[Morningpostkh] - គម្រោងសង់ផ្លូវ៧១Cសម្រេចបាន៣៧ភាគរយ គ្រោងបញ្ចប់ការសាងសង់នៅខែតុលា២០២៤
2022-06-21
Go to the website published Morningpostkh
ភ្នំពេញ ៖ គម្រោងសាងសង់ផ្លូវ ៧១C តភ្ជាប់ពីស្រុកត្បូងឃ្មុំ ខេត្តត្បូងឃ្មុំដល់ស្រុកចំការលើ ខេត្តកំពង់ចាមប្រវែង១១៤គីឡូម៉ែត្រ សម្រេចបានការងារសាងសង់ប្រមាណ៣៧ភាគរយហើយ ដែលគម្រោងនេះដែរមានផែនការបញ្ចប់នៅខែតុលា២០២៤ ខាងមុខនេះ ។នេះបើតាមលោកស៊ុន ចាន់ថុល រដ្ឋមន្ត្រីក្រសួងសាធារណការនិងដឹកជញ្ជូនថ្លែងប្រាប់សារព័ត៌មានក្នុងពេលចុះត្រួតពិនិត្យការងារសាងសង់នៅថ្ងៃទី២០ មិថុនា ២០២២នេះ ។
លោកបន្តថារហូតមកដល់ពេលការប្រើប្រាស់វេលាសម្រាប់សាងសង់ផ្លូវនេះអស់ប្រមាណ៣៥ភាគរយហើយនិងសម្រេចបានការងារប្រមាណ៣៧ភាគរយ ដែលផ្លូវនេះ រំពឹងថានឹងបញ្ចប់មុនផែនការកំណត់ ក្នុងអំឡុងខែតុលា២០២៤ ពីព្រោះថាតាមបទពិសោធន៍សង់ផ្លូវកន្លងមក ក្រុមហ៊ុនចិនតែងតែបញ្ចប់គម្រោងមុនកាលកំណត់និងស្របទៅតាមស្ដង់ដារនិងការចង់បានរបស់ក្រសួងផងដែរ ។ ផ្លូវមួយខ្សែនេះប្រើប្រាស់ថវិកាអស់ប្រមាណ១៣០លានដុល្លារអាមេរិក និងជាផ្លូវដែលសង់ឡើងសម្រាប់បម្រើដល់ការធ្វើដំណើររបស់ប្រជាពលរដ្ឋ ឆ្លងកាត់ខេត្តកំពង់ និងខេត្តត្បូងឃ្មុំក៏ដូចជាសម្រាប់បម្រើដល់ការដឹកជញ្ជូនទំនិញកសិផលរបស់ប្រជាពលរដ្ឋកសិករផងដែរ ។
លោកបន្ថែមថាផ្លូវជាតិលេខ៧១C គឺជាសរសៃឈាមសេដ្ឋកិច្ចជាតិដ៏មានសក្តានុពលរបស់កម្ពុជា អាចជួយ សម្រួល ដល់ការតភ្ជាប់ទំនាក់ទំនងគមនាគមន៍ ធ្វើសមាហរណកម្មតភ្ជាប់ផ្ទៃក្នុងប្រទេស និងជាមួយតំបន់ រួមចំណែកក្នុងការលើកកម្ពស់ប្រសិទ្ធភាពនៃការដោះដូរពាណិជ្ជកម្ម វិនិយោគ ដំណាំកសិផល កសិ-ឧស្សា ហកម្ម និងទេសចរណ៍បានឆាប់រហ័ស និងចំណាយតិច ជាពិសេសជាមួយប្រទេសជិតខាង ។
គួរបញ្ជាក់ថា ក្រៅពីផ្លូវមួយខ្សែនេះ រដ្ឋាភិបាលក៏បានសិក្សានិងគ្រោងសាងសង់ផ្លូវជាច្រើនខ្សែទៀតតភ្ជាប់ពីភ្នំពេញទៅបណ្ដាខេត្ត និងពីបណ្ដាខេត្តទៅបណ្ដាខេត្ត ដើម្បីបម្រើដល់ចរន្តសេដ្ឋកិច្ចជាតិ ដូចជាផ្លូវល្បឿនលឿន ផ្លូវក្នុងខេត្ត និងផ្លូវជាតិសំខាន់ៗមួយចំនួនទៀតផងដែរ ។
សម្ដេចតេជោហ៊ុន សែនក៏បានស្នើឱ្យសិក្សាពង្រីកផ្លូវទៅកាន់តំបន់ព្រំដែនកម្ពុជាវៀតណាម ដើម្បីសម្រួលដល់ការដឹកជញ្ជូនទំនិញ ចេញនិងចូលកម្ពុជា និងដើម្បីជំរុញ ទំហំពាណិជ្ជកម្មរវាងប្រទេសទាំងពីរកាន់តែមានកំណើនច្រើនឡើង ៕
