[Rasmei Kampuchea Daily News] - ផ្លូវលំក្រាលក្រួសក្រហម ប្រវែង ៥.០០០ ម៉ែត្រជាប់មាត់ទន្លេ ដែលរងការខូចខាត កន្លងទៅ ត្រូវបានធ្វើជួសជុលកែលម្អឲ្យដំណើរការវិញ
កំពង់ឆ្នាំង: នៅព្រឹកថ្ងៃទី៤ កក្កដា ២០២២ នេះ ផ្លូវលំក្រាលក្រួស ក្រហមមួយខ្សែ ប្រវែង ៥.០០០ ម៉ែត្រ ជាប់មាត់ទន្លេស្ថិតក្នុងភូមិកណ្តាល សង្កាត់ផ្សារឆ្នាំង ក្រុងកំពង់ឆ្នាំង ដែលរងការខូចខាតកន្លងទៅ ត្រូវបានជួសជុល កែលម្អ ឲ្យដំណើរការឡើងវិញហើយ ដោយមន្ទីរអភិវឌ្ឍន៍ជនបទខេត្តកំពង់ឆ្នាំង ។
ប្រធានមន្ទីរអភិវឌ្ឍន៍ជនបទ ខេត្តកំពង់ឆ្នាំង លោក ជិនរដ្ឋា បានប្រាប់ឱ្យដឹងថា: ផ្កូវលំមួយខ្សែនេះ មានប្រវែង ៥.០០០ ម៉ែត្រ តភ្ជាប់ពីភូមិកំពង់អូស ឃុំកំពង់អូស ស្រុកជល់គីរី មកកាន់ភូមិកណ្ដាល សង្កាត់ផ្សារឆ្នាំង ក្រុងកំពង់ឆ្នាំង ដែលបានរង ការខូចខាត ពិបាកក្នុងការធ្វើដំណើរ ហើយក៍ជាផ្លូវមួយ មានរថយន្តតូច ធំ គ្រប់ប្រភេទ ឆ្លងកាត់ និងដឹកជញ្ជូនទៅមក យ៉ាងមមាញឹកនិងការធ្វើដំណើរ ទៅមករបស់ប្រជាពលរដ្ឋ ពីតំបន់ជនបទផ្សេងៗ មកទីរួមខេត្ត ពីទីរួមខេត្ត ទៅតំបន់ឆ្ងាយៗមានក្រុងកំពង់ឆ្នាំង ស្រុករលាប្អៀរ ស្រុកជលគីរី និងមួយផ្នែក ភ្ជាប់ទៅស្រុកបាធាយ ខេត្តកំពង់ចាមផងដែរ ។
ប្រធានមន្ទីរអភិវឌ្ឍន៍ជនបទខេត្តកំពង់ឆ្នាំង បានឲ្យដឹងទៀតថា: ដោយមើលឃើញ ពីស្ថានភាព ក្នុងការធ្វើ ដំណើរ មានការលំបាក លោក ស៊ុន សុវណ្ណារិទ្ធ អភិបាលគណៈអភិបាលខេត្តកំពង់ឆ្នាំង បានឱ្យប្រធាន មន្ទីរអភិវឌ្ឍន៍ជនបទ ខេត្តកំពង់ឆ្នាំង ចុះធ្វើការសិក្សាជួសជុលកែលម្អផ្លូវមួយនេះ ឲ្យបានល្អប្រសើរ ឡើងវិញ សម្រាប់ការធ្វើដំណើរទៅមករបស់ប្រជាពលរដ្ឋ មកកាន់ក្រុងកំពង់ឆ្នាំង ក៏ដូចទៅកាន់តំបន់ជនបទ និងតភ្ជាប់ទៅកន្លែងផ្សេងៗ នៅក្នុងខេត្តផងដែរ ។
លោក អ៉ិន ឌិន ប្រធានភូមិកណ្ដាល ក៏ដូចជាបងប្អូនប្រជាពលរដ្ឋ ដែលឆ្លងកាត់ និងមានទីលំនៅតាមដងផ្លូវនេះ បានថ្លែងអំណរគុណយ៉ាងជ្រាលជ្រៅ ជូនដល់ លោក ស៊ុន សុវណ្ណារិទ្ធ អភិបាលនៃគណៈអភិបាលខេត្តកំពង់ឆ្នាំង និងប្រធានមន្ទីរ អភិវឌ្ឍន៍ជនបទ ដែលលោកតែងតែយកចិត្តទុកដាក់ ដល់ការរស់នៅរបស់បងប្អូន ប្រជាពលរដ្ឋ។
ពាក់ព័ន្ធនឹងករណីខាងលើនេះ លោកមេភូមិកណ្ដាល ក៏សូមអំពាវនាវដល់សមត្ថកិច្ច ក្នុងក្រុងកំពង់ឆ្នាំង អាជ្ញាធក្រុង មេត្តាជួយសម្រួល ដល់ការធ្វើដំណើរទៅមករបស់ ប្រជាពលរដ្ឋ និងរថយន្តដឹកអ្នកដំណើរ ដែលមកសំចតនៅគល់ទំនប់បារាំង មានភាពរញ៉េរញ៉ៃ ដែលបង្កឱ្យកើតមានករណីគ្រោះថ្នាក់ចរាចរណ៍ណាមួយ ដែលកើតឡើងជាយថាហេតុ ខណៈរថយន្តចុះពីលើផ្លូវមកផ្នែកខាងក្រោម ទំនប់នេះ៕
