កំពង់ឆ្នាំង៖ កំណាត់ផ្លូវជាតិលេខ៥ មានប្រវែង ៣៩គីឡូម៉ែត្រដែល តភ្ជាប់ពីស្រុករលាប្អៀរ ដល់ស្រុកបរិបូណ៌ ត្រូវបានអនុញ្ញាតិឲ្យធ្វើដំណើរហើយ បន្ទាប់ពីកសាងរួច។ លោក ឆាយ លាភា ប្រធានមន្ទីរសាធារណការ និងដឹកជញ្ជូន ខេត្តកំពង់ឆ្នាំង បានឲ្យដឹងថា កំណត់ផ្លូវជាតិលេខ៥ រួមទាំងផ្លូវវាងក្រុងកំពង់ឆ្នាំង ចាប់ពីគីឡូម៉ែត្រលេខ៧៤ ដល់គីឡូម៉ែត្រលេខ១១៥ ស្ថិតនៅក្នុងស្រុករលាប្អៀរ និងស្រុកបរិបូរណ៍ នៃគម្រោងធ្វើឲ្យប្រសើរឡើងផ្លូវជាតិលេខ៥ ខាងត្បូង (ព្រែកក្តាម+ធ្លាម្អម) បានអនុញ្ញាតឲ្យធ្វើចរាចរណ៍ទាំងសងខាងចាប់ពីរសៀលថ្ងៃទី២ ខែមករា ឆ្នាំ២០២៣ នេះតទៅ។ លោកក៏បានអំពាវនាវដល់បងប្អូនប្រជាពលរដ្ឋដែលប្រើប្រាស់ផ្លូវ ដែលទើបកសាងរួច ត្រូវគោរពច្បាប់ចរាចរណ៍ គំនូសផ្លូវថ្នល់ចរាចរណ៍ និងត្រូវបើកបរដោយប្រុងប្រយ័ត្ន ចៀសវាងគ្រោះថ្នាក់ចរាចរណ៍ជាយថាហេតុ។ គួរបញ្ជាក់ដែរថាកំណាត់ផ្លូវជាលេខ៦ ត្រូវបានរាជរដ្ឋាភិបាលកសាងឡើងវិញ រហូតមកដល់ពេលនេះជិតរួចរាល់ហើយដោយកន្លែងខ្លះក៏បានអនុញ្ញាតឱ្យធ្វើដំណើរ កន្លែងខ្លះទៀតកំពុងតែ ដំណើរការកសាងនៅឡើយ៕