គម្រោង “មជ្ឈមណ្ឌលភស្តុភារកម្មពហុបំណងភ្នំពេញ” - MULTI-MODAL PHNOM PENH LOGISTICS COMPLEX (PPLC) ដែលជាចំណុចតភ្ជាប់ដ៏សំខាន់សម្រាប់ពាណិជ្ជកម្មក្នុងតំបន់ និងចូលរួមក្នុងការពង្រឹងសេដ្ឋកិច្ចជាតិ ហើយប្រែក្លាយមុខមាត់ប្រទេសកម្ពុជា ទៅជាមជ្ឈមណ្ឌលភស្តុភារកម្មដ៏មានសក្តានុពល ត្រូវបានដាក់បង្ហាញរូបរាងជាផ្លូវការនៅក្នុងអំឡុងកិច្ចប្រជុំកំពូលអាស៊ាន លើកទី៤០ និង៤១ ភ្នំពេញ៖ ថ្ងៃសុក្រ ៣រោច ខែកត្តិក ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី១១ ខែវិច្ឆិកា ឆ្នាំ២០២២ នៅសណ្ឋាគាររ៉េស៊ីដង់សុខា ភ្នំពេញ មានការរៀបចំកម្មវិធីសម្ពោធដាក់បង្ហាញជាផ្លូវការនូវគម្រោង “មជ្ឈមណ្ឌលភស្តុភារកម្មពហុបំណងភ្នំពេញ” - MULTI-MODAL PHNOM PENH LOGISTICS COMPLEX (PPLC) ក្រោមអធិបតីភាពដ៏ខ្ពង់ខ្ពស់ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ តំណាងដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា រួមជាមួយ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន និងឯកឧត្តមបណ្ឌិត Vivian Balakrishnan រដ្ឋមន្ត្រីក្រសួងការបរទេស នៃសាធារណរដ្ឋសិង្ហបុរី។ កម្មវិធីនេះក៏មានវត្តមានចូលរួមផងដែរពីសំណាក់ លោកបណ្ឌិត Robert Yap អគ្គនាយកប្រតិបត្តិក្រុមហ៊ុន YCH Group អ្នកឧកញ៉ា សៀ ឫទ្ធី មន្ត្រីជាន់ខ្ពស់នៃប្រទេសទាំងពីរ កម្ពុជា-សិង្ហបុរី ក៏ដូចជាថ្នាក់ដឹកនាំក្រុមប្រឹក្សាធុរកិច្ចអាស៊ាន និងភ្ញៀវកិត្តិយសជាតិ និងអន្តរជាតិជាច្រើនរូប ដែលអញ្ជើញចូលរួមក្នុងកិច្ចប្រជុំកំពូលអាស៊ាន លើកទី៤០ និង៤១ និងកិច្ចប្រជុំពាក់ព័ន្ធ (The 40th & 41st ASEAN Summit and Related Summits) ដែលព្រះរាជាណាចក្រកម្ពុជា ក្នុងនាមប្រធានអាស៊ានឆ្នាំ២០២២ ជាម្ចាស់ផ្ទះរៀបចំកម្មវិធី។ គម្រោងមជ្ឈមណ្ឌលភស្តុភារកម្មពហុបំណងភ្នំពេញ PPLC ត្រូវបានសិក្សាដោយក្រុមហ៊ុន YCH Group ដែលជាក្រុមហ៊ុនផ្តល់សេវាដឹកជញ្ជូន និងខ្សែសង្វាក់ផ្គត់ផ្គង់ដ៏ធំបំផុតនៅក្នុងតំបន់អាស៊ី ហើយវានឹងបង្ហាញពីការអនុវត្តវិស័យភស្តុភារកម្ម ដែលប្រកបដោយនិរន្តរភាពល្អបំផុតនៅក្នុងតំបន់អាស៊ាន។ ការដាក់បង្ហាញគម្រោងលម្អិតនៅថ្ងៃនេះ គឺធ្វើឡើងបន្ទាប់ពីការចុះហត្ថលេខាលើកិច្ចព្រមព្រៀងក្របខ័ណ្ឌរវាង ក្រសួងសាធារណការ និងដឹកជញ្ជូន នៃព្រះរាជាណាចក្រកម្ពុជា ជាមួយនិងក្រុមហ៊ុន YCH Group កាលពីខែមីនា ឆ្នាំ២០២១ កន្លងទៅ។ ថ្លែងក្នុងពិធីនោះដែរ ឯកឧត្តមអគ្គបណ្ឌិតសភាចារ្យ បានមានប្រសាសន៍ថា៖ គម្រោងមជ្ឈមណ្ឌលភស្តុភារកម្មពហុបំណងភ្នំពេញ PPLC ត្រូវបានចាត់ជាអាទិភាពទៅក្នុងផែនការមេថ្នាក់ជាតិលើវិស័យដឹកជញ្ជូន និងភស្តុភារកម្ម ឆ្នាំ២០២២-២០៣០ ហើយការដាក់បង្ហាញគម្រោង PPLC ជាផ្លូវការនាឱកាសនេះ គឺឆ្លុះបញ្ចាំងឱ្យឃើញពីចំណុចវិជ្ជមានជាច្រើនរួមមាន៖ ១)ចំណងមិត្តភាព និងទំនាក់ទំនងដ៏រឹងមាំ រវាងកម្ពុជា និងសិង្ហបុរី ២)ការបញ្ជាក់ឱ្យឃើញពីការយកចិត្តទុកដាក់របស់រាជរដ្ឋាភិបាលកម្ពុជា លើការគាំទ្រការអភិវឌ្ឍគម្រោងមជ្ឈមណ្ឌលភស្តុភារកម្មពហុបំណងភ្នំពេញ PPLC ៣)ការជំរុញលើកចិត្តការវិនិយោគ រវាងវិនិយោគិនបរទេស និងវិនិយោគិនក្នុងស្រុក និង ៤) ការពង្រឹងការតភ្ជាប់លើវិស័យដឹកជញ្ជូន និងភស្តុភារកម្ម ក្នុងក្របខណ្ឌមហាអនុតំបន់មេគង្គ (GMS) អាស៊ាន និងពិភពលោកផងដែរ។ ថ្លែងក្នុងព្រឹត្តិការណ៍នេះផងដែរ ឯកឧត្ដមទេសរដ្ឋមន្ត្រី បានថ្លែងគាំទ្រការលើកឡើងរបស់ ឯកឧត្ដមអគ្គបណ្ឌិតសភាចារ្យ និងបានបញ្ជាក់បន្ថែមថា៖ គម្រោង PPLC ដើរតួនាទីយ៉ាងសំខាន់ មិនត្រឹមតែក្នុងការពង្រឹងការតភ្ជាប់វិស័យពាណិជ្ជកម្មរបស់កម្ពុជានៅក្នុងតំបន់ និងក្នុងចំណោមប្រទេសមហាអនុតំបន់មេគង្គ GMS ប៉ុណ្ណោះទេ វាថែមទាំងធ្វើឲ្យកាន់តែប្រសើរឡើងនូវប្រសិទ្ធភាពនៃការដឹកជញ្ជូនពហុមធ្យោបាយ ជាអាទិ៍រួមមានផ្លូវថ្នល់ ផ្លូវដែក ផ្លូវទឹក កំពង់ផែទឹកជ្រៅ និងការដឹកជញ្ជូនតាមផ្លូវអាកាសនៅកម្ពុជា ហើយក៏បង្កើតបានជាប្រព័ន្ធអេកូឡូជីស្ទីកប្រកបដោយប្រសិទ្ធភាព កាត់បន្ថយថ្លៃដើមដឹកជញ្ជូន ធ្វើឲ្យប្រសើរឡើងនូវការប្រកួតប្រជែង រួមបញ្ចូលទាំងខ្សែសង្វាក់ផ្គត់ផ្គង់ ជំរុញ និងលើកកម្ពស់កំណើនសេដ្ឋកិច្ចក្នុងតំបន់ទៀតផង។ គម្រោង PPLC ត្រូវបានកំណត់នៅក្នុងផែនការមេថ្នាក់ជាតិ លើវិស័យភស្តុភារកម្ម ថាជាគម្រោងយុទ្ធសាស្ត្រអាទិភាពមួយ ដើម្បីគាំទ្រដល់ការធ្វើសមាហរណកម្មរបស់កម្ពុជា ទៅក្នុងបណ្តាញភស្តុភារឆ្លាតវៃរបស់អាស៊ាន (ASLN) ហើយក៏ដើម្បីជំរុញការអភិវឌ្ឍន៍សេដ្ឋកិច្ច និងការតភ្ជាប់អាជីវកម្មរបស់កម្ពុជានៅក្នុងតំបន់អាស៊ានយ៉ងពិតប្រាកដ។ ជាមួយគ្នានេះដែរ លោកបណ្ឌិត Vivian Balakrishnan បានលើកឡើងថា៖ ប្រទេសសិង្ហបុរីកំពុងមានឆន្ទៈយ៉ាងមុតមាំសម្រាប់កិច្ចសហប្រតិបត្តិការរួមគ្នាជាមួយកម្ពុជា លើគម្រោងនានាក្នុងវិស័យដឹកជញ្ជូន និងភស្តុភារកម្ម នាពេលអនាគត ដើម្បីពង្រឹង និងពង្រីកទំនាក់ទំនងការទូតរបស់ប្រទេសទាំងពីរ ដែលមានរយៈពេល៥៧ឆ្នាំហើយ នៅក្នុងឆ្នាំ២០២២នេះ។ ទំនាក់ទំនងទ្វេភាគីរវាងសិង្ហបុរី និងកម្ពុជា ក៏ដូចជារវាងប្រទេសនានាក្នុងតំបន់អាស៊ាន វាជាលក្ខណៈមួយដែលពាក់ព័ន្ធក្នុងការជំរុញភាពប្រកួតប្រជែងរបស់រដ្ឋសមាជិកនីមួយៗផងដែរ។ សូមជម្រាបជូនដែរថា៖ YCH Group គឺជាក្រុមហ៊ុនឈានមុខគេរបស់សិង្ហបុរី ផ្តល់នូវដំណោះស្រាយខ្សែសង្វាក់ការផ្គត់ផ្គង់ជាចង្កោម តាំងពីដើមដល់ចប់។ ក្រុមហ៊ុននេះ ក៏ជាដៃគូជាមួយនឹងក្រុមហ៊ុនធំៗ និងម៉ាកល្បីៗរបស់ពិភពលោក នៅជាង១០០ទីក្រុង ក្នុងតំបន់អាស៊ីប៉ាស៊ីហ្វិក។ ក្រុមហ៊ុន YCH Group ត្រូវបានទទួលស្គាល់សម្រាប់វិធីសាស្រ្ត 7PL™ របស់ខ្លួន ក្នុងការរួមបញ្ចូលនូវយុទ្ធសាស្រ្តខ្សែសង្វាក់ការផ្គត់ផ្គង់ ជាមួយនឹងការប្រតិបត្តិយ៉ាងរលូនជូនដល់អតិថិជន និងក្រុមហ៊ុនដៃគូ៕