(រាជធានីភ្នំពេញ)៖ ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានលើកឡើងនូវសារៈសំខាន់នៃគោលនយោបាយអភិវឌ្ឍន៍វិស័យឧស្សាហកម្មកម្ពុជាចំនួន ៤ចំណុចធំៗ។ រដ្ឋមន្ត្រីក្រសួងសាធារណការ បានថ្លែងបែបនេះ​នៅមុខឯកឧត្តម MIKAMI Massahiro ឯកអគ្គរាជទូតជប៉ុន ប្រចាំកម្ពុជា ក្នុងឱកាសជួបពិភាក្សាការងារនាថ្ងៃទី១៥ ខែមិថុនា ឆ្នាំ២០២២ នៅទីស្ដីការក្រសួងសាធារណការ។ ឯកឧត្តមក៏បាន​គូសបញ្ជាក់ អំពីសារៈសំខាន់ដោយផ្ដោតទៅលើ ១) ការកាត់បន្ថយថ្លៃអគ្គិសនី, ២) ការរៀបចំឱ្យមានប្រព័ន្ធភស្តុភារកម្ម ប្រកបដោយប្រសិទ្ធភាពតាមរយៈការបង្កើតផែនការមេភស្តុភារកម្ម ដើម្បីលើកកម្ពស់ឧត្តមភាពប្រកួតប្រជែង នៃការដឹកជញ្ជូន កាត់បន្ថយចំណាយភស្តុភារកម្ម និងការដឹកជញ្ជូន, ៣) ការកសាងធនធានមនុស្ស ដែលមានភាពប្រកួតប្រជែង និង ៤) ការប្រែក្លាយខេត្តព្រះសីហនុទាំងមូល ឱ្យក្លាយទៅជាតំបន់សេដ្ឋកិច្ចពិសេសពហុបំណង។ទន្ទឹមនឹងនេះ ឯកឧត្តមទេសរដ្ឋមន្ត្រី បានស្នើឱ្យឯកឧត្តមឯកអគ្គរាជទូត ពិចារណា លទ្ធភាពលើការចុះអនុស្សរណៈយោគយល់ រវាងមហាវិទ្យាល័យ ឬសាកលវិទ្យាល័យជប៉ុន ជាមួយវិទ្យាស្ថានតេជោសែន សាធារណការ និងដឹកជញ្ជូន ដើម្បីបណ្តុះបណ្តាល វិស្វករ និងអ្នកបច្ចេកទេសខ្មែរឱ្យបានច្រើន សំដៅចូលរួមចំណែកកសាងហេដ្ឋារចនាសម្ព័ ន្ធ ឱ្យកាន់តែមានការរីកចម្រើនថែមទៀត។ ជាមួយគ្នានេះដែរ ឯកឧត្តមឯកអគ្គរាជទូតជប៉ុន បានកោតសរសើរដល់ថ្នាក់ដឹកនាំរបស់ក្រសួងសាធារណការ និងដឹកជញ្ជូន ដែលបានខិតខំប្រឹងប្រែងអភិវឌ្ឍន៍ និងធ្វើឱ្យប្រសើរឡើងនូវហេដ្ឋារចនាសម្ព័ន្ធរូបវន្តរបស់កម្ពុជា នៅគ្រប់ច្រកល្ហក ក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតី តេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងបានបង្ហាញចំណាប់អារម្មណ៍លើការឈ្វេងយល់អំពីបច្ចុប្បន្នភាព នៃគម្រោងសាងសង់អភិវឌ្ឍន៍ហេដ្ឋារចនាសម្ព័ន្ធនានានៅកម្ពុជាផងដែរ។ ឯកឧត្តមឯកអគ្គរាជទូត ក៏បានសម្តែងការកោតសរសើរផងដែរចំពោះនាយកដ្ឋានព័ត៌មានវិទ្យា និងទំនាក់ទំនងសាធារណៈ នៃក្រសួងសាធារណការ និងដឹកជញ្ជូន ដែលបានខិតខំប្រឹងប្រែងយ៉ាងយកចិត្តទុកដាក់ ក្នុងការអភិវឌ្ឍប្រព័ន្ធស្វ័យប្រវត្តិកម្ម ដើម្បីកាត់បន្ថយការិយាធិបតេយ្យ និងអនុញ្ញាតឱ្យមានការបង់ប្រាក់កម្រៃសេវាតាមប្រព័ន្ធអនឡាញ ប្រកប​ដោយប្រសិទ្ធភាព និងតម្លាភាពសម្រាប់ប្រជាពលរដ្ឋ៕