កិច្ចប្រជុំពិភាក្សារកដំណោះស្រាយលើបញ្ហាប្រឈមដែលនៅសេសសល់ពាក់ព័ន្ធនឹងការរៀបចំសណ្តាប់ធ្នាប់ សន្តិសុខ និងសុវត្ថិភាព មុនការដាក់ឱ្យដំណើរការសាកល្បងផ្លូវល្បឿនលឿនតភ្ជាប់ពីរាជធានីភ្នំពេញទៅក្រុងព្រះសីហនុ ថ្ងៃព្រហស្បតិ៍ ៤កើត ខែអស្សុជ ឆ្នាំខាល ចត្វាស័ក ព.ស. ២៥៦៦ ត្រូវនឹងថ្ងៃទី២៩ ខែកញ្ញា ឆ្នាំ២០២២ នៅទីស្តីការក្រសួង ឯកឧត្តម យិត បុណ្ណា រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំពិភាក្សារកដំណោះស្រាយលើបញ្ហាប្រឈមដែលនៅសេសសល់ពាក់ព័ន្ធនឹងការរៀបចំសណ្តាប់ធ្នាប់ សន្តិសុខ និងសុវត្ថិភាព មុនការដាក់ឱ្យដំណើរការសាកល្បងផ្លូវល្បឿនលឿនតភ្ជាប់ពីរាជធានីភ្នំពេញទៅក្រុងព្រះសីហនុ ដោយមានការចូលរួមពីឯកឧត្តមនាយឧត្តមសេនីយ៍ ហ៊ឹម យ៉ាន អគ្គស្នងការរងនគរបាលជាតិ តំណាងរដ្ឋបាលរាជធានីភ្នំពេញ ខេត្តកណ្តាល កំពង់ស្ពឺ កោះកុង និងព្រះសីហនុ តំណាងក្រុមហ៊ុនវិនិយោគ និងក្រុមការងារអង្គភាពគ្រប់គ្រងគម្រោង រួមទាំងមន្ទីរសាធារណការ និងដឹកជញ្ជូនរាជធានី-ខេត្តពាក់ព័ន្ធសរុបប្រមាណ៤០រូប។ កិច្ចប្រជុំផ្តោតលើរបៀបវារៈចំនួន០២រួមមាន៖ របាយការណ៍វឌ្ឍនភាពការងារ និងបញ្ហាពាក់ព័ន្ធនឹងសុវត្ថិភាពចរាចរណ៍ វិធានការទប់ស្កាត់ និងកិច្ចសហការដើម្បីចូលរួមផ្សព្វផ្សាយ រៀបចំសណ្តាប់ធ្នាប់ របៀបរៀបរយ សន្តិសុខ និងសុវត្ថិភាពមុនដាក់ឱ្យដំណើរការផ្លូវល្បឿនលឿន។ ជាកិច្ចចាប់ផ្តើម ឯកឧត្តមរដ្ឋលេខាធិការ បានជម្រាបជូនអំពីការងារដែលត្រូវជជែកពិភាក្សារកដំណោះស្រាយលើបញ្ហាប្រឈមដែលនៅសេសសល់ពាក់ព័ន្ធនឹងការរៀបចំសណ្តាប់ធ្នាប់ សន្តិសុខ និងសុវត្ថិភាព មុនការដាក់ឱ្យដំណើរការសាកល្បងផ្លូវល្បឿនលឿនតភ្ជាប់ពីរាជធានីភ្នំពេញទៅក្រុងព្រះសីហនុ ដោយឥតគិតថ្លៃរយៈពេល០១ខែ ចាប់ពីថ្ងៃទី០១ ដល់ថ្ងៃទី៣១ ខែតុលា ឆ្នាំ២០២២។ ឆ្លៀតក្នុងឱកាសនោះដែរ ឯកឧត្តមរដ្ឋលេខាធិការ បានជម្រាបជូនអង្គប្រជុំថា៖ ឯកឧត្តមនឹងដឹកនាំក្រុមការងារបច្ចេកទេសក្រសួងចុះពិនិត្យផ្លូវល្បឿនលឿនពីដើមទីរហូតដល់ចុងទី នៅថ្ងៃទី៣០ ខែកញ្ញា ឆ្នាំ២០២២នេះ និងស្នើឱ្យមានការចូលរួមពីរដ្ឋបាលរាជធានី-ខេត្តពាក់ព័ន្ធផងដែរ។ គួរកត់សម្គាល់ផងដែរ សមាជិកអង្គប្រជុំដែលជាតំណាងរដ្ឋបាលរាជធានី-ខេត្ត មន្ទីរសាធារណការ និងដឹកជញ្ជូនរាជធានី-ខេត្តពាក់ព័ន្ធ និងមន្រ្តីពាក់ព័ន្ធ ក៏បានចូលរួមមតិយោបល់ និងសម្តែងការគំាទ្រដល់ដំណើរការគ្រោងបើកឱ្យប្រើប្រាស់សាកល្បងផ្លូវល្បឿនលឿនភ្នំពេញ-ក្រុងព្រះសីហនុនេះ៕