កិច្ចប្រជុំពិនិត្យវឌ្ឍនភាពការងារគម្រោងឆ្នាំ២០២២ និងគម្រោងឆ្នាំមុនៗ ព្រមទាំងការងាររៀបចំបញ្ជី គម្រោងហេដ្ឋារចនាសម្ព័ន្ធផ្លូវថ្នល់-ស្ពាន ស្នើសុំស្ថាបនា ស្តារ និងជួសជុលសម្រាប់ផែនការវិនិយោគបីឆ្នាំរំកិល ២០២៣-២០២៥ ដឹកនាំដោយឯកឧត្តម ហេង រត្ន ពិសិដ្ឋ អគ្គនាយកសាធារណការ ថ្ងៃសុក្រ ៣កើត ខែអាសាឍ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី១ ខែកក្តដា ឆ្នាំ២០២២ នៅទីស្តីការក្រសួង ឯកឧត្តម ហេង រត្ន ពិសិដ្ឋ អគ្គនាយកសាធារណការ ក្រសួងសាធារណការ និង ដឹកជញ្ជូន បានអញ្ជើញដឹកនាំកិច្ចប្រជុំពិនិត្យវឌ្ឍនភាពការងារគម្រោងឆ្នាំ២០២២ និងគម្រោងឆ្នាំមុនៗ ព្រមទាំងការងាររៀបចំបញ្ជីគម្រោងហេដ្ឋារចនាសម្ព័ន្ធផ្លូវថ្នល់-ស្ពាន ស្នើសុំស្ថាបនា ស្តារ និងជួសជុល សម្រាប់ផែនការវិនិយោគបីឆ្នាំរំកិល២០២៣-២០២៥ ដោយមានការចូលរួមពីឯកឧត្តម ហ៊ាងវុត្ថា អគ្គនាយកនៃអគ្គនាយកដ្ឋានបច្ចេកទេស និងឯកឧត្តម សួន ភារិទ្ធ អគ្គនាយកនៃអគ្គនាយកដ្ឋានប្រព័ន្ធចម្រោះទឹកកខ្វក់ ព្រមទាំងប្រធានមន្ទីសាធារណការ និងដឹកជញ្ជូនទាំង២៥ រាជធានី-ខេត្ត កងវិស្វកម្ម អង្គភាពអនុវត្តគម្រោង អង្គភាពត្រួតពិនិត្យគម្រោង និងក្រុមអ្នកបច្ចេកទេសក្រោមឱវាទក្រសួង។ អង្គប្រជុំបានពិភាក្សាលើវឌ្ឍនភាពការងាររបស់អង្គភាពអនុវត្តគម្រោងដែលបានអនុវត្តក្នុងឆ្នាំ២០២២ ឥណទានថវិកាឆ្នាំ២០២២ ស្ថានភាពទូទាត់ថវិកាឆ្នាំ២០២២ និងស្ថានភាពទូទាត់ថវិកាឆ្នាំ២០២២ ប្រៀបធៀបនឹងឆ្នាំ២០២១កន្លងទៅ ជាពិសេសការងារអន្តរាគមន៍ជួសជុលបន្ទាន់ គម្រោងថែទាំខួប គម្រោងថែទាំប្រចាំ ការងារគាំទ្រ ការងារថែទាំ គម្រោងវិនិយោគហេដ្ឋារចនាសម្ព័ន្ធផ្លូវ ថ្នល់ស្ពាន គម្រោងជួសជុលខួប ការងារអង្កេតនិងត្រួតពិនិត្យ ជាទៀងទាត់ស្ពានធំៗ ការត្រួតពិនិត្យវាយ តម្លៃផ្លូវជាតិ ការបង្កើតប្រព័ន្ធគ្រប់គ្រងទិន្នន័យប្រព័ន្ធចម្រោះទឹកកខ្វក់ និងការគាំទ្រប្រតិបត្តិការគណៈកម្មាធិការការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ផងដែរ។ ថ្លែងទៅកាន់អង្គប្រជុំនាឱកាសនោះ ឯកឧត្តមអគ្គនាយក បានជំរុញលើកទឹកចិត្តឱ្យអង្គភាពអនុវត្ត គម្រោងទាំងអស់ស្វែងរកមធ្យោបាយសហការគ្នាឱ្យបានជិតស្និទ្ធ ធ្វើយ៉ាងណាបំពេញចំណុចខ្វះខាតក្នុង ការអនុវត្តគម្រោងឱ្យបានទាន់ពេលវេលា ប្រសិទ្ធភាព និងតម្លាភាព ដើម្បីធ្វើយ៉ាងឱ្យផ្លូវមានគុណភាពរឹង មាំ អាចប្រើប្រាស់បានយូរអង្វែងស្របតាមស្តង់ដារបច្ចេកទេស និងកាត់បន្ថយថវិកាជាតិក្នុងការជួលជុល ថែទាំតាមអនុសាសន៍ណែនាំដ៏ខ្ពង់ខ្ពស់របស់ឯកឧត្តមទេសរដ្ឋមន្ត្រី ស៊ុន ចាន់ថុល៕