[Rasmei Kampuchea Daily News] - មន្ទីរសាធារណការខេត្តកំពង់ឆ្នាំង កាយប្រឡាយ និងដាក់បាវដី ទប់ទឹកមិនឱ្យហូរ លើកំណាត់ផ្លូវជាតិលេខ៥ ជាបណ្ដោះអាសន្ន
កំពង់ឆ្នាំងៈ ចាប់ពីថ្ងៃទី៧ មកដល់ថ្ងៃទី៨ ខែសីហា ឆ្នាំ២០២២ នេះ មន្ទីរសាធារណការ និងដឹកជញ្ជូន ខេត្តកំពង់ឆ្នាំង បានយកគ្រឿងចក្រ កាយប្រឡាយ រំដោះទឹក និងច្រកដីដាក់បាវ ទប់ទឹកមិនឱ្យហូរលើកំណាត់ផ្លូវជាតិលេខ៥ ជាបណ្ដោះអាសន្ន នៅត្រង់ចន្លោះបង្គោលគីឡូម៉ែត្រ លេខ៣៩ និង ៤០ ដើម្បីធ្វើឱ្យចរាចរណ៍ ឆ្លងកាត់ទៅមក របស់ប្រជាពលរដ្ឋ ដំណើរការបានស្រួល។
ប្រធានមន្ទីរសាធារណការ និងដឹកជញ្ជូន ខេត្តកំពង់ឆ្នាំង លោក ឆាយ លាភា បានឱ្យដឹង នៅថ្ងៃទី៨ ខែសីហា ឆ្នាំ ២០២២នេះថាៈ ការចុះធ្វើសកម្មភាពខាងលើនេះ គឺដោយសារតែ កន្លងមក ទឹកបានហូរធ្លាក់មកពីលើ ជាថ្មីម្ដងទៀត និងមានការខ្លាចក្រែងហូរកាត់ និងអាចច្រោះដាច់កំណាត់ផ្លូវជាតិលេខ ៥ នៅនៅត្រង់ចំណុច ចន្លោះគីឡីម៉ែត្រលេខ ៣៩ និង ៤០ ដែលធ្វើឱ្យមានការលំបាក ក្នុងការធ្វើចរាចរណ៍ ដូចពេលមុនៗ ទើបមន្ទីរសា ធារណការ និងដឹកជញ្ជូន ខេត្តកំពង់ឆ្នាំង បាននាំយកកម្លាំង និងគ្រឿងចក្រ ចុះកាយប្រឡាយ និងយកបាវច្រកដី ដើម្បីរៀបជួយទប់ទឹកតាមមាត់ផ្លូវ ការពារទប់ស្កាត់ ការលិចសារជាថ្មីម្ដងទៀត ។
លោក ឆាយ លាភា បានបញ្ជាក់ថាៈ ប្រសិនបើស្ថានភាពទឹក នៅផ្នែកខាងលើ អន្លង់ជ្រៃ ហូរចុះមក ឡើងខ្ពស់ជាងកន្លះម៉ែត្រ វាអាចនឹងកាត់ផ្ដាច់លើចំណុចផ្លូវ ត្រង់គីឡូម៉ែត្រលេខ ៣៩ និង៤០ ដែលស្ថិតនៅភូមិជន្លាត់ដៃ ឃុំសេដ្ឋី ស្រុកសាមគ្គីមានជ័យ ជាប់នឹងព្រំប្រទល់ ខេត្តកំពង់ស្ពឺ ជាថ្មីម្ដងទៀត ជាពុំខាន ហើយបើបែបនេះមែន នឹងត្រូវសុំក្រុមហ៊ុនធ្វើផ្លូវ របស់ជប៉ុន ឱ្យបងប្អូនប្រជាពលរដ្ឋ ធ្វើចរាចរណ៍ វាងផ្សារឧដុង្គជាថ្មីម្ដងទៀត ជាមិនខានឡើយ៕
