រដ្ឋាភិបាលកម្ពុជាបានសម្រេចសម្ពោធដាក់ឱ្យប្រើប្រាស់នូវផ្លូវលេខ ១.៥៧៧ ដែលមានប្រវែង ៥១,៨០ គីឡូម៉ែត្រ ចាប់ពីភូមិភ្ជាវ ឃុំត្រែង ស្រុករតនៈមណ្ឌល ទៅកាន់ភូមិឆករកា ឃុំសំឡូត ត្រង់ចំណុចច្រកទ្វារព្រំដែន៤០០ស្រុកសំឡូត ក្នុងខេត្តបាត់ដំបង នៅព្រឹកថ្ងៃទី០២ ខែមេសា ។ ផ្លូវមួយខ្សែនេះ ត្រូវបានស្ថាបនាតាមស្តង់ដារចិន Class III មានទទឹងផ្លូវ៩ម៉ែត្រក្រាលកៅស៊ូពីរទ្រនាប់ លើទទឹងផ្លូវ៨ម៉ែត្រ ។ គម្រោងផ្លូវនេះ បានចំណាយថវិកាសរុបប្រមាណជាង ៣៨លានដុល្លារអាមេរិក ជាប្រាក់កម្ចីរបស់រដ្ឋាភិបាលសាធារណរដ្ឋប្រជាមានិតចិន រួមជាមួយថវិកាបដិភាគរបស់រាជរដ្ឋាភិបាលកម្ពុជា សម្រាប់ដោះស្រាយផលប៉ះពាល់ ការបោសសម្អាតមីន និងយុទ្ធភ័ណ្ឌមិនទាន់ផ្ទុះ ។ គម្រោងនេះ សាងសង់ដោយក្រុមហ៊ុនសាជីវកម្មស្ពាន-ថ្នល់ចិន និងពិនិត្យបច្ចេកទេសសាងសង់ដោយក្រុមហ៊ុនទីប្រឹក្សាបច្ចេកទេសសំណង់ក្វាងចូវវ៉ានអាន ដោយប្រើរយៈពេលសាងសង់ចំនួន២៣ខែ និងបានបញ្ចប់ការសាងសង់នៅចុងឆ្នាំ២០១៧កន្លងទៅនេះ។ លោក ស៊ុន ចាន់ថុល រដ្ឋមន្ត្រីក្រសួងសាធារណៈការបានថ្លែងថា ផ្លូវលេខ ១.៥៧៧ ជាខ្សែផ្លូវយុទ្ធសាស្ត្រមួយយ៉ាងសំខាន់ សម្រាប់បម្រើដល់កិច្ចការពារជាតិ និងការអភិវឌ្ឍសេដ្ឋកិច្ចដែលតភ្ជាប់តំបន់ភូមិភាគកណ្តាល និងវាលទំនាបផ្នែកខាងលើ ទៅនឹងភូមិភាគខាងលិចប្រទេស ។ គម្រោងនេះ ជាចំណងដៃដ៏ពិសិដ្ឋ ឆ្លើយតបទៅនឹងសំណូមពរ និងតម្រូវការនៃការដឹកជញ្ជូនការធ្វើដំណើរ របស់ប្រជាពលរដ្ឋដែលរស់នៅតំបន់ត្រែង សំឡូត និងតំបន់ភូមិភាគខាងលិចប្រទេសទៅកាន់ក្រុងបាត់ដំបង រាជធានីភ្នំពេញ ឬតំបន់ផ្សេងៗទូទាំងប្រទេស និងជាខ្សែផ្លូវដែលធ្វើសមាហរណកម្មពេញលេញសម្រាប់ខេត្តបាត់ដំបងទាំងមូល ព្រោះថាស្រុកសំឡូតជាស្រុកតែមួយគត់ និងចុងក្រោយបំផុត ដែលទើបមានផ្លូវកៅស៊ូ តភ្ជាប់មកក្រុងបាត់ដំបង ៕ (ដោយគង់ ឧត្តម)