កិច្ចប្រជុំពិភាក្សាអំពីវឌ្ឍភាពការងាររៀបចំអភិវឌ្ឍគម្រោងមុខងារត្រួតពិនិត្យគុណភាព (ROAD CARE Supervision)នៃកម្មវិធីថែទាំផ្លូវ នាថ្ងៃចន្ទ ទី១២រោច ខែអាសាឍ ឆ្នាំខាល ចត្វាស័ក ព.ស ២៥៦៦ ត្រូវនឹងថ្ងៃទី២៥ ខែកក្កដា ឆ្នាំ២០២២ នៅទីស្តីការ ក្រសួងសាធារណការ និងដឹកជញ្ជូន ឯកឧត្តម ហេង រត្នពិសិដ្ឋ អគ្គនាយក នៃអគ្គនាយកដ្ឋានសាធារណការ និងជាអនុប្រធានគណៈកម្មការកម្មវិធីថែទាំផ្លូវថ្នល់ បានអញ្ជើញដឹកនាំកិច្ចប្រជុំអំពីវឌ្ឍភាពការងាររៀបចំអភិវឌ្ឍគម្រោងមុខងារត្រួតពិនិត្យគុណភាព (ROAD CARE Supervision) ដោយមានចូលរួមពី លោក ហ៊ាង សុទ្ធាយុត្តិ ប្រធាននាយកដ្ឋានព័ត៌មានវិទ្យា និងទំនាក់ទំនងសាធារណៈ និងជាអនុប្រធានអចិន្ត្រៃយ៍ នៃគណៈកម្មការ ព្រមទាំងក្រុមការងារបច្ចេកទេស នៃអគ្គនាយកដ្ឋានសាធារណការ និងក្រុមការងារបច្ចេកទេសព័ត៌មានវិទ្យា នៃនាយកដ្ឋានព័ត៌មានវិទ្យា និងទំនាក់ទំនងសាធារណៈ។ កិច្ចប្រជុំបានធ្វើការពិភាក្សា លើការគ្រប់គ្រងការងាររដ្ឋបាលគម្រោងជួសជុល-សាងសង់ផ្លូវ និងការងាររៀបចំគំនូសប្លង់លម្អិតគេហទំព័រគ្រប់គ្រងព័ត៌មាន និងទិន្នន័យ (Mockup Design) ដើម្បីជាមូលដ្ឋានបន្ថែម ក្នុងការអភិវឌ្ឍគម្រោងមុខងារត្រួតពិនិត្យគុណភាព (ROAD CARE Supervision) ឱ្យកាន់តែមានប្រសិទ្ធភាព តល្លាភាព សុគ្រិតភាព និងងាយស្រួលក្នុងការប្រើប្រាស់សម្រាប់ថ្នាក់ដឹកនាំ និងអង្គភាពពាក់ព័ន្ធ ដែលស្ថិតក្រោមក្រសួងសាធារណការ និងដឹកជញ្ជូន។ ថ្លែងទៅកាន់អង្គប្រជុំនាឱកាសនោះ ឯកឧត្តមអគ្គនាយក នៃអគ្គនាយកដ្ឋានសាធារណការ បានកោតសសើរអំពីកិច្ចខិតខំប្រឹងប្រែងរបស់ ក្រុមការងាររបស់នាយកដ្ឋានព័ត៌មាន និងទំនាក់ទំនងសាធារណៈ និងបានចាត់តាំងសមាភាពបង្គោល ដើម្បីសហការផ្តល់ធាតុចូលបន្ថែមក្នុងការចូលរួមរៀបចំមុខងារថ្មីនេះ ប្រកបដោយស្មារតីទទួលខុសត្រូវខ្ពស់៕