[Rasmei Kampuchea Daily News] - រដ្ឋាភិបាលផ្តល់ផ្លូវកៅស៊ូ ឌី ប៊ី អេស ធី ចំនួន២៣ខ្សែដល់ខេត្តចំនួនប្រាំ
ដោយៈ គង់ហេង/ កំពង់ចាមៈ រាជរដ្ឋាភិបាលបានផ្តល់ផ្លូវកៅស៊ូប្រភេទ ឌី ប៊ី អេស ធី (DBST) ចំនួន ២៣ ខ្សែដែលមានប្រវែងសរុបចំនួន ៣៥០,៨០ គីឡូម៉ែត្រដល់ខេត្តចំនួន ប្រាំ តាមរយៈក្រសួងអភិវឌ្ឍន៍ជនបទ ដែលស្ថិតក្នុងគម្រោងកែលម្អផ្លូវអភិវឌ្ឍន៍ជនបទជំហានទី៣។
នេះបើយោងតាមការបញ្ជាក់របស់លោក អ៊ុន ចាន់ដា អភិបាលខេត្តកំពង់ចាម ជម្រាបជូនលោក ហ៊ុន ម៉ាណែត តំណាងដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ដែលបានអញ្ជើញជាអធិបតីក្នុងការសម្ពោធដាក់ឱ្យប្រើប្រាស់ផ្លូវក្រាលកៅស៊ូ DBST ចំនួន ប្រាំ ខ្សែប្រវែងសរុប ២៧,៩៧ គីឡូម៉ែត្រ នៅស្រុកស្ទឹងត្រង់នៅព្រឹកថ្ងៃទី២០ ឧសភានេះ។
លោកអភិបាលខេត្តកំពង់ចាមបានបញ្ជាក់ថាៈ ខេត្តទាំងប្រាំ ដែលទទួលបានផ្លូវប្រភេទ DBST មានៈ ខេត្តកំពង់ចាម, ខេត្តត្បូងឃ្មុំ, ខេត្តក្រចេះ,ខេត្តព្រៃវែង និងខេត្តស្វាយរៀង។ ក្នុងនោះខេត្តកំពង់ចាមទទួលបានផ្លូវក្នុងគម្រោងមួយនេះចំនួន ប្រាំមួយ ខ្សែស្មើនឹងប្រវែង ១០០,៦០ គីឡូម៉ែត្រ ដោយគិតជាទឹកប្រាក់ប្រមាណ ១៣,៩៩លាន ដុល្លារ។
លោកបានបន្ថែមថាៈ ផ្លូវទាំង ប្រាំមួយ ខ្សែបានចាប់អនុវត្តគម្រោងថ្ងៃទី១ ខែឧសភា ឆ្នាំ២០២០ ប្រើប្រាស់រយៈពេល ៣៦ ខែ។ ដោយខ្សែទី១ មានប្រវែង ១៣,៦៣ គីឡូម៉ែត្រ ពី គរ ទៅកាន់រមណីយដ្ឋានទឹកឆា ក្នុងស្រុកព្រៃឈរ, ខ្សែទី២ មានប្រវែង ២៣,១៥ គីឡូម៉ែត្រ ពីឃុំសណ្តែក ស្រុកបាធាយ ទៅឃុំសំពងជ័យ ស្រុកជើងព្រៃ, ខ្សែទី៣ មានប្រវែង ១១,២៤ គីឡូម៉ែត្រ ពីអូរតាថុក ស្រុកព្រៃឈរ ទៅបុសថ្លាន់ ស្រុកចម្ការលើ, ខ្សែទី៤ ប្រវែង១១,៣០ គីឡូម៉ែត្រពីផ្អាវ ស្រុកបាធាយ ទៅដូនដុំ ស្រុកជើងព្រៃ, ខ្សែទី៥ ប្រវែង ២០,២១ គីឡូម៉ែត្រ ពីដីក្រហម ទៅឃុំអារក្សត្នោត ស្រុកស្ទឹងត្រង់ និងខ្សែទី៦ ប្រវែង១៤,១២ គីឡូម៉ែត្រ ពីមេសរជ្រៃ ទៅវត្តឡោ ស្រុកស្ទឹងត្រង់។
លោកបានបន្តថាៈ ដោយឡែកសម្រាប់ផ្លូវមួយខ្សែក្នុងចំណោមផ្លូវចំនួន ប្រាំមួយ ខ្សែខាងលើដែលមានប្រវែង ២១,២៦ គីឡូម៉ែត្រពីដីក្រហម មកឃុំអារក្សត្នោត ស្រុកស្ទឹងត្រង់ ត្រូវបានសម្ពោធដាក់ឱ្យប្រើប្រាស់នៅថ្ងៃនេះ គឺចំណាយថវិកាប្រមាណ ៣,៥លាន ដុល្លារ រួមជាមួយផ្លូវ DBST ចំនួន បួន ខ្សែទៀតប្រវែង ៧.៧៦០ ម៉ែត្រដែលបានប្រើប្រាស់ថវិការបស់រដ្ឋបាលខេត្តកំពង់ចាម ស្ថិតក្នុងស្រុកស្ទឹងត្រង់ ក៏សម្ពោធដាក់ឱ្យប្រើប្រាស់នាឱកាសនេះដែរ៕
