(រាជធានីភ្នំពេញ)៖ រដ្ឋបាលរាជធានីភ្នំពេញ បានចេញសេចក្ដីជូនដំណឹងស្តីពីការបើកការដ្ឋានសាងសង់ស្ពានអាកាសចំនួន២ ដោយទីមួយស្ថិតនៅចំណុចប្រសព្វមហាវិថីសម្តេចតេជោ, មហាវិថីព្រះមុនីវង្សជាមួយនឹងវិថីកងយោធពលខេមរភូមិន្ទ(ផ្លូវលេខ២៧១) និងសាងសង់ស្ពានអាកាសមួយទៀត ស្ថិតនៅចំណុចប្រសព្វមហាវិថីសហព័ន្ធរុស្ស៊ីជាមួយមហាវិថីសម្តេចចៅហ្វាវាំងវរវៀងជ័យអធិបតីស្រីង្គារ គង់ សំអុល(ផ្លូវលេខ២០០៤) នាព្រឹកថ្ងៃទី៣១ ខែសីហា ខាងមុខនេះ។ដើម្បីសម្រួលដល់ការបើកដ្ឋានសាងសង់ ប្រព្រឹត្តទៅដោយរលូន រដ្ឋបាលរាជធានីភ្នំពេញ បានប្រកាសឱ្យពលរដ្ឋដែលតែងធ្វើដំណើរនៅតាមកំណាត់មហាវិថីចាប់ពីផ្លូវលេខ២៧១ ដល់ស្តុបផ្លូវ៦០ម៉ែត្រ រហូតដល់ផ្លូវ​៣០ម៉ែត្រ ពង្វាងទៅផ្លូវផ្សេង ចាប់ពីថ្ងៃនេះម៉ោង៥ព្រឹក រហូតដល់ថ្ងៃទី៣១ខែសីហា។ ដំណើរការបើកការដ្ឋានសាងសង់ស្ពានអាកាសថ្មីចំនួន២នេះ នឹងប្រព្រឹត្តទៅក្រោមអធិបតីភាពដ៏ខ្ពង់ខ្ពស់ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នាសង្កាត់ចាក់អង្រែលើ ខណ្ឌមានជ័យ នាព្រឹកថ្ងៃទី៣១ ខែសីហាខាងមុខនេះ។ដើម្បីឱ្យកម្មវិធីនេះប្រព្រឹត្តទៅប្រកបដោយសុវត្ថិភាព សណ្តាប់ធ្នាប់ និងរបៀបរៀបរយ រដ្ឋបាលរាជធានីភ្នំពេញនឹងផ្អាកចរាចរជាបណ្តោះអាសន្នជុំវិញទីតាំងប្រព្រឹត្តនោះរយៈពេល៣ថ្ងៃ ចាប់ពីថ្ងៃទី២៩ដល់ថ្ងៃទី៣១ខែសីហា។ រដ្ឋបាលរាជធានីភ្នំពេញនឹងលាងសម្អាតមហាវិថីនោះ ចាប់ពីម៉ោង៥ព្រឹកថ្ងៃនេះតទៅ។ នៅថ្ងៃទី៣០​ខែសីហា នឹងរៀបចំក្រុងពាលី និងការងារចាំបាច់មួយចំនួន ហើយនៅថ្ងៃទី៣១ ខែសីហា នឹងរៀបចំពិធីបើកការដ្ឋានសាងសង់ស្ពានអាកាសទាំងពីរខ្សែខាងលើ។ រដ្ឋបាលរាជធានីភ្នំពេញ បានបញ្ជាក់ថា ផុតរយៈពេលហាមឃាត់បណ្តោះអាសន្ន រដ្ឋបាលរាជធានីភ្នំពេញនឹងបើកឱ្យចរាចរជាធម្មតាវិញ។ អាស្រ័យហេតុនេះ ប្រជាពលរដ្ឋដែលធ្វើដំណើរឆ្លងកាត់តាមកំណាត់មហាវិថីខាងលើមេត្តាជ្រាប យោគយល់អធ្យាស្រ័យ និងបញ្ចៀសការធ្វើដំណើរឆ្លងកាត់ទីតាំងប្រារព្ធពិធីតាមកាលបរិច្ឆេទខាងលើដោយក្ដីអនុគ្រោះ៕