ឯកឧត្តមអគ្គាធិការ ស្រេង ស្រស់ បាន ដឹកនាំកិច្ចប្រជុំអធិការកិច្ចសម្រាប់ការិយបរិច្ឆេទ២០២១ និងបណ្តាឆ្នាំពាក់ព័ន្ធ នៅនាយកដ្ឋានព័ត៌មានវិទ្យា និងទំនាក់ទំនងសាធារណៈ ថ្ងៃសុក្រ ១០រោច ខែជេស្ឋ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី២៤ ខែមិថុនា ឆ្នាំ២០២២ នៅទីស្ដីការក្រសួង ឯកឧត្តម ស្រេង ស្រស់ អគ្គាធិការក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំអធិការកិច្ចសម្រាប់ការិយបរិច្ឆេទ២០២១ និងបណ្តាឆ្នាំពាក់ព័ន្ធ នៅនាយកដ្ឋានព័ត៌មានវិទ្យា និងទំនាក់ទំនងសាធារណៈ ដោយមានការចូលរួមពីថ្នាក់ដឹកនាំអគ្គាធិការដ្ឋាន ថ្នាក់ដឹកនាំនាយកដ្ឋាន មន្ត្រីជំនាញមកពីអគ្គាធិការដ្ឋាន និងមន្ត្រីរបស់នាយកដ្ឋានព័ត៌មានវិទ្យា និងទំនាក់ទំនងសាធារណៈ ផងដែរ។ ការចុះអធិការកិច្ចរបស់គណៈប្រតិភូនេះធ្វើឡើងក្នុងគោលបំណងពិនិត្យទៅលើការគ្រប់គ្រងការអនុវត្តតួនាទីភារកិច្ច ការគ្រប់គ្រងធនធាន ការពង្រឹងសមត្ថភាព ការងារទំនាក់ទំនង ការគ្រប់គ្រងរចនាសម្ព័ន្ធ ការងារគ្រប់គ្រងទ្រព្យសម្បត្តិរដ្ឋ ការងារគ្រប់គ្រងហិរញ្ញវត្ថុ ការងារគ្រប់គ្រងប្រព័ន្ធព័ត៌មានវិទ្យា ដើម្បីបានដឹងពីចំណុចល្អ និងចំណុចខ្វះខាតរបស់នាយកដ្ឋានព័ត៌មានវិទ្យា និងទំនាក់ទំនងសាធារណៈ ក្នុងការិយបរិច្ឆេទ២០២១ និងបណ្តាឆ្នាំពាក់ព័ន្ធ និងត្រួតពិនិត្យនូវបណ្តាវិធានការផ្សេងៗផងដែរ។ ឯកឧត្ដមអគ្គាធិការបានសម្ដែងនូវអំណរគុណយ៉ាងជ្រាលជ្រៅចំពោះក្រុមការងារចុះមកធ្វើអធិការកិច្ច និងក្រុមការងាររបស់នាយកដ្ឋានព័ត៌មានវិទ្យា និងទំនាក់ទំនងសាធារណៈ ដែលបានសហការគ្នាល្អ និងផ្តល់ឯកសារពាក់ព័ន្ធនានា ធ្វើការផ្ទៀងផ្ទាត់ ដើម្បីឱ្យស្របតាមបទដ្ឋានគតិយុត្តនានា និងបានផ្ដាំផ្ញើសុំឱ្យក្រុមការងារទាំងពីរខិតខំប្រឹងប្រែងជំរុញការងារបន្ថែមទៀត ដើម្បីឱ្យការធ្វើអធិការកិច្ចនេះទទួលបានជោគជ័យខ្ពស់ និងបញ្ចប់តាមពេលវេលាកំណត់៕