ការចុះពង្រឹងការងារផ្តល់សេវាសាធារណៈវិស័យដឹកជញ្ជូនផ្លូវគោកនៅមន្ទីរសាធារណការ និងដឹកជញ្ជូន ខេត្តកំពង់ចាម ខេត្តត្បូងឃ្មុំ ខេត្តមណ្ឌលគីរី និងខេត្តរតនគីរី ដោយប្រតិភូនៃអគ្គនាយកដ្ឋានដឹកជញ្ជូនផ្លូវគោក ក្រសួងសាធារណការ និងដឹកជញ្ជូន ថ្ងៃចន្ទ-ព្រហស្បតិ៍ ៧-១០កើត ខែកត្តិក ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី៣១ ខែតុលា ដល់ថ្ងៃទី៣ ខែវិច្ឆិកា ឆ្នាំ២០២២ ប្រតិភូនៃអគ្គនាយកដ្ឋានដឹកជញ្ជូនផ្លូវគោក ដឹកនាំដោយ ឯកឧត្ដម ឈួន វ៉ន់ អគ្គនាយកនៃអគ្គនាយកដ្ឋានដឹកជញ្ជូនផ្លូវគោក ក្រសួងសាធារណការ និងដឹកជញ្ជូន អមដំណើរដោយ លោកអគ្គនាយករង លោកប្រធាន អនុប្រធាននាយកដ្ឋានជំនាញ បានអញ្ជើញចុះជួបសំណេះសំណាល និងពង្រឹងការងារផ្តល់សេវាសាធារណៈវិស័យដឹកជញ្ជូនផ្លូវគោក នៅមន្ទីរសាធារណ ការ និងដឹកជញ្ជូនខេត្តកំពង់ចាម ខេត្តត្បូងឃ្មុំ ខេត្តមណ្ឌលគីរី និងខេត្តរតនគីរី។ ក្នុងឱកាសនោះ លោកប្រធាន អនុប្រធានមន្ទីរ និងមន្ត្រីជំនាញ នៃមន្ទីរសាធារណការ និងដឹកជញ្ជូនខេត្ត ទាំងបួន បានរាយការណ៍អំពីលទ្ធផលការងារផ្តល់សេវាសាធារណៈលើវិស័យដឹកជញ្ជូនផ្លូវគោកនាពេល កន្លងមក ព្រមទាំងបានលើកឡើងនូវសំណួរទាក់ទងបទដ្ឋានគតិយុត្ត ការងារបច្ចេកទេស បញ្ហាប្រឈម និងសំណូមពរមួយចំនួន ដើម្បីជូនប្រតិភូជួយដោះស្រាយ។ ឯកឧត្តមអគ្គនាយក និងប្រតិភូអមដំណើរ បានឆ្លើយតបនូវចម្ងល់ផ្សេងៗ ក៏ដូចជាបញ្ហាប្រឈម និង សំណូមពរមួយចំនួន ដោយឡែកបញ្ហាប្រឈម និងសំណូមពរ ដែលនៅសេសសល់ សន្យាខិតខំរួមគ្នាដោះស្រាយបន្តទៀត។ ឆ្លៀតក្នុងឱកាសនោះ ឯកឧត្តមប្រធានប្រតិភូ បានកោតសរសើរចំពោះកិច្ច សហការ និងការខិតខំប្រឹងប្រែងរបស់ថ្នាក់ដឹកនាំ និងមន្ត្រីជំនាញនៃមន្ទីរសាធារណការ និងដឹកជញ្ជូន ខេត្តទាំងបួន ក្នុងការបម្រើសេវាសាធារណៈជូនប្រជាពលរដ្ឋបានយ៉ាងល្អប្រសើរ។ ទន្ទឹមនោះដែរ ឯកឧត្តមប្រធានប្រតិភូ បានស្នើឱ្យមន្ត្រីទាំងអស់បន្តខិតខំប្រឹងប្រែងបម្រើសេវាជូនប្រជា ពលរដ្ឋឱ្យកាន់តែល្អបន្ថែមទៀត ស្របតាមអនុសាសន៍ណែនាំដ៏ខ្ពង់ខ្ពស់ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន “យើងជាមន្ត្រីបម្រើរាស្ត្រ ដូច្នេះត្រូវខិតខំបម្រើសេវា សាធារណៈជូនប្រជាពលរដ្ឋឱ្យបានលឿន និងឆាប់រហ័ស ពីមួយឆ្នាំទៅមួយឆ្នាំត្រូវតែល្អជាងមុន ចំណាយ ពេលវេលាខ្លីជាងមុន ប្រកបដោយតម្លាភាព និងប្រសិទ្ធភាពជាងមុន”៕