឡើង ក្នុងអង្គប្រជុំ​កាលពីថ្ងៃទី២៨ ខែធ្នូ ឆ្នាំ២០២២ កន្លងទៅ។ សូមជម្រាបជូនដែរថា បន្ទាប់ពីកិច្ចប្រជុំនេះ ក្រុមការងារសិក្សា និងវិសោធនកម្មច្បាប់ ស្តីពីចរាចរណ៍ផ្លូវគោក នឹងរៀបចំសេចក្តីព្រាង​ច្បាប់ ស្តីពីចរាចរណ៍ផ្លូវគោកថ្មីនេះ ដាក់ជូនក្រុមប្រឹក្សាអ្នកច្បាប់ នៃទីស្តីការគណៈរដ្ឋមន្ត្រី ស្នើសុំការពិនិត្យផ្ទៀងផ្ទាត់បន្ថែម។ សេចក្តីព្រាងច្បាប់ថ្មីនេះ បានតាក់តែងឡើង ដោយកែសម្រួលខ្លឹមសារ មាត្រាច្បាប់ចាស់ ចំនួន ៤៨ មាត្រា និងបន្ថែមមាត្រាថ្មីៗ មួយចំនួនទៀត ដើម្បីឱ្យស្របតាមការអភិវឌ្ឍរបស់ កម្ពុជា ជាពិសេស លើការអភិវឌ្ឍផ្លូវថ្នល់ រួមដូចជា ការពង្រីកផ្លូវ ការកសាងផ្លូវល្បឿន លឿន និងចង់បង្កើន​ប្រសិទ្ធភាព កាត់បន្ថយអ្នកស្លាប់ និងរបួសដោយគ្រោះថ្នាក់ចរាចរណ៍ ព្រមទាំងទប់ស្កាត់ការបើកបរ មានសារធាតុញៀន៕