កិច្ចប្រជុំក្រុមការងារ ស.ស.យ.ក វិស័យសាធារណការ និងដឹកជញ្ជូន ដើម្បីពិនិត្យវឌ្ឍនភាពការងារ និងត្រៀមលក្ខណៈចូលរួមពិធីអបអរសាទរខួបលើកទី៤៤ នៃកំណើតសហភាពសហព័ន្ធយុវជនកម្ពុជា ២ធ្នូ ១៩៧៨-២ធ្នូ ២០២២ ភ្នំពេញ៖ ថ្ងៃព្រហស្បតិ៍ ១កើត ខែមិគសិរ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី២៤ ខែវិច្ឆិកា ឆ្នាំ២០២២ លោក ឈួន វិន ប្រធានក្រុមការងារ ស.ស.យ.ក វិស័យសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំផ្ទៃក្នុងថ្នាក់ដឹកនាំ ក្រុមការងារ ស.ស.យ.ក ដោយកិច្ចប្រជុំនេះមានការចូលរួមពី លោក លោកស្រី ជាអនុប្រធាន និងសមាជិក សរុបចំនួន១៤រូប។ កិច្ចប្រជុំនេះមានគោលបំណងសំខាន់ គឺការត្រួតពិនិត្យអំពីវឌ្ឍនភាពការងារធ្វើបច្ចុប្បន្នភាពសមាជិក ការរៀបចំបែងចែកតួនាទីភារកិច្ចតាមបណ្ដាផ្នែក បញ្ហាប្រឈម និងត្រៀមលក្ខណៈរៀបចំស្តង់ពិព័រណ៍សម្រាប់ដាក់តាំងបង្ហាញពីសកម្មភាព និងសមិទ្ធផលនានា របស់ ស.ស.យ.ក វិស័យសាធារណការ និងដឹកជញ្ជូន នៅក្នុងពិធីអបអរសាទរខួបលើកទី៤៤ នៃកំណើតសហភាពសហព័ន្ធយុវជនកម្ពុជា ២ធ្នូ ១៩៧៨-២ធ្នូ ២០២២ ដែលនឹងប្រព្រឹត្តទៅនាថ្ងៃទី០៣ ខែធ្នូ ឆ្នាំ២០២២ នៅវិមានឈ្នះ-ឈ្នះ។ បន្ថែមពីលើនេះ លោកប្រធានក្រុមការងារ បានបញ្ជាក់ជូនអំពីការចូលរួមមហាសន្និបាតវិសាមញ្ញតំណាងទូទាំងប្រទេសរបស់ ស.ស.យ.ក ដែលនឹងប្រព្រឹត្តទៅនាថ្ងៃទី២៦-២៧ ខាងមុខនេះ ដោយមានការចូលរួមពីប្រតិភូ ក្រុមការងារ ស.ស.យ.ក វិស័យសាធារណការ និងដឹកជញ្ជូនចំនួន ១០រូប ដឹកនាំដោយលោកប្រធានផ្ទាល់។ លោកប្រធានក្រុមកាងារ បានកោតសរសើរ និងវាយតម្លៃខ្ពស់ចំពោះក្រុមការងារទាំងអស់ ដែលបានអនុវត្តតាមតួនាទីភារកិច្ចកំណត់ ធ្វើឱ្យទទួលបានលទ្ធផលយ៉ាងល្អប្រសើរ។ ជាចុងក្រោយ លោកប្រធាន បានលើកឡើងពីផែនការចុះជួបសំណេះសំណាលជាមួយសមាជិក សមាជិកាតាមផ្នែក និងក្រុមជំនាញដើម្បីបង្កើនភាពស្និទ្ធស្នាល និងកម្លាំងសាមគ្គីភាព ព្រមទាំងសំណូមពរអោយផ្នែក និងក្រុមជំនាញនីមួយៗផ្សព្វផ្សាយជូនសមាជិក សមាជិកាទាំងអស់ អំពីការចូលរួមពិធីអបអរសាទរខួបលើកទី៤៤ នៃកំណើតសហភាពសហព័ន្ធយុវជនកម្ពុជា ២ធ្នូ ១៩៧៨-២ធ្នូ ២០២២ ខាងមុខនេះ៕