សម្ដេចតេជោ ហ៊ុន សែន នាយករដ្ឋមន្ត្រីកម្ពុជាមានប្រសាសន៍ថា រាជរដ្ឋាភិបាលកំពុងពន្លឿន​លើហេដ្ឋារចនាសម្ព័ន្ធតភ្ជាប់​ដែលនឹងត្រូវក៏សាងស្ពានចំនួន ៣ បន្ថែមទៀត​នៅពេលខាងមុខនេះ ដែលស្ពានទី១ គឺស្ពានឆ្លងកាត់ទន្លេមេគង្គ-ក្រចេះ នឹងបើកការដ្ឋាន​នៅដើមខែមករា ឆ្នាំ ២០២៣នេះ។ ​ស្ពានមួយទៀត​នៅរាជធានីភ្នំពេញគឺស្ពានឆ្លងទន្លេមិត្តភាពកម្ពុជា-កូរ៉េខាងត្បូងចំនួន២ សាងសង់ជាស្ពានខ្សែកាប​តភ្ជាប់ពីម្តុំផ្សាររាត្រីក្បែរផ្សារចាស់ឆ្ពោះទៅត្រើយសុខា ហើយបន្តទៅអរិយក្សត្រ ដែលកម្ពុជាដែលត្រូវចំណាយប្រមាណ ២៥០ លានដុល្លារ សម្រាប់សាងសង់ស្ពាននេះ ដែលជាឥណទានរបស់កូរ៉េខាងត្បូង។ សម្ដេចតេជោ ហ៊ុន សែន មានប្រសាសន៍នៅក្នុងពិធីជួបសំណេះសំណាល ជាមួយប្រជាពលរដ្ឋខ្មែររស់នៅតំបន់អឺរ៉ុបជាង ២ពាន់នាក់នៅទីក្រុងព្រុចសែល ប្រទេសបែលហ្សិកនៅល្ងាចថ្ងៃទី ១២ ខែធ្នូនេះថា ​ស្ពាននៅរាជធានីភ្នំពេញត្រូវ​សាងសង់បន្ថែមចំនួន ២ ស្ពានមួយទៀត​ត្រូវសាងសង់ទំហំធំនៅខាងក្រោមពីផ្លូវជាតិលេខ១នៅល្វាឯមតភ្ជាប់ទៅផ្លូវល្បឿនលឿនភ្នំពេញ-បាវិត ដែលបានសម្រេចរួចហើយ។សម្ដេចតេជោ ហ៊ុន សែន បញ្ជាក់ថា ស្ពានភ្ជាប់ល្វាឯមនេះ ក្រុមហ៊ុនចង់សង់ហើយយកលុយ តែសម្តេចជំទាស់ ហើយបញ្ចេញថវិកា ២០០លានដុល្លារសង់ស្ពាននេះតែម្តង ដោយធ្វើដំណើរឆ្លងកាត់ស្ពានមិនតម្រូវឲ្យបង់លុយ ដែលសម្ដេចអះអាងថា គម្រោងនេះបានសិក្សាបញ្ចប់រួចរាល់ហើយ៕