[Rasmei Kampuchea Daily News] - ស្ថានីយប្រព្រឹត្តិកម្មទឹកកខ្វក់ទី៣ នៅខេត្តព្រះសីហនុ អនុវត្តបានលទ្ធផល ៤៤ ភាគរយ នៃគម្រោងទាំងមូល
ភ្នំពេញៈ ស្ថានីយប្រព្រឹត្តិកម្មទឹកកខ្វក់ទី៣ នៅខេត្តព្រះសីហនុ អនុវត្តបាន លទ្ធផល ៤៤ ភាគរយ នៃគម្រោងទាំងមូល។ គម្រោងនេះ នឹងរួចរាល់ នៅក្នុងឆ្នាំ២០២៣ ជា គម្រោង បន្ទាប់ពីស្ថានីយប្រព្រឹត្តិកម្មទឹកកខ្វក់ទី១ និងទី២ បានសាងសង់រួច និងដំណើរការ ដើម្បីបញ្ឈប់ការបង្ហូរទឹកកខ្វក់ ចូលទៅក្នុងតំបន់ឆ្នេរ។
លោក គួច ចំរើន អភិបាលខេត្តព្រះសីហនុ បានប្រាប់ឱ្យរស្មីកម្ពុជាដឹង នៅថ្ងៃទី២៨ ខែមិថុនា ឆ្នាំ២០២២ថាៈ ការសាងសង់ស្ថានីយប្រព្រឹត្តិកម្មទឹកកខ្វក់ទី៣ ស្ថិតនៅក្នុងសង្កាត់លេខ៤ ក្រុងព្រះសីហនុ មកដល់ពេលនេះ (២៨មិថុនា) អនុវត្តបានលទ្ធផលប្រមាណជា ៤៤ ភាគរយ នៃគម្រោងទាំងមូលហើយ ។ គម្រោងដែលបានចាប់ផ្តើមអនុវត្ត កាលពីដើមឆ្នាំនេះ គ្រោងបញ្ចប់នៅក្នុងឆ្នាំ២០២៣។
ស្ថានីយប្រព្រឹត្តិកម្មទឹកកខ្វក់ទី៣ មានទីតាំងនៅអូរពយឈើទាលនេះ មានសមត្ថភាពចម្រោះ ទឹកកខ្វក់ បាន ២ ម៉ឺនម៉ែត្រគូប ក្នុងមួយថ្ងៃ។ ស្ថានីយប្រព្រឹត្តិកម្មទឹកកខ្វក់ទី៣ បានចាប់ផ្តើម បន្ទាប់ពីស្ថានីយប្រព្រឹត្តិកម្មទឹកកខ្វក់ទី១ និងទី២ បានសាងសង់រួច និងដាក់ឱ្យដំណើរការ ក្រោមស្តង់ដារក្រសួងបរិស្ថាន ដែលបានអនុញ្ញាតឱ្យទឹក ដែលចម្រោះបង្ហូរចូលសមុទ្រ ដែលមានសុវត្ថិភាព ដល់ជីវចម្រុះ ក្រោមបាតសមុទ្រ។
ទឹកកខ្វក់របស់ទីក្រុង កាលពីមុន ត្រូវបានគេបង្ហូរចូលទៅដល់តំបន់ឆ្នេរ តាមប្រឡាយ និងអូរធម្មជាតិ តែបច្ចុប្បន្ន មួយភាគធំ បានហូរចូលទៅកាន់អាងស្តុក (១៦ ហិកតា) ស្ថានីយប្រព្រឹត្តិកម្មទឹកកខ្វក់ ជាមុនសិន មុននឹងហូរធ្លាក់ចូលទៅដល់តំបន់ឆ្នេរសមុទ្រ។ ទឹកកខ្វក់ ក្រោយពេលធ្វើប្រព្រឹត្តិកម្មរួច ក្លាយជាទឹក ដែលធ្វើឱ្យត្រីរស់នៅបាន។
គម្រោងខាងលើនេះ បង្កើតឡើង ដោយគណៈកម្មាធិការជាតិគ្រប់គ្រង និងអភិវឌ្ឍន៍ តំបន់ឆ្នេរសមុទ្រកម្ពុជា ដែលជាឆ្នេរជាប់លេខ១ ល្អដាច់គេ នៅលើពិភពលោក៕
