កិច្ចប្រជុំពិភាក្សា និងធ្វើបទបង្ហាញស្តីពីលទ្ធផលការសិក្សាស្តង់ដារបច្ចេកទេសរកភាពធន់កម្រាលផ្លូវ ដោយប្រើប្រាស់ឧបករណ៍ LWD និងFWD ទីស្ដីការក្រសួង៖ ថ្ងៃពុធ ៩កើត ខែកត្តិក ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី០២ ខែវិច្ឆិកា ឆ្នាំ២០២២ ឯកឧត្តម យិត បុណ្ណា រដ្ឋលេខាធិការក្រសួងសាធារណការ និងដឹកជញ្ជូន តំណាងដ៏ខ្ពង់ខ្ពស់ឯកឧត្តមទេសរដ្ឋមន្ត្រី ស៊ុន ចាន់ថុល បានអញ្ជើញដឹកនាំកិច្ចប្រជុំពិភាក្សា និងធ្វើបទបង្ហាញស្តីពីលទ្ធផលការសិក្សាស្តង់ដារបច្ចេកទេសរកភាពធន់កម្រាលផ្លូវ ដោយប្រើប្រាស់ឧបករណ៍ LWD និងFWD។ កិច្ចប្រជុំនេះមានការអញ្ជើញចូលរួមពីថ្នាក់ដឹកនាំក្រសួង ឯកឧត្តម ផែង សុវិជ្ជានោ រដ្ឋលេខាធិការ ឯកឧត្តម អនុរដ្ឋលេខាធិការ អង្គភាពគ្រប់គ្រងគម្រោង(PMU) អគ្គនាយកដ្ឋានសាធារណការ អគ្គនាយកដ្ឋានបច្ចេកទេស វិទ្យាស្ថានតេជោសែន សាធារណការ និងដឹកជញ្ជូន អង្គភាពអនុវត្តគម្រោង(PIU) នាយកដ្ឋានត្រួតពិនិត្យបច្ចេកទេស និងនាយកដ្ឋានអនុវត្តគម្រោង មន្ទីរសាធារណការ និងដឹកជញ្ជូនទាំង២៥រាជធានី-ខេត្ត មន្ទីរពិសោធន៍សំណង់ និងសាធារណការ គ្រប់អង្គភាពវិស្វកម្ម ព្រមទាំងមន្ត្រីបច្ចេកទេសជំនាញពាក់ព័ន្ធជាច្រើនរូបផងដែរ។ ជាកិច្ចចាប់ផ្តើម ឯកឧត្តមរដ្ឋលេខាធិការ ប្រធានអង្គប្រជុំ បានបង្ហាញចំណាប់អារម្មណ៍ និងការស្វាគមន៍ចំពោះការផ្ដល់ធាតុចូលពីគ្រប់ភាគីពាក់ព័ន្ធ និងការធ្វើបទបង្ហាញស្ដីពីលទ្ធផលការសិក្សាស្តង់ដារបច្ចេកទេសរកភាពធន់កម្រាលផ្លូវ ដោយប្រើប្រាស់ឧបករណ៍ LWD និង FWD សម្រាប់ផ្ទៀងផ្ទាត់ និងកំណត់រកតម្លៃនៃភាពដាប ឬស្រុត និងម៉ូឌុលអេឡាស្ទិចរបស់ផ្ទៃស្រទាប់ផ្លូវ (Surface Modulus) នៅការដ្ឋានជាក់ស្តែង ដែលអាចផ្ដល់លទ្ធផលភ្លាមៗ ដោយប្រើប្រាស់នូវឧបករណ៍ទំនើបៗទាំងនេះ ក្នុងការត្រួតពិនិត្យគុណភាពផ្លូវប្រកបទៅដោយគុណភាព ប្រសិទ្ធភាព និងចំណេញពេលវេលាផងដែរ។ ទន្ទឹមជាមួយគ្នានោះដែរ លោកបណ្ឌិត សុខ ទិត្យា បានធ្វើបទបង្ហាញអំពីលទ្ធផលនៃការសិក្សាស្តង់ដារបច្ចេកទេសរកភាពធន់កម្រាលផ្លូវ ដោយប្រើប្រាស់ឧបករណ៍ LWD និង FWD រួមមាន៖ ១) វិធីសាស្រ្តពិសោធន៍ LWD និង FWD ២) ការកំណត់តម្លៃ E_surf Target ៣) ការផ្ទៀងផ្ទាត់តម្លៃ E_surf Target ជាមួយតម្លៃនៅការដ្ឋាន ៤) ការរៀបចំចងក្រងជាបទប្បញ្ញត្តិបច្ចេកទេសរបស់ក្រសួងសាធារណការ និងដឹកជញ្ជូន។ គួរបញ្ជាក់ផងដែរថា៖ ក្រសួងសាធារណការ និងដឹកជញ្ជូន បានចាប់ផ្តើមប្រើប្រាស់ឧបករណ៍FWD ចាប់តាំងពីឆ្នាំ២០០៤ ក្នុងគម្រោងរបស់ធនាគារពិភពលោក ហើយបច្ចុប្បន្ន ក្រសួងមានឧបករណ៍FWD ចំនួន០៤ គ្រឿង ក្នុងនោះ៖ ០៣គ្រឿងផ្តល់ដោយធនាគារពិភពលោក និង០១គ្រឿងទៀត ផ្តល់ដោយសាធារណរដ្ឋប្រជាមានិតចិន។ ដោយឡែក ឧបករណ៍LWD ត្រូវបានចាប់ផ្តើមប្រើប្រាស់ចាប់តាំងពីឆ្នាំ២០២០ ហើយបច្ចុប្បន្នក្រសួងមានឧបករណ៍LWDចំនួន០៩គ្រឿង ។ ជាមួយគ្នានេះ ដោយមានការគាំទ្រពីថ្នាក់ដឹកនាំរបស់ក្រសួងសាធារណការ និងដឹកជញ្ជូន និងក្រសួងសេដ្ឋកិច្ច និងហិរញ្ញវត្ថុ អគ្គនាយកដ្ឋានបច្ចេកទេស ទទួលបានថវិកាសិក្សាស្តង់ដារបច្ចេកទេសរកភាពធន់កម្រាលផ្លូវ ដោយប្រើប្រាស់ឧបករណ៍ LWD នៅក្នុងឆ្នាំ២០២០ និង FWD នៅក្នុងឆ្នាំ២០២១៕