ប្រជុំពិភាក្សាលើវឌ្ឍនភាពការងារកម្មវិធីដកពិន្ទុសម្រាប់បណ្ណបើកបរ និងពិន័យបទល្មើសច្បាប់ស្ដីពីចរាចរណ៍ផ្លូវគោក និងត្រៀមដាក់ដំណើរការសាកល្បងនៅតាមគោលដៅ ដែលនឹងត្រូវកំណត់ដោយអគ្គស្នងការដ្ឋាននគរបាលជាតិ ថ្ងៃអង្គារ ៧រោច ខែជេស្ឋ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី២១ ខែមិថុនា ឆ្នាំ២០២២ នៅទីនៅទីស្តីការ ឯកឧត្តម ឈួន វ៉ន់ អគ្គនាយក នៃអគ្គនាយកដ្ឋានដឹកជញ្ជូនផ្លូវគោក និង ឯកឧត្តម នាយឧត្តមសេនីយ៍ ហ៊ឹម យ៉ាន អគ្គស្នងការរងនគរបាលជាតិ បានដឹកនាំកិច្ចប្រជុំត្រួតពិនិត្យវឌ្ឍនភាពការងារ និងត្រៀមដាក់ឱ្យដំណើរការសាកល្បងកម្មវិធីដកពិន្ទុសម្រាប់បណ្ណបើកបរ និងពិន័យបទល្មើសច្បាប់ស្ដីពីចរាចរណ៍ផ្លូវគោក ដោយមានការចូលរួមពី លោក អគ្គនាយករង ប្រធាននាយកដ្ឋានដឹកជញ្ជូនផ្លូវគោក នៃអគ្គនាយកដ្ឋានដឹកជញ្ជូនផ្លូវគោក និងលោកប្រធាននាយកដ្ឋានព័ត៌មានវិទ្យា និងទំនាក់ទំនងសាធារណៈ និងមន្ត្រីជំនាញបច្ចេកទេសពាក់ព័ន្ធនៃក្រសួងសាធារណការ និងដឹកជញ្ជូន និងអគ្គស្នងការដ្ឋាននគរបាលជាតិ។ កិច្ចប្រជុំនេះធ្វើឡើងដើម្បីពិនិត្យលើវឌ្ឍនភាពការងារ និងដាក់អនុវត្តយន្តការគ្រប់គ្រងមួយចំនួនដើម្បីធានាឱ្យបានប្រសិទ្ធភាព និងប្រសិទ្ធផលដើម្បីទប់ស្កាត់ និងកាត់បន្ថយបទល្មើសចរាចរណ៍ នាថ្ងៃអនាគត។ កម្មវិធីពិន័យបទល្មើសច្បាប់ស្ដីពីចរាចរណ៍ផ្លូវគោក និងការដកពិន្ទុសម្រាប់បណ្ណបើកបរ នឹងត្រៀមដាក់ដំណើរការសាកល្បងនៅតាមគោលដៅ ដែលនឹងត្រូវកំណត់ដោយអគ្គស្នងការដ្ឋាននគរបាលជាតិ។ ជាទីបញ្ចប់ ឯកឧត្តមអគ្គនាយក និងនាយឧត្តមសេនីយ៍ បានថ្លែងនូវកោតសរសើរដល់ក្រុមការងារពាក់ព័ន្ធ ដែលបានខិតខំប្រឹងប្រែងសហការ រៀបចំកម្មវិធីនេះតាម អនុសាសន៍ណែនាំដ៏ខ្ពង់ខ្ពស់របស់ ឯកឧត្តមទេសរដ្ឋមន្ត្រី ស៊ុន ចាន់ ថុល រដ្ឋមន្រ្តីក្រសួងសាធារណការ និងដឹកជញ្ជូន និងជាអនុប្រធានអចិន្ត្រៃយ៍គណៈកម្មាធិការជាតិ សុវត្ថិភាពចរាចរណ៍ផ្លូវគោក និងក្រោមការចង្អុលបង្ហាញដ៏ខ្ពង់ខ្ពស់របស់ សម្តេចក្រឡាហោម ស ខេង ឧបនាយរដ្ឋមន្រ្តី រដ្ឋមន្ត្រីក្រសួងមហាផ្ទៃ និងជាប្រធាន គណៈកម្មាធិការជាតិ សុវត្ថិភាពចរាចរណ៍ផ្លូវគោក៕