[Rasmei Kampuchea Daily News] - ក្រោយពីស្ថាបនាផ្លូវជុំវិញរួចរាល់ឧទ្យានជាតិកែបកាន់តែមានភាពទាក់ទាញ
បូកគោ/ កែប: ឧទ្យានជាតិកែបកាន់តែមានភាពទាក់ទាញបន្ទាប់ពីអាជ្ញាធរបានស្ថាបនាផ្លូវបេតុងព័ទ្ធជុំវិញរួចរាល់។
កញ្ញាឡាំង អានីកា ម្ចាស់ហាងកាហ្វេលើភ្នំបានប្រាប់ឱ្យដឹងដែរថា បច្ចុប្បន្នការលក់ដូរកាហ្វេ នំចំណីផ្សេងៗបានដាច់ជាងមុនព្រោះតែភ្ញៀវមកកម្សាន្តច្រើន។ តាមការកត់សម្គាល់ សន្ទុះភ្ញៀវចាប់ផ្តើមកើនឡើងក្រោយពីមានផ្លូវល្អឡើងមកដល់លើភ្នំ។ ពីមុនផ្លូវដីក្រហម ពេលមានភ្លៀងធ្លាក់ម្តងៗ ធ្វើឱ្យបែកភក់ និងបរិស្ថានអនាម័យមិនសូវល្អទៀតផង។ស្រដៀងគ្នានេះដែរ លោកសុជាតិ អ្នកគ្រប់គ្រងរីស៊តវេរ៉ង់ដាក្បែរឧទ្យានជាតិកែបបានរៀបរាប់ថា ក្រោយពីរាជរដ្ឋាភិបាលបើកប្រទេសដើម្បីដំណើរការសេដ្ឋកិច្ចឡើងវិញ ខេត្តកែបមានកំណើនភ្ញៀវទេសចរជាលំដាប់។ សម្រាប់រីស៊តវេរ៉ង់ដា ក្រោយពេលមានផ្លូវល្អ ភ្ញៀវចាប់ផ្តើមមកស្នាក់នៅច្រើនថែមទាំងបានប្រើប្រាស់សេវាកម្សាន្តផ្សេងៗនៅក្នុងឧទ្យានជាតិកែបក្បែរទីតាំងនេះ។
ជាមួយសមិទ្ធផលថ្មីនេះ ភ្ញៀវមកពីរាជធានីភ្នំពេញបានបង្ហាញពីចំណាប់អារម្មណ៍ផ្ទាល់ខ្លួនថា ពួកគាត់ពេញចិត្តនឹងការរៀបចំ សកម្មភាពបដិសណ្ឋារកិច្ច និងទេសភាពដ៏ស្រស់ស្អាតរបស់ខេត្តកែប ពិសេសឧទ្យានជាតិកែបតែម្តង។សូមបញ្ជាក់ថាឧទ្យានជាតិកែបមានទីតាំងស្ថិតនៅកណ្តាលក្រុងគ្របដណ្តប់លើផ្ទៃដីទំហំ១.១៥២ហិកតា។ ឧទ្យានជាតិនេះមានធនធានធម្មជាតិប្រកបដោយសក្តានុពលជាច្រើន។ ក្នុងនោះ រួមមាន ព្រៃឈើ ជីវៈចម្រុះ សត្វព្រៃច្រើនប្រភេទ ពិសេសសត្វស្វារាប់ពាន់ក្បាល មានរូងភ្នំ និងល្អាងដ៏ល្អប្រណីត។ ជាគោលដៅទៅអនាគត អាជ្ញាធរនឹងរៀបចំឧទ្យាននេះជាតំបន់ទេសចរណ៍ធម្មជាតិដើម្បីអភិរក្ស ការពារ និងទប់ស្កាត់ការទន្ទ្រានយកដីរដ្ឋ៕
