ផ្លូវល្បឿនលឿន ភ្នំពេញ-ព្រះសីហនុ ក្រោយបើកឱ្យដំណើរការសាកល្បងឥតគិតថ្លៃ នៅថ្ងៃទី ០១ ខែតុលា ឆ្នាំ ២០២២ បានធ្វើឱ្យមហាជននាំគ្នាផ្ទុះការងឿងឆ្ងល់ និងវែកញែកជាបន្តបន្ទាប់ចំពោះ អត្ថន័យនៃផ្លាកសញ្ញាចរាចរណ៍រូបពូថៅ ដែលគេបានប្រទះឃើញ នៅលើបណ្ដោយផ្លូវល្បឿនលឿន ដែលបានដាក់ឱ្យប្រើប្រាស់សាកល្បងឥតគិតថ្លៃ រយៈពេល ១ ខែពេញ។ទាក់ទិនទៅនឹងផ្លាកសញ្ញាខាងលើនេះ តាមរយៈគណនីលោក ផែង វណ្ណៈ បានបង្ហោះឱ្យបានដឹងថា ឯកឧត្ដម​ គង់​ វិមាន​ អ្នកនាំពាក្យ​ក្រសួង​សាធារណការ​ និង​ ដឹក​ជញ្ជូន​ បានបញ្ជាក់ចំពោះករណីកំពុងចាប់អារម្មណ៍ខាងលើបែបនេះថា ៖ «​ផ្លាកសញ្ញា​ពូថៅ​ដៃ​ ដែល​ដាក់​នៅ​ផ្លូវ​ល្បឿន​លឿន​ គ្មាន​ចែងក្នុង​ច្បាប់​ចរាចរណ៍​ទេ​ ក្រសួង​បាន​ណែនាំ​ឱ្យ​ក្រុមហ៊ុន​ដោះចេញវិញហើយ​»។គួរឱ្យដឹងផងដែរថា បើគិតពីម៉ោង ៧:០០ នាទីព្រឹក ដល់ម៉ោង ១៨:០០ នាទីល្ងាច ថ្ងៃទី ០១ ខែតុលា ឆ្នាំ ២០២២ មានយានយន្តចំនួន ៨៩២៧ គ្រឿង បាននាំគ្នាធ្វើដំណើរលើផ្លូវល្បឿនលឿន ភ្នំពេញ-ព្រះសីហនុ ដោយចេញចូលតាមស្ថានីយទាំង ០៨ ទីតាំង។ ក្នុងចំណោមយានយន្តជិត ៩០០០ គ្រឿងនោះ ក៏មានករណីដែលត្រូវការការប្រឹក្សាយោបល់ សាកសួរព័ត៌មាន និង ស្វែងរកជំនួយសង្គ្រោះផងដែរ ជាសរុបមានចំនួន ៥២ ខ្សែ ដែលបានធ្វើការទាក់ទងទៅកាន់លេខ ១៣៩៩ ក្នុងថ្ងៃនោះ៕